Македонски
Унгарија не сака да го уапси израелскиот премиер Бенјамин Нетанјаху, ниту има правни средства да го стори тоа, изјави премиерот Виктор Орбан.
Објаснувајќи ја одлуката да не се почитува налогот за апсење на Меѓународниот кривичен суд (МКС), Орбан во интервју за државното радио рече дека во таа земја не е вообичаено „да се апсат гости“, пренесува МТИ. Во исто време, Унгарија не сакаше да го уапси Нетанјаху бидејќи „Израел е пријател“ – рече Орбан.
Смислата на надворешната политика е земјата да стекне пријатели, а добро е Израел да е пријател, а не непријател на Унгарија, додаде унгарскиот премиер. Орбан изјави и дека апсењето на израелскиот премиер не е ни законски можно бидејќи тој меѓународен договор не е интегриран во правниот систем на Унгарија.
Унгарскиот премиер Виктор Орбан вчера во Будимпешта со воени почести го пречека Нетанјаху, по кого МКС издаде налог за апсење под обвинение за воени злосторства во Појасот Газа. Како членка основач на МКС, Унгарија е обврзана да апси и екстрадира секого кој е под судски налог, но Орбан, кога упати покана до Нетанјаху да ја посети Будимпешта, рече дека нема да ја почитува судската одлука.
