Македонски
Матурската прослава во Сараево заврши со насилство и повредени, откако група хулигани синоќа околу 20 часот брутално нападнаа матуранти.
Како што објавија тамошните медиуми, двајца млади мажи биле повредени и пренесени на Клиничкиот центар на Универзитетот во Сараево, каде им била укажана лекарска помош.
Очевидци сведочат дека напаѓачите биле вооружени со дрвени палки и факели, и дека упаднале ненадејно во хотел додека матурантите славеле.
„Дојдоа велејќи дека сакаат да го поздрават пријателот, но одеднаш влегоа и почнаа да тепаат. Се создаде паника, сите бегавме. Никој не очекуваше вакво нешто на матурска вечер,“ изјавил еден од присутните.
Жртвите на нападот тврдат дека не ги познаваат сторителите.
Инцидентот е трет по ред насилен случај меѓу млади луѓе во Сараево во последните неколку дена, што предизвика загриженост кај јавноста и родителите.
Полицијата информираше дека е уапсен еден полнолетен и еден малолетен сторител поврзани со претходен случај. Двајцата се предадени на надлежниот обвинител од Кантоналното обвинителство на Сараево.
Надлежните најавуваат засилено полициско присуство и апелираат на смирување на тензиите, особено во период кога се одржуваат матурските прослави.
