Македонски
Црна Гора се најде на листата на Форбс за најдобри места за американските пензионери во 2026 година.
Оваа година, Форбс направи и листа на најдобри места за американските пензионери во странство, на која беше вклучена и Црна Гора, како медитеранска земја со одлични плажи и разновидна клима, значително пониски трошоци за живот отколку во САД и задоволителна здравствена заштита.
Црна Гора
Медитеранска земја со одлични плажи и разновидна клима
Локации: Подгорица, Бар, Пераст, Тиват
Трошоци за живот: Значително пониски од просекот во САД
Здравствена заштита: Задоволителна
Стекнување право на престој: Најлесен начин е со купување недвижен имот
Сместена спроти Италија, преку Јадранското Море, Црна Гора може да се пофали со исклучителни плажи, живописни планини и трошоци за живот кои се повеќе од половина од оние во САД.
Владата е стабилна, а стапката на сериозни кривични дела е ниска. Здравствената заштита се смета за задоволителна, но многу странци со специфични здравствени потреби одат во Италија или Германија на лекување. Приватното здравствено осигурување е задолжително.
Англискиот јазик го зборуваат околу две петтини од населението, пренесува Bankar.me.
Форбс ги избра 24-те најдобри земји, со 96 препорачани локации, врз основа на содржината што ја нудат, трошоците за живот, здравствената заштита, климатските ризици и ставовите кон американските пензионери. Црна Гора беше на оваа листа и минатата година.
Дорси и Ден Шмиќ сакаа поинаков живот
По 37 години брак и пред пензионирање, Дорси и Ден Шмиц беа загрижени за политичката ситуација во Соединетите Американски Држави, но и за сопствените финансии. Тие поседуваа голема куќа на 31 хектар во Бланшард, рурален град во Мичиген без ниту еден семафор, со население од 3.100 жители, на околу еден час возење северно од Гранд Рапидс.
Трошоците за живот таму се за 20 проценти пониски од американскиот просек, но тие сакаа поинаков начин на живот, за кој не беа сигурни дека можат да си го дозволат во САД. Дополнително, како меѓурасна двојка со либерални ставови, не им се допадна многу од она што го забележаа во националните политички случувања.
„Не можевме да го најдеме животот што го сакавме во САД“, вели 63-годишниот Ден, поранешен менаџер за операции во телекомуникациската индустрија.
Двојката размислуваше да се пресели во Португалија, Грција, Франција и Тајланд – земји кои се наоѓаат на листата на Форбс за најдобри места за пензионирање во странство во 2026 година. Сепак, Тајланд беше премногу влажен, вели Ден, додека другите земји не нудеа комбинација од ниски цени, половина од оние во САД, и атмосферата што ја најдоа во друга земја на оваа листа – Албанија.
Тоа е мала медитеранска земја со 2,4 милиони жители, која се ослободи од комунистичката власт дури во 1992 година.
Затоа се преселија во април во Валона, крајбрежен град со 78.000 жители, каде што плаќаат само 1.100 долари месечно за стан со три спални соби во близина на шеталиштето Лунгомаре. Лунгомаре е жива променада, долга приближно пет километри покрај Јадранското Море, полна со кафулиња.
Едногодишната туристичка виза им дава доволно време да ја запознаат околината и да одлучат дали сакаат да аплицираат за подолг престој.
Тие се дел од сè поизразен тренд: сè повеќе Американци се пензионираат во странство во потрага по пониски трошоци, поинаков начин на живот и, честопати, попријатна политичка атмосфера.
Според најновите официјални податоци, кои се однесуваат на крајот на 2024 година, 712.000 Американци добиле бенефиции од системот за социјално осигурување во странство, што е раст од 20 проценти за 13 години. Истражувањата, сепак, покажуваат дека многу повеќе луѓе сега сериозно размислуваат за таква можност.
Тоа е голем чекор, кој бара обемно истражување, флексибилност и одредена доза на авантуристички дух. Затоа многу потенцијални емигранти прво посетуваат одредено место како туристи или поминуваат краток временски период таму.
За да им помогне на оние кои размислуваат да се преселат во странство да го направат првиот чекор, Форбс избра 96 атрактивни места за пензионери во 24 земји на пет континенти. Половина од овие земји, 12 од нив, се наоѓаат во Европа.
Две земји беа вклучени на листата за прв пат: Маврициус и Виетнам, единствената земја на листата што е сè уште комунистичка.
Една од земјите на оваа листа каде што е најтешко да се добие постојан престој е Канада. Во согласност со политиката што беше воведена пред тензиите со администрацијата на американскиот претседател Доналд Трамп и насочена кон ограничување на трошоците на јавниот здравствен систем, Канада им отежнува на пензионерите кои немаат семејни врски со земјата трајно да се преселат.
Сепак, Канада остана на листата бидејќи неодамна значително ја прошири дефиницијата за семејни врски. „Големиот бел север“ им овозможува и на другите Американци да поминат шест месеци годишно во земјата, иако се препорачува приватно здравствено осигурување.
Трошоците за живот во Канада се само малку пониски отколку во САД, па затоа оваа опција е главно наменета за побогати пензионери кои можат да издржуваат две домаќинства.
