Македонски
Состојбата со сипаниците кај овците и козите и натаму е под внимателен надзор на надлежните институции. Министерот за земјоделство, Борче Серафимовски, заедно со директорот на Агенцијата за храна и ветеринарство (АХВ), Оливер Миланов, одржал средба со претставници на Сојузот на одгледувачи на овци, на која било разговарано за актуелната епидемиолошка состојба и досегашните мерки за спречување на ширењето на болеста.
На средбата биле разгледани ефектите од контролните и заштитните мерки, примената на биосигурносните правила, како и важноста од навремено пријавување на секој сомнителен случај.
Според министерот, секоја наредна одлука ќе се носи врз основа на стручна процена на ризикот и препораките од домашните и европските ветеринарни експерти.
Иако сипаниците кај овците и козите не претставуваат опасност за луѓето, болеста може да има сериозни последици врз сточниот фонд, а со тоа и врз одгледувачите. Поради тоа, надлежните институции најавуваат продолжување на следењето на состојбата и приспособување на мерките во зависност од развојот на епидемиолошката слика.
Министерот посочува дека заедно со АХВ ќе продолжат внимателно да ја следат состојбата и навремено да ги информираат одгледувачите за сите понатамошни мерки и активности.
