Македонски
Скопје ќе биде домаќин на новата изложба на Михаил Корубин – „Артокен генеза“, што ќе се одржи на 22 октомври 2025 година во 19 часот, во галеријата на Факултетот за ликовни уметности (објект на Педагошкиот факултет).
Настанот ќе ја претстави првата „Артокенс“ книга, која ги истражува визуелните и симболичките кодови што Корубин ги развива во своето творештво. Делото е двојазично издание (македонски и англиски) и ги опфаќа основните и примарни „артокени“ — симболи што го создаваат визуелниот јазик на авторот.
„Артокените“ се замислени како спој на уметност и симболика, зборови преточени во геометрија, емоции сведени на линија, круг и движење. Во книгата се опишани правилата, синтаксата и логиката на нивното создавање – систем што функционира како визуелна граматика на современото чувство.
Михаил Корубин, магистер по ликовни уметности, е препознаен по своите концептуални истражувања и препознатливи форми. Тој има изложувано во Канада, САД, Франција и Бугарија, а неговото дело е застапено во меѓународната публикација Masters of Contemporary Fine Arts. Со своите „артокени“, Корубин отвора ново поглавје во македонската визуелна култура – каде зборот станува форма, а формата — мисла.
