Македонски
Мексиканската претседателка Клаудија Шајнбаум изјави дека одлуката на нејзиниот американски колега Доналд Трамп да не применува реципрочни царински мерки за Мексико е „нешто добро“ за нејзината земја.
Тоа е добро за Мексико, рече Шајнбаум на прес-конференција.
Претседателката додаде дека ваквата одлука е резултат на добрите односи што нејзината влада ги изградила со американската администрација.
Мексико ја поздрави одлуката на Трамп да не воведе нови царини во земјата покрај веќе објавените за автомобили, челик и алуминиум, за кои, како што беше речено, земјата ќе ги бара најдобрите можни услови за примена.
Мексико, земјата која е првиот трговски партнер на САД, е дел од земјите во кои Трамп не воведе таканаречени реципрочни царини.
Оваа одлука значи одржување на договорот за слободна трговија. Нашата цел во следните 40 дена е да ги добиеме најдобрите услови во светот за автомобилската индустрија, како и за челик и алуминиум, додаде министерот за економија Марсело Ебрард, оценувајќи го потегот како голем успех.
Компанијата „Стелантис“ денеска објави двонеделно затворање на фабриката за автомобили „Крајслер“ во Канада и предвиде „паузи“ во производството во своите мексикански погони.
Мексико има 37 фабрики за автомобили на својата територија, вклучувајќи ги и оние на Ауди, БМВ, Форд, Хјундаи, Хонда, Мазда, Нисан, Стелантис, Тојота и Волксваген, наведе Мексиканската асоцијација на автомобилската индустрија.
Мексико е петти светски извозник на лесни возила, четврти светски извозник на резервни делови и прв снабдувач во САД, соопшти оваа асоцијација.
