Свечена Архиерејска Литургија во Париз по повод Неделата на жените мироносици

Свечена Архиерејска Литургија во Париз по повод Неделата на жените мироносици
На 26 април 2026 година, во Неделата на жените мироносици, во храмот „Св. Кирил и Методиј“ при Македонската православна црковна општина во Париз, Франција, на достоинствен и молитвен начин беше одбележан овој значаен ден. По тој повод се отслужи Света Архиерејска Литургија, на која чиноначалствуваше Неговото Блаженство, Архиепископот Охридски и Македонски г.г. Стефан. Нему му сослужуваа Нивните Високопреосвештенства, Митрополитот Европски г. Пимен, Митрополитот Тетовско-гостиварски г. Јосиф, како и Неговото Преосвештенство Епископот Западноевропски г. Јустин од сестринската Српска Православна Црква, заедно со архимандритот Агатон и повеќе свештенослужители од Македонската Православна Црквa – ОA. Во текот на светата богослужба, верниот народ молитвено учествуваше во евхаристиското собрание, вознесувајќи благодарност кон Бога и прославувајќи го подвигот и верата на жените мироносици, како пример на љубов, пожртвуваност и верност кон Христос. Посебна радост на овој свечен ден беше извршувањето на чинот на осветување на новопоставениот иконостас во храмот, непосредно пред отпустот на Божествената Литургија. Иконостасот, со својата убавина и длабока духовна символика, дополнително го украсува светиот простор и ја воздигнува молитвената атмосфера. На Светата Литургија присуствуваа и амбасадорот на Република Македонија во Франција, Н.Е. Игор Николов, како и полковникот Стојановски, военото аташе во Париз.
Настанот беше збогатен и со културно-забавен дел, кој помина во дух на единство, духовна радост и заедништво, оставајќи силен впечаток кај сите присутни верници, кои со голема љубов и почит го проследија овој значаен ден за македонската православна заедница во Франција.