Македонски
Од 8 октомври 2026 година, во редовна кино дистрибуција пристигнува филмот „Сирак“ (Arva), историска драма во режија на László Nemes, која преку интимна семејна приказна го отвора прашањето за идентитетот, загубата и вистината што понекогаш е потешка од сеќавањата со кои сме пораснале.
Дејството е сместено во периодот по Унгарската револуција од 1956 година. Во центарот на приказната е момче кое расте со својата мајка и со приказните за идеализираниот татко кој повеќе не е дел од неговиот живот. Сликата што со години ја градел за него одеднаш почнува да се распаѓа кога во нивниот свет се појавува суров и непредвидлив човек, кој тврди дека токму тој е неговиот вистински татко.
Она што започнува како лична семејна драма постепено се претвора во болно соочување со минатото. Момчето е принудено да избере меѓу светот создаден од приказни, спомени и надежи и реалноста која е далеку посложена и посурова од она што дотогаш го познавал.
Со историските случувања како силна позадина, „Сирак“ не се задржува само на политичките и општествените последици од едно турбулентно време, туку се фокусира на нивното влијание врз поединецот и семејството. Филмот истражува како минатото продолжува да живее низ следните генерации и како вистината може истовремено да ослободува, но и да руши сè во што сме верувале.
Во главните улоги настапуваат Bojtorján Barabas, Andrea Waskovics и Grégory Gadebois, а филмот е меѓународна копродукција на САД, Унгарија, Велика Британија, Франција, Кипар и Германија.
„Сирак“ е драма за едно момче кое мора да порасне побрзо отколку што очекувало – приказна за семејството, идентитетот и моментот кога детските претстави се судираат со реалноста.
