Македонски
Јавната установа Национален парк „Пелистер“ работно и заедно со партнерски организации и здруженија го одбележаа 30-ти Ноември, ден кога во 1948 година дел од планината Баба е прогласен за национален парк.
Националниот парк „Пелистер“ , како прв национален парк на територијата на Македонија, со алпски карактеристики, поставен меѓу долините на Пелагонија и Преспа, е формиран со закон донесен од Президиумот на Народна Република Македонија, а според Законот за заштита на природата, Јавната установа Национален парк „Пелистер“-Битола е одговорна за заштита и управување со пракот, изјави за МИА, Иванчо Тошевски, директор на таа национална установа.
– Годинава роденденот на националниот парк „Пелистер“ го одбележуваме со голема работна акција за пробивање, расчистување и уредување на планинарска и велосипедска патека. Трасираната патека ќе го поврзи селото Цапари со националниот парк „Пелистер“, таа е во должина од четири километри и висинска разлика од 500 метри, и ќе биде дел од кружен систем на велосипедски и планинарски патеки кои ги поврзауваат селата Цапари и Ротино со националниот парк „Пелистер“, истакна Тошевски.
Тимот планинари и вљубеници на планината ги уредуваат патеките од Цапарска Пресека до Цапарска Река, местото Лоша Стена каде има природен видиковец на кањонот на Цапарска Река, а на реката поставени се и два дрвени мостови. За време на престојот на планината имавме и блиска средба со мечка и две мечиња, потврди Тошевски.
– Работните активности ги извршивме со поддршка на локалното население, планинари и велосипедисти од Есктрим бајк тим (Extreme Bike Team) од Битола. Работата и дружењето ги посветивме на роденденот на Националниот парк „Пелистер“, име кое со гордост го носи нашата Установа, нагласи директорот Тошевски.
Активностите посветени на денот на прогласувањето на дел од планината Баба во Национален парк „Пелистер“, одлука донесена на 30 ноември 1948 година, продолжуваат утре во Инфоцентарот на ЈУНП „Пелистер“ со работна средба на менаџерите на четирите македонски национални паркови.
