Македонски
Гласачите во централноазиската република Киргистан денеска се повикани на гласачките места за да одлучат за составот на новиот парламент на предвремени избори, јави ДПА.
Право на глас имаат помалку од 4,3 милиони гласачи.
Според набљудувачите, новите избори првенствено имаат за цел проширување на моќта на претседателот Садир Џапаров, кој ја води земјата во сè поавторитативен правец, пренесува германската агенција.
Ќе се изберат вкупно 90 членови на парламентот. По неодамнешната реформа на изборниот систем, кандидатите сега се кандидираат само како директни кандидати, што значи дека политичките партии ќе играат мала улога.
Првичните резултати од изборите би можеле да бидат познати кратко време по завршувањето на гласањето.
Киргистан има население од околу седум милиони лица. Сегашниот парламент беше избран во 2021 година по сериозна политичка криза која предизвика насилни судири, што доведе и до оставка на тогашниот претседател Соронбај Женбеков.
Џапаров направи уставни измени. Непосредно пред изборите, беа уапсени неколку познати опозициски личности, вклучувајќи го и Кадирбек Атамбаев, син на поранешниот претседател Алмазбек Атамбаев, кој живее во егзил во Шпанија.
Тие се обвинети за обид за организирање масовни немири по изборите. Во Киргистан во минатото за време на изборите понекогаш имаше немири, потсетува ДПА.
