Шевчович: Царините суштински ќе ја оневозможат трговијата меѓу ЕУ и САД

Freepik

Еврокомесарот за трговија Марош Шефчович изјави дека американските царини од 30 проценти за увоз на европски стоки во суштина ќе ја оневозможат трговијата меѓу САД и Европската Унија, нагласувајќи дека луѓето од двете страни на Атлантикот ќе бидат многу погодени од промената.

Тој рече дека ЕУ со жалење и разочарување го примил писмото од американскиот претседател Доналд Трамп за намерата за воведување царини, но, исто така, вети дека ќе соработува со своите американски колеги за да се најде излез од кризата.

-Ќе разговарам со министрите (за надворешни работи и трговија на земјите-членки на ЕУ) за следните чекори во наредните недели. Гледам дека тие се фокусирани на четири области – преговори, мерки за ребалансирање, работа со истомисленици и диверзификација на нашата трговија, рече Шефчович.

Претседателката на Европската комисија, Урсула фон дер Лајен, вчера изјави дека ЕУ ќе го одложи воведувањето на реципрочни американски царини, нагласувајќи дека е време за преговори.

Таа изјави дека „контратарифите“ се одложени до први август, што значи дека САД и ЕУ ќе имаат околу две недели за преговори и оцени дека трговските тензии со САД покажуваат колку е важно ЕУ да ги диверзифицира своите трговски односи.

Американскиот претседател Доналд Трамп минатата недела објави дека почнувајќи од 1 август, царински давачки во износ од 30 проценти ќе стапат во сила за сите стоки увезени од земјите на Европската унија, односно од Мексико во САД.

На својот онлајн профил Truth Social, тој објави копии од писмата што ги испратил до претседателката на Европската комисија, Урсула фон дер Лајен, и до мексиканската претседателка Клаудија Шајнбаум.