Македонски
Самостојната изложба на уметницата Аница Китаноска, насловена „Скаменети потези: еволуција на формата“, ќе се одржи во понеделник, 27 октомври 2025 година, во 19, 30 часот, во изложбениот простор Магаза – Битола.
Изложбата ќе ја отворат директорката на Завод и музеј – Битола, Маргарита Спасов, која ќе даде воведен збор, кустосот советник во истата установа, Наде Геневска-Брачиќ, и уметницата Љубица Мешкова Солак, членка на ДЛУМ која живее и работи во Битола.
Изложбата ја заокружува трилогијата посветена на односот меѓу мозаикот и сликарството. Таа ја истражува трансформацијата на уметничкиот гест во трајна форма, каде што традицијата се преобликува во современ израз.
Битола, со своето богато мозаично наследство, станува простор на континуитет и преобразба, точка каде што минатото и сегашноста се спојуваат во нова визуелна целина.
Во соработка со Друштвото на ликовни уметници на Македонија (ДЛУМ), НУ Завод и музеј Битола, Музеј на Град Скопје и со поддршка на Министерството за култура и туризам на Република Македонија.
Изложбата ќе биде отворена од 27 октомври до 12 ноември 2025 година.
