Македонски
Основното јавно обвинителство Охрид бара притвор за 21-годишниот возач кој возејќи без дозвола синоќа излета од улицата Туристичка во Охрид и на тротоар прегази 44-годишна жена, а тешко повреден беше нејзиниот партнер. Притвор се бара и за 18-годишниот сопственик на колата, кој бил сопатник. Обвинителството донесе Наредба за спроведување истражна постапка против 2 лица за Тешки дела против безбедноста на луѓето имотот во сообраќајот од член 300 став 2 од Кривичниот законик.
„Првиот осомничен го извршил делото со директно загрозување на безбедноста во сообраќајот, односно во врска со член 297 став 1 од Кривичниот законик, бидејќи како учесник во сообраќајот на јавните патишта, управувал автомобил ‘фолксваген голф’ без да поседува возачка дозвола и со брзина неприспособена на својствата и состојбите на патот. Поради тоа 21-годишникот изгубил контрола над возилото, навлегол на кружниот тек преминувајќи преку средишниот остров, возел надвор од коловозот и удрил во метален столб – канделабра на тротоарот. Потоа продолжил да се движи по тротоарот каде налетал на двајца пешаци и конечно удрил во бетонска ограда. Во несреќата била повредена пешакот Александра Божиноска која починала на лице место, додека кај другиот пешак биле предизвикани тешки телесни повреди“, соопшти Обвинителството.
