Македонски
За македонската фудбалска репрезентација натпреварот против Швајцарија e почеток на една нова етапа. За првпат ќе настапуваме во Б делот од лигата на Нациите, а прв ривал на домашен терен ни е четвртфиналистот од Светското првенство – Швајцарија. Ова воедно ќе биде прв натпревар на домашен терен по подолга пауза – Летонија во ноември минатата година.
Имаме одлична атмосфера, среќни сме што повторно сме заедно и подготвени сме за максимум. Очекуваме голема поддршка од навивачите, тоа многу ни значи. Играме во Скопје, ова е нашиот дом и треба да го покажеме нашиот идентитет. Многу ни значи полн стадион и свесни сме дека пред нас е тежок натпревар, изјави капитенот Енис Барди.
Еден од лидерите на репрезентацијата, Елиф Елмас, исто така очекува исклучително тежок предизвик, но верува во квалитетот и подготвеноста на македонските фудбалери.
Очекувам тежок натпревар. Играме против моќна репрезентација и четвртфиналист на Мундијалот, но ние сме подготвени и ќе излеземе по позитивен резултат. Чест ни е што младите се со нас, ги прифаќаме најдобро што можеме. За секој фудбалер е чест да го носи дресот на репрезентацијата, истакна Елмас.
Натпреварот се игра утревечер (сабота) на Националната Арена „Тодор Проески“ со почеток во 20:45 часот. Во нашата група сè уште селекциите на Словенија и Шкотска, кои играат утре во 15 часот во Љубљана.
