Македонски
Битолскиот камерен оркестар „Дива“ ќе го одржи второто издание на концертот „Цветна симфонија“ на 16 ноември од 20 часот во Филхармонијата во Скопје. По настапите во Битола и Охрид, оркестарот повторно доаѓа пред скопската публика со италијански класици, оперски арии и познати филмски теми.
Оркестарот ќе настапи во симфониски состав заедно со хорот „Гортинија“ од Гевгелија, а како гостин ќе настапи и хорот „Балтепе“ од Тетово. Ќе диригира Владимир Димовски. На сцената ќе настапат Јаворка Витанова, Виолета Арсовска и Зана Абази-Рамадани, а специјални гостинки се Наде Талевска и Билјана Талевска.
На програмата се познати композиции од филмовите „Добриот, лошиот и грдиот“ и „Гладијатор“. Посебен дел од концертот ќе биде изведбата на славниот дует „Барселона“ на Фреди Меркјури и оперската дива Монсерат Кабаље. Во Скопје ќе го изведат Наде Талевска и Бојан Стојков, во придружба на оркестарот „Дива“.
Концертот е замислен како спој на различни музички жанрови, вокални изведби и оркестарски аранжмани, со цветна сценографија. Билетите се продаваат онлајн преку платформата e-ticket.mk.
