Македонски
Фестивалот на „Музика од светот“ во Битола продолжува со целовечерен концерт на една од најпопуларните грчки групи „Коза Мостра“ која на публиката во битолскиот Центар за култура ќе и понуди репертоар комбиниран со балканска музичка традиција.
Групата „Коза Мостра“ од Солун постои 13 години, како претставник на Грција учествувале на Евровизија, а во 2013 година приредија концерт во античкиот театар во Охрид, изјави за МИА, во пресрет на вечерашниот концерт, Сашо Илковски, директор на НУ Центар за култура-Битола.
Нашите гости од соседна Грција вечер ќе презентираат музичка енергија содржана од традиционалното и фолклорното, дополнето со динамичен хард рок, хеви метал, ска и диско елементи. Групата „Коза Мостра“ настапувала на бројни меѓународни фестивали, а во Битола доаѓаат директно од Полска каде гостуваа на фестивал во таа држава. За нас како организатори и домаќини е чест што вечер меѓу другите, наши гости ќе бидат и амбасадорката на Грција во Македонија и конзулот на Грција во Битола“, најави Илковски.
Фестивалот на „Музика од светот“ завршува утревечер со настап на пијанистката од Русија со уметничко име Гамазда (Александра Кузнецова).
Од Гамазда очекуваме незаборавна пијано вечер. Гамазда на концертите има специфичен и уникатен стил. Таа рок класиците од 80-тите и 90-тите години ги презентира автентично и со моќен рок дух. Впрочем нејзините видеа имаат милионски прегледи на Јутјуб“, нагласи Илковски и додаде дека завршниот фестивалски концерт ќе се одржи во салата на битолскиот театар во која претпладнево подготвивме посебна сцена.
Фестивалот на „Музика од светот“ чиј домаќин и организатор е НУ Центар за култура-Битола се одржува со поддршка на Министерството за култура и Оштина Битола.
