Македонски
Спектакуларно отворање на словенечката Европска престолнина на културата 2025
Министерот за култура и туризам Зоран Љутков вечерва во Нова Горица, присуствуваше на церемонијата на отворање на првата транснационална „Европска престолнина на културата ГО! Нова Горица/Гориција“.
Со незаборавен културен спектакл отворањето се одржа на плоштадот Европа кој симболично го преставува срцето на Нова Горица и Гориција, два града во две земји кои здружени испишуваат ново поглавје во културата – „Без граници“. Настаните во рамки на програмата под наслов „Од станица до станица“, во текот на целиот ден се одвиваа низ улиците и плоштадите, оживеани од музичари, играорци и други изведувачи.
Нова Горица и Гориција, како Европска престолнина на културата со преку 600 културни активности и околу 60 проекти заедно ќе ја слават заедничката историја, отворените граници и културната разновидност на регионот.
Иницијативата Европска престолнина на културата постои од 1985 година и до сега оваа титула ја понесоа 60 градови. Целта на иницијативата е да се истакне културната разноликост и културното богатство на Европа како и да се поттикне културниот развој на градовите.
Градот Скопје е избран за Европска престолнина на културата за 2028 година.
Во текот на утрешниот ден, министерот Љутков ќе учествува на состанокот на министри за култура на Западен Балкан, на кој ќе се разговара за улогата на културата, меѓународните културни проекти вклучително и европските престолнини на културата во функција на одржливиот развој.
