Македонски
Косовскиот премиер Аљбин Курти, на седница на Собранието на Косово изјави дека на земјата и е потребна сериозна стратегија за соочување со ситуацијата во Хаг, но дека, според него, за нејзино спроведување државата мора да има функционални институции, вклучително и претседател.
Ни треба сериозна стратегија за Хаг, но за да ја спроведеме таа стратегија, ни треба претседател – изјави Курти.
Тој истакна дека, соочено со она што го смета за неправедна ситуација во Хаг, Косово „мора да биде силна држава со консолидирани институции“.
Мора да бидеме свесни за уште една работа – за неправедната ситуација во Хаг ни треба силна држава. Мора да постои закон, но мора да постои и претседател – рече косовскиот премиер.
Курти предупреди дека усвојувањето закон што се однесува на Хаг, без функционална институционална стабилност, би можело да му донесе на Косово нови последици.
Законот за Хаг без функционална стабилност, без претседател и со повторени избори, носи ризик да доведе до нестабилност во земјата – рече Курти.
Тој најави дека повторно ќе се сретне со претседателот на Демократскиот сојуз на Косово (ДСК), Беџет Хамза, со цел да се постигне договор за надминување на политичката ситуација, а претходните средби со Хамза ги оцени како конструктивни.
Собранието на Косово со 91 глас во начело го усвои предлог-законот за Специјализираните совети и Специјализираното обвинителство. Пратениците на Демократскиот сојуз на Косово (ДСК) не учествуваа во гласањето.
Претставниците на Српската листа не присуствуваа на седницата на Собранието.
Пратеникот на Демократската партија на Косово (ДПК), Перпарим Груда, го претстави предлогот, велејќи дека формирањето на Специјализираните совети било поврзано со наводите за трговија со органи, а според него, шестгодишниот процес пред Специјализираните совети покажал дека немало трговија со органи.
Тој истакна дека предложените измени не им го одземаат на Специјализираните совети правото да продължат со работа, туку имаат за цел ограничување на дел од нивната надлежност, вклучително и прашањата поврзани со воени злосторства.
Груда образложи дека првично утврдената надлежност на Специјализираните совети не била предвидена така што би опфаќала случаи кои, според него, не се поврзани со наводите врз основа на кои бил основан овој суд.
Шефицата на пратеничката група на Самоопределување (ПС), Арберије Нагавци, рече дека прашањето за Специјализираните совети требало да биде решено во пролетта 2015 година, додавајќи дека ПС тогаш бил против Специјализираните совети и дека истиот став го има и денес, но дека го поддржува предлог-законот.
Жалбената постапка мора да биде третирана со најголема сериозност. Последиците од овој процес отидоа подалеку од судницата. Денешната измена на законот не ја поништува оваа штета. ОВК не може да се поистоветува со ваквата пресуда – рече таа.
