Македонски
Конфедерацијата на слободни синдикати (КСС) нема да учествува на утрешниот синдикален протест по повод 1 Мај. Смета дека во земјава има добар социјален дијалог и организирано синдикално движење, како и дека проблемите секогаш се решаваат на маса.
Според претседателот на КСС, Благоја Ралповски, и без репрезентативни синдикати, на ниво на грански синдикати се разговарало со Владата која покажала подготвеност од 1 мај да почне повторно и поголемо зголемување на платите во јавниот сектор, но, зошто тоа нема да се случи, треба, оцени, да кажат оние што утре ќе протестираат.
-Утре ќе бидам дома со семејството. Оваа, како и претходната година кога ги повикавме сите пратенички групи да го дадат своето размислување во делот на програмите, да ветат пред нас, сакаме да ги решаваме проблемите низ дијалог. Всушност, секогаш решавањето на проблемите на крајот доаѓа на маса, низ социјален дијалог. Сега велиме дека имаме добар социјален дијалог и затоа на ваков начин го одбележуваме 1 Мај. Кога ќе почувствуваме дека ќе бидат загрозени нашите права или ќе бидеме дискриминирани, тогаш, бидете сигурни, нема да го чекаме 1 Мај, туку веднаш ќе излеземе на протест, дециден е претседателот на КСС, одговорајќи на новинарски прашања по конференцијата „Работничките права во време на промени: Заедно кон праведна транзиција и ефикасна администрација“.
Тој потенцира дека КСС секогаш излегувала на протест кога за тоа ќе почувствувала дека има потреба.
-Во Македонија има синдикално движење и секогаш низ годините кога ќе сме почувствувале потреба, сме излегувале на протест. Тоа сме го докажале, независно дали се работело за протест или штрајк. Каде го гледаме добриот социјален дијалог? И без репрезентативни синдикати, на ниво на грански синдикати, разговаравме повторно со Владата и имаше спремност од нејзина страна од 1 мај да почне повторно и поголемо зголемување на платите во јавниот сектор, но сега ќе ги прашате оние што излегуваат утре на протест зошто одбиваат да се согласат и зошто вработените од 1 мај повторно нема да земат зголемување на платите во министерствата, агенциите и управите, подвлече Ралповски.
Според него, одговорноста за хаосот што настана во одредени институции со неисплаќањето плати, треба да се бара во оние што ги водат тие институции.
Ралповски информира дека на конференцијата се дискутира за законите за работни односи и за административни службеници, како и за влијанието на дигитализација врз работниците.
-Се направи тотален хаос со Законот за административни службеници, и во однос на мерит системот, и во однос на образованието, но и платите падна на пониско ниво. Требаше да се гасат пожари во делот на порамнувањето на платите во јавниот сектор, истакна Ралповски.
Универзитетскиот професор Лазар Јовевски во однос на репрезентативноста на синдикатите изрази уверување дека тоа прашање ќе биде апсолвирано многу скоро и дека потоа ќе резултира со квалитетен социјален дијалог.
-Досега оние неколку средби на Економско-социјалниот совет покажаа дека Владата, но и социјалните партнери искрено постапуваат. Премиерот беше присутен и активно учествуваше во разговорите, покажа високо ниво на отвореност, соработка и транспрентнсот што социјалните пратнери го нотираа каков нов приод, нов бран, нова позитивна промена и тоа треба да продолжи, изјави Јовевски.
Професорот смета дека постои различен приод во утврдувањето и покачувањето на платите во јавниот сектор, што доведе, како што оцени, до какафонија. Тоа треба да се надмине и треба, порача, да се стави ред во системот на плати во јавниот сектор.
-Системот на платите во јавниот сектор е уреден како и досега. Ова е затекната ситуација со која се соочуваме се обидуваме да ја надминеме. Постои, би рекол, различен приод во утврдувањето и покачувањето на платите поради недостиг на одредено системско, пред се законско решение. Ако такво решение постоеше, ќе имавме унифициран систем, но сега системот се темели на колективните договори и на одредени интерни акти на одредени институции или органи кои во рамки на социјалниот дијалог ги креираат политиките на плати и затоа гледаме една какафонија. одреденеи институции договориле покаќување на плати,д руги немат, некаде се применуваат општите акти, од Општиот колективен договор, некаде има грански колективни договори. Навистина, има систем на различност кој треба да се надмине. Треба да се стави ред во системот на плати во јавниот сектор кој би требало да почива на одредени законски решенија, унифицирани за целиот јавен сектор, а потоа определени сектори во рамки на јавниот сектор да имаа додатоци на плати кои ќе валоризираат зголемен обем на работа, поголема оптовареност на административни службеници кои работата и во иста институција, но на различни места во државата. Обемот на работа во Скопје и во некој друг град е поинаков и тоа секако треба да се валоризира и да се реши, објасни професорот.
Утрешниот синдикален протест го квалификува како легитимно право на ССМ.
-Но, треба на сите да им биде јасно дека на крајот, и оние што протестираат и оние што разговараат и оние што критикуваат, ќе треба да седнат на маса како социјални партнери. Тоа е единствениот легитимен, демократски и зрел начин за да се решат проблемите во државата, подвлече Јовевски.
