Македонски
Во четврток на сцената на Драмскиот театар премиерно ќе биде изведена театарската претстава „Алиса се враќа дома“ која е дипломска претстава на Моника Ставревска, студентка по театарска режија на Факултетот за драмски уметности – Скопје, во класата на проф. Зоја Бузалковска.
Претставата се реализира во рамки на Годишната програма за работа на Драмскиот театар Скопје за 2026 година, како петта од вкупно седумте претстави предвидени со програмата.
Инспирирана од светот на Луис Карол и „Алиса во земјата на чудата“, „Алиса се враќа дома“ е современа антибајка за моќта, послушноста, индивидуалната одговорност и бунтот, но и за опасно краткиот пат по кој отпорот може да почне да личи на системот против кој се кренал.
Актерската екипа ја сочинуваат Соња Стамболџиоска во улогата на Алиса, Биљана Драгиќевиќ-Пројковска како Црвената Кралица, Александар Степанулески како Белиот Зајак, Златко Митрески како Чешит Мачор, Ања Митиќ како Дина, Лазар Христов како Лудиот Шапкар, Филип Трајковиќ како Гасеница, Трајанка Илиева-Вељиќ како Белата Кралица, Ангела Пејковска како Цвета, Нина Елзесер како Ружа, Ирена Димеска како Невена, а Томислав Давидовски и Марјан Наумов во улогите на Твитл Ди и Твитл Дам.
Креативниот тим го сочинуваат Ивана Смилевска – автор, Моника Ставревска – режисер, Александра Бошковска – драматург, Филип Лафазановски – асистент на режисерот, Ненад Тонкин – сценограф, Роза Трајческа – костимограф, Лука Тошев – автор на музиката и Леа Манева – продуцент.
