Македонски
Во Македонскиот народен театар (МНТ) започнаа пробите за претставата „Син понеделник“ од Калија Киселичка и во режија на младиот Борјан Стојков. Претставата е копродукција помеѓу „Перипетија Продукција“ и МНТ и во соработка со студиото за актерска игра „Прва проба“. Премиерата е предвидена за март 2026 година.
Проектот е резултат на повеќегодишниот истражувачки процес во рамките на проектот „TRY – Театарот ги обединува младите“, кој се фокусира на прашањето: „Што се парите и какво влијание имаат врз начинот на кој се доживуваме себеси, другите, општеството и планетата во која живееме?“
„Син понеделник“ се реализира како необичен спој помеѓу младите театарски актерки: Јана Вељановска, Ана Јовановска, Ирена Димеска и Нела Павловска и младите изведувачи: Ана Бимбилоска, Катја Велјаноска, Мина Гјаку, Саша Димитриевска, Андреа Зорзиќ, Елена Кочарева, Ана Марија Марковска, Сара Марковска, Тео Манев, Павел Николоски, Јана Рилкова и Леа Стојков.
Сценографијата ја потпишува Мартин Манев, композитор е Симон Пеоски и асистент на режија и сценски движења е Дамјан Цветановски.
Претставата ја следи кревката, но жестока транзиција на три девојки од Скопје, од адолесценција во светот на возрасните. Тие се фатени во моментот кога растењето повеќе не е избор, туку нужност. Претставата зборува за локални и современи проблеми, кои пред сѐ, се проблеми на мојата генерација, а со тоа сметам дека стануваат универзални“, вели режисерот Стојков.
Програмата „TRY – Театарот ги обединува младите“ е меѓународен проект кофинансиран од програмата Креативна Европа на ЕУ и Министерството за култура и туризам во соработка со МНТ. Во проектот учествуваат уште четири организации од Србија, Чешка, Грција и Македонија: „Eho Animato“, „Peripetija Production“, „ArtCanAct“, „Tri Groša“ и „ViceVersa“.
