Македонски
Италија официјално протестираше против ослободувањето со кауција на сопственикот на швајцарски бар кој беше место на смртоносен пожар на новогодишната ноќ. Италија, исто така, го повлече својот амбасадор од Швајцарија откако судската одлука предизвика жестоки критики во двете земји, објави Ројтерс.
Жак Морети и неговата сопруга Џесика, сопственици на барот „Ле Констелашн“ во Кранс-Монтана, се под истрага за убиство од небрежност и други кривични дела во врска со пожарот во кој загинаа 40 лица, а повеќе од 100 беа повредени. Жак Морети беше уапсен на 9 јануари, но вчера беше ослободен со кауција.
Италијанската премиерка Џорџија Мелони го нарече ослободувањето на Морети „навреда за сеќавањето на жртвите од новогодишната трагедија и навреда за нивните семејства“. Шестмина од загинатите во пожарот беа италијански државјани, како и десет други кои беа повредени.
Италијанската влада во соопштението наведува дека Мелони и министерот за надворешни работи Антонио Тајани му наложиле на италијанскиот амбасадор веднаш да го контактира главниот обвинител во швајцарскиот кантон Вале за да го пренесе „силното негодување“ на Италија поради ослободувањето на Морети.
Се додава дека судот ја донел одлуката и покрај сериозноста на злосторствата за кои е обвинет, ризикот од бегство и можноста за компромитирање на доказите. „Цела Италија бара вистина и правда и повикува на преземање мерки што ќе одговорат со почит на оваа катастрофа, со целосно почитување на страдањето и очекувањата на семејството“, се вели во соопштението.
Мелони и Тајани, исто така, му наредија на амбасадорот Џан Лоренцо Корнадо да се врати во Рим за да разговара за понатамошните чекори, се вели во соопштението.
Морети е ослободен со кауција, што вклучува исплата од 200.000 швајцарски франци (околу 216.000 евра) и обврска за секојдневно јавување во полиција. Адвокатите на жртвите од пожарот и нивните семејства изјавија дека им е тешко да ја разберат одлуката на судот и додадоа дека нивните клиенти се загрижени за можното исчезнување на доказите.
Морети изразија жалење за трагедијата и рекоа дека ќе соработуваат со обвинителите. Во соопштението објавено по ослободувањето на Жак Морети, нивните адвокати рекоа дека „ќе продолжат да ги почитуваат сите барања од властите“.
