Инфлацијата во јули падна на 2,3 отсто, пониска од просекот во еврозоната

Инфлацијата во Македонија продолжува да се намалува, покажуваат податоците на Државниот завод за статистика. Во јули годишната стапка на инфлација изнесувала 2,3 отсто, што е пониско и од просечната инфлација во еврозоната, која во истиот месец изнесувала 2,9 отсто.

Трендот на забавување на инфлацијата е забележлив во последните неколку месеци. Во април годишната стапка изнесувала 5,7 отсто, во мај паднала на 4,8 отсто, а во јуни изнесувала 3,4 отсто.

Особено значајно за домашните буџети е движењето на цените на храната и безалкохолните пијалаци. Според податоците наведени во партиското соопштение, во јули тие биле пониски за 1,1 отсто во однос на претходниот месец.

Од ВМРО-ДПМНЕ оценуваат дека намалувањето на инфлацијата е позитивен сигнал за економијата и резултат на економските политики на Владата.

„Бројките несомнено се позитивен сигнал за движењата во економијата“, велат од партијата, додавајќи дека Владата ќе продолжи да ги следи економските движења и да креира мерки насочени кон подобрување на животниот стандард на граѓаните.

Според податоците, разликата во однос на априлската стапка на инфлација е значителна – за три месеци годишната инфлација е намалена за 3,4 процентни поени.