Констатирана е состојба на хаос во рудниците за јаглен во Битола, затоа што воопшто не се водело сметка отстранувањето на јаловинските маси да се врши согласно главниот и дополнителниот проект, а како последица на тоа, нема откривки на јаглен од кои може да се обезбеди континуиран и безбеден ископ за потребите на термоблоковите, истакна Зоран Коњановски, директор за производство и член на УО на АД ЕСМ.

Коњановски нагласи дека во претстојната грејна сезона, новите раководства на АД ЕСМ и на РЕК Битола влегуваат со извршена сеопфатна анализа на актуелните состојби во рударско енергетските комбинати.

Претходните раководства на АД ЕСМ, на РЕК Битола не ги подготвувале капацитетите во пресрет на грејната сезона. Утврдено е дека нема доволно количини на јаглен, а затекнатиот јаглен на депониите е со исклучително лош квалитет. Веднаш консултиравме професори од Рударскиот факултет при Универзитетот „Гоце Делчев“ во Штип кои наскоро ќе излезат со констатирани забелешки за работата на рудниците во комбинатот со насоки во однос на понатамошната експлоатација на јаловината и на јагленот. При увид на теренот, од реномираните експерти се споделени впечатоци дека ископите во постојните рудници при РЕК Битола се вршени спротивно на проектната документација, посочи Коњановски.

Во изјава за медиумите, Коњановски истакна дека во моментов, користејќи ги сите ресурси што комбинатите ги имаат на располагање, направена е реорганизација во однос на капацитетите во рудниците, со цел во најкус можен рок да се обезбеди фронт за ископ на квалитетен јаглен.

Обезбедивме многу поповолни финансиски услови за набавка на квалитетен јаглен од веќе постоечки договор за набавка на овој енергент од увоз, со што  овозможивме одлични предуслови за реализација на планираните производни количини на електрична енергија за оваа грејна сезона.  Сакам  да истакнам, рече Коњановски, дека за разлика од претходните набавки на јаглен, за сите идни набавки на овој енергент, тогаш кога ќе има потреба, особен акцент ќе се даде на квалитетот.

Од АД ЕСМ информираа дека имаат докази дека изминативе неколку години се увезувал јаглен со катастрофален квалитет, со специфики кои се во спротивност со пропишаните за работа на термоелектраните. Тоа предизвикало хаварии на блоковите поради кои ЕСМ издвојувале милионски суми за санација.

Ние имаме одговорност за заштита на животната средина и здравјето на граѓаните, но истовремено и одговорност да ги сочуваме  термоелектраните - како материјално и национално добро. За сите неправилности кои продуцирале недомаќинско и неодговорно однесување, АД ЕСМ ги разгледува можностите од покренување на кривична и дисциплинска постапка кон раководни лица што директно влијаеле на затекнатите состојби во битолскиот рударско енергетски комбинат, најави Коњановски за време на денешната посета на РЕК Битола.

Во моментов, ремонтните активности во блок 2 во РЕК Битола се завршени и тој е веќе на мрежа, додека ремонтот на ТЕ Битола 3 е завршен во согласност со планот. Зафатот на ТЕ Битола 1 се уште не е ни започнат.

The post Коњановски: Се купувал исклучително лош јаглен за РЕК, начекавме хаос во рудниците appeared first on Република.

Управниот одбор на АД ЕСМ денеска именуваше нови директори во дел од термоенергетските производствени капацитети во рамките на компанијата.

За директор на подружница РЕК Битола е назначен Тони Петрушевски, дипломиран машински инженер, со претходно работно искуство во приватниот сектор. Досегашниот в.д. директор Иле Костадиновски е назначен за помошник директор за правни, кадровски и општи работи во РЕК Битола. Од АД ЕСМ велат дека му се заблагодаруваат за неговиот ангажман и посветеност во изминатиот период.

За директор на РЕК Осломеј, е назначен Сашо Вренцоски, дипломиран економист и истакнат стручен кадар со долгогодишно работно искуство во комбинатот. На директорска позиција во Осломеј е именуван и Агим Садику, дипломиран економист со работно искуство во Управата за јавни приходи.

За в.д. директор на подружницата ТЕЦ Неготино, е назначен Александар Галапчев, дипломиран инженер со работно искуство во термоелектраната. Бобан Максимовски, со завршени академски студии од областа на менаџмент ќе биде управител на друштвото за производство на топлинска енергија ЕСМ производство на топлина.

The post ЕСМ именува нови директори во РЕК Битола, Осломеј и во ТЕЦ Неготино appeared first on Република.

Премиерот Христијан Мицкоски денеска најави дека многу скоро ќе биде назначено ново раководство на ЕСМ и на РЕК Битола.

Во изјава за медиумите дадена при денешната посета на Битола, Мицкоски рече дека лично е фокусиран во изборот на кадри за овие две институции.

Лично сум фокусирам во изборот на кадри во РЕК Битола бидејќи го знам комбинатот и го знам поранешно ЕЛЕМ, денешно ЕСМ, така што многу скоро од денеска ќе имаме ново раководство во рамки на ЕСМ и во рамки на РЕК Битола, рече Мицкоски.

Во однос на изградбата на топловодот за Битола, Мицкоски изјави дека топловодот ќе биде изграден и дека нема да биде затворен РЕК Битола бидејќи без неговата работа не може да функционира топловодот.

Имаме план како тоа да го реализираме. Топловодот ќе се изгради и ќе се пушти во употреба. Имаме намера сето она што тие го потпишале, а кое е штетно за битолчани, да го поништиме и да вложуваме во иднината на овој регион. Нема да водиме лицимерна политика - од една страна да го затвораме РЕК Битола и да оставаме илјадници луѓе на улица, а од друга страна да трошиме повторно пари на граѓаните и да градиме топловод којшто кога би се затворил РЕК Битола, ќе нема ресурси од каде да се затоплува Битола. Ќе го сочуваме РЕК Битола и ќе го изградиме топловодот, рече Мицкоски.

The post Мицкоски: Наскоро ново раководство на ЕСМ и РЕК Битола, лично сум фокусиран во изборот на кадри appeared first on Република.

Врз основа на документ кој го поседуваме, а е интерен документ од државната ЕСМ, поранешно ЕЛЕМ, каде што ова раководство на ЕСМ кое е пред одење и пред катастрофален пораз на избори, се обидува во последен момент на потпише годишен договор за набавка на увозен јаглен во вредност од близу 100 милиони евра, односно 5 милијарди и 950 милиони денари, изјави претседателот на ВМРО-ДПМНЕ, Христијан Мицкоски од Охрид одговарајќи на новинарско прашање во врска со тоа на што се базира објавениот скандал за јаглен во РЕК Битола.

Мицкоски ги предупреди вработени да не подлегнуваат на притисоците од раководството и од СДС и ДУИ и да не дозволат да се крадат народот и државата.

Затоа јас ја користам оваа прилика да ги предупредам вработените, луѓето од термоелектраната во Битола да не подлегнуваат под притисоците на неколкумината од раководството и да потпишуваат документи со кои ќе го опљачкаат народот, со кои ќе ја пљачкаат Македонија, за сметка на малкумина од врхушката од СДС и ДУИ и малкумина луѓе кои се дел од менаџментот на ЕСМ, поранешно ЕЛЕМ, рече Мицкоски.

Мицкоски потенцираше дека тие кои го планираат овој скандал имаат намера со ситен аванс да ги наполнат куферите и да избегаат после 8 мај, како и тоа дека ќе има одговорност, а тој лично ќе се занимава со скандалот по формирањето на владата.

Сите оние кои ќе бидат соучесници во овој процес, но и оној другиот близу 3 милијарди денари, односно близу 50 милиони евра со вклучен ДДВ за ископ на јаглен и јаловина кој се подготвува за омилената компанија на раководството на СДС и ДУИ и малкумина од менаџментот на ЕСМ; сите оние кои ќе бидат дел од овој процес, ќе бидат соучесници и ќе одговараат. Лично ќе се занимавам по формирањето на новата влада со овој случај. Затоа ги предупредувам да не влегуваат во авантура со која ќе овозможат на малкумина ситни политички криминалци од раководството на СДС и ДУИ да ги наполнат куферите, а после дебаклот на 8 мај да избегаат. Нема каде да бегаат, нема каде да се кријат, секаде ќе ги најдеме, ова е порака до нив, изјави Мицкоски.

Мицкоски нагласи дека овој народ доста беше пљачкан, редно време е да добие народна влада, да ја вратиме довербата во институциите и Македонија да се развива онака како заслужува.

The post Имаме документ дека раководството на ЕСМ пред одење се обидува да потпише штетен годишен договор за РЕК Битола appeared first on Република.

Државната комисија за спречување на корупција (ДКСК) утврдила состојби од кои произлегуваат сомнежи за несовесно работење, искористување и злоупотреба на службена положба и овластување од страна на поранешни раководни лица на АД ЕСМ Скопје и од други службени лица вработени во АД ЕСМ. Сомнежите се за даночно затајување преку дампинг практики, трансфер на цени на штета на буџетот на АД ЕСМ и Буџетот.

ДКСК на денешната 99-та седница донесе одлука претходната иницијартива до ОЈО ГОКК да се дополни и истата да биде доставена и до РКЕ, Комисијата за заштита на конкуренција, УЈП и Управата за финансиска полиција.

Членот на ДКСК, Горан Трпеноски рече дека ова произлегло по предметот оформен по сопствена иницијатива по јавно изнесени наводи за сомнеж за незаконска набавки на мазут од АД ЕСМ за потребите на ТЕЦ Неготино за време на енергетската криза.

Затоа ова е дополнение на иницијативата за мазутот, ова е за продажбата на домашните вишоци на струја. По доставената документација пред ДКСК се отворија сомнежи за несоодветно планирање на производство на електрична енергија од страна на АД ЕСМ со што резултира остварување корист од други приватни субјекти. Со други зборови, ДКСК се сомнева дека производството резултира со обезбедување корист на приватни трговски конзументи преку дампинг пракса и трансфер на цената на електричната енергија на начин така што врз Буџетот се создава штета по основ на евазија на данок на добивка и данок на ДДВ, заради трансферната цена на товар на ЕСМ, со загуба поради несоодветно планирање на производството на електрична енергија, појасни Трпеновски.

Затоа, рече Трпеновски, предлагам претходната иницијатива да се дополни со одлука:

- ДКСК утврди состојби од кои произлегуваат сомнежи за несовесно работење, искористување и злоупотреба на службена положба и овластување од страна на поранешни раководни лица на АД ЕСМ Скопје и од други службени лица вработени во АД ЕСМ, на начин така што се отвораат сомнежи за даночно затајување преку дампинг практики, трансфер на цени на штета на Буџетот на АД ЕСМ и Буџетот. Затоа предлагам да се дополни иницијативата до ОЈО ГОКК за сите инволвирани во случајот, потоа да се достави и до сите институции кои имаат надлежност, како што е РКЕ, Комисијата за заштита на конкуренција, УЈП и Управата за финансиска полиција, изјави Трпеновски.

ДКСК, исто така, препорачува до Владата, Министерството за животна средина и просторно планирање и Министерството за економија да се разгледаат и да се усогласи законската регулатива од областа на енергетиката која целосно ја игнорира заштитата на животната средина.

Претседателката на ДКСК Билјана Ивановска, рече дека анализата произлегува од предмет отворен по новинарски текст „Мали хидроцентрали, големи тајни“ кој се однесува на субвенциите кои се исплаќаат за произведена електрична енергија по повластена тарифа од малите хидроцентрали.

- Во периодот кога требал да се подготви и донесе Законот за енергетика за претставници на Владата биле назначени министерот Крешник Бектеши, заменик министерот за економија Кире Наумов, за повереници биле назначени Зоран Павлевски, државен секретар во Министерство за економија и Исмаил Лума, раководител во секторот за министерство, но, иако немал овластување во целиот процес учествувал и заменикот на претседателот на Владата задолжен за економски прашања во тој период Кочо Анѓушев, изјави Ивановска.

Со тоа, според Ивановска, на некој начин може да се каже дека при донесување на Законот за енергетика, како што рече, има ризици дека преовладувал личниот интерес над јавниот интерес, имајќи предвид дека истото во тој период службено лице се бавело и со фирми кои учествувале на пазарот на струја.

Сите слабости во националната регулатива од областа на енергетиката (како немање обврска на инвеститорот да обезбеди елаборат за заштита на животната средина или формирање на Фонд за заштита на животната срдина), а кои се утврдени во анализата, Ивановска посочи дека ќе бидат сумирани и доставени до надлежните институции.

The post Антикорупциска со нови наводи до Обвинителство за поранешното раководство на АД ЕСМ appeared first on Република.

Владата го задолжи АД ЕСМ да започне преговори за потенцијален стратешки инвеститор и можна соработка за реализација на проекти за изградба на гасно – водородни централи во Битола и во Неготино, информира владината прес-служба во соопштение по денешната седница на Владата.

На седницата донесена е Одлука за почнување процес за трансформација на производството на електрична енергија со гасно-водородни централи.

Владата ја разгледа и усвои Информацијата од Министерството за економија за потребата од иницирање проекти за изградба на регионална 800MW гаснo – водородна централа Неготино и 250 – 300MW гасно – водородна централа Битола. Задолжено е АД ЕСМ да отпочне преговори за потенцијален стратешки инвеститор и можна соработка за реализација на проекти за гасно – водородни централи Битола и Неготино), согласно Законот за стратешки инвестиции, информираат од Владата.

The post АД ЕСМ ќе бара стратешки инвеститор за гасно-водородни централи во Битола и во Неготино appeared first on Република.

АД ЕСМ почнува со подготвителни активности за санација на цевководот на мостот „Беласица“ во Скопје и уверува дека цевководот ќе биде целосно функционален и ќе се обезбеди непрекинато парно греење за граѓаните на Град Скопје. Согласно законската обврска на 15 октомври, како што велат од компанијата, радијаторите ќе бидат топли, граѓаните да бидат спокојни, парно ќе има.

Во текот на изминатите недели, АД ЕСМ активно работи на решение за проблемот со цевководот кај мостот Беласица, кој е од суштинска важност за парното греење во Град Скопје. Успешно беа отстранети оштетените цевки и донесени се нови. Бидејќи мостот е под надлежност на Град Скопје, АД ЕСМ е во постојана комуникација со нив и се бара заедничко решение за санирање на овој проблем, поосочуваат од АД ЕСМ.

Нагласуваат дека поставувањето на новите цевки е комплексна активност и бара сериозна посветеност и работа и додаваат дека ќе се вложат максимални напори за санацијата да заврши во најкус можен рок.

Додека траат активностите за поставувањето на новите цевки ќе се користи алтернативниот вод на железничкиот мост кој има капацитет да се врши континуирана испорака на топлинска енергија до потрошувачите, велат од ЕСМ.

Потсетуваат дека минатата грејна сезона кога сите кренаа раце и избегаа од одговорност, АД ЕСМ по задолжение од Владата го презеде и овој товар.

Доколку АД ЕСМ не ја менаџираше кризата со топлинска енергија во градот Скопје, иако се работи за комунална дејност и обврска на општините, тогаш граѓаните во градот Скопје ќе се грееја на струја и можеби ќе крахираше електроенергетскиот систем во целата држава, порачуваат од компанијата.

The post АД ЕСМ: Почнуваме со подготвителни активности за санација на цевководот на мостот „Беласица“ appeared first on Република.

СДС од ЕСМ направија претпријатие на кое му требаат константно приливи за одржување на ликвидноста, во моменти кога во цел свет енергетските претпријатија нижат огромни добивки, вели Марија Митева портпарол и член на ИК на ВМРО-ДПМНЕ, одговарајќи на новинарско прашање како го коментираат новиот заем на ЕСМ од 100 милиони евра.

Митева посочи дека пукнале сите балони со лаги дека ЕСМ работи одлично изминатиот период.

Пукнаа сите балони со лаги за одличната работа на ЕСМ. Самиот факт што ЕСМ има потреба од ликвидност, говори дека 7 години СДС води погрешни политики.

Митева праша дали овие 100 милиони евра заем на ЕС треба да завршат во нечии џебови преку разни тендери и до кога ЕСМ ќе служи за богатење на поединци на власта наместо за производство на струја.

Дали и овие 100 милиони треба да завршат во нечии џебови преку тендери за разни набавки, а граѓаните се тие кои треба да го враќаат тој заем, со камати? До кога ЕСМ ќе служи за богатење на поединци од власта, наместо за производство на струја, праша Митева.

The post ЕСМ повторно се задолжува: Дали овие 100 милиони евра заем на треба да завршат во нечии џебови преку разни тендери? appeared first on Република.

АД ЕСМ ја достави до ЕВН Хоум понудата за купопродажна цена на електрична енергија од 53 евра за мегават-час за покривање на 100 проценти од вкупно планираните количини. Како што информираат од ЕВН Хоум, оваа цена е за околу 5,35 отсто пониска од цената добиена на последниот тендер.

За новата цена на електричната енергија, која треба да стапи во сила од 1 јули, деновиве ќе одлучува Регулаторната комисија за енергетика, а таа ќе зависи од повеќе влезни параметри, меѓу кои најважна е токму цената на струјата од домашното производство, односно од ЕСМ.

На тендерот понуда пристигнала само од АД ЕСМ, а на претходниот, тие понудија купопродажна цена од 56 евра за мегават-час.

The post ЕСМ понуди слична цена на струја како досега appeared first on Република.

Почетокот на активностите за санација на опожарениот топловод е поврзан со завршување на сите дејствија и проверки на состојбата на мостот од страна на вклучените релевантни институции и компании. ЕСМ Дистрибуција на топлина ќе вложи максимални напори отстранувањето на опожарениот топловод на мостот да се заврши во најкраток можен рок, информираат од компанијата.

[caption id="" align="alignnone" width="1071"] (фото: ЕСМ)[/caption]

Од ЕСМ потенцираат дека и покрај опожарувањето на мостот Беласица, во следната грејна сезона која почнува во октомври 2023 ќе има сигурна и непрекината испорака на топлинска енергија до сите потрошувачи приклучени на дистрибутивната мрежа.

Претходно, професор Михаил Гаревски, директор на Институтот за земјотресно инженерство и инженерска сеизмологија (ИЗИИС) изјави за ТВ 24 дека прерано е да се каже дека мостот ќе биде пуптен во употреба следната недела. Според него, пуштањето на мостот во најголема мера ќе зависи од ЕСМ, односно од демонтирањето на цевките за парно греење.

Без вадењето на цевките не може да се направи ниту, да кажеме, примарна санација, рече Гаревски.

Експертизата која сè уште не е завршена, и се очекува да биде готова идниот понеделник, во моментов покажува дека сепак нема да има потреба од зајакнување на мостот, но сигурно е, според него, дека мостот не може и не смее да се пушти во употреба толку скоро.

„Откако ќе се направи санација, обично по правило би требало бетонот да зрее 28 дена, а потоа треба да се направи пробно товарење како доказ дека мостот е во ред. Тоа товарење на мостот ќе биде со 60-тонски возила. Ќе се направи тоа испитување, што е стандардна процедура, особено кога некој мост е опожарен, па дури потоа тоа може да се пушти мостот“, вели Гаревски.

Градоначалничката Арсовска изјави дека на мостот ќе треба да се направи одредена санација која се однесува на козметичко рефреширање на она што е паднато од бетонот.

https://republika.mk/vesti/skopje/arsovska-mostot-belasitsa-mozhebi-od-narednata-nedela-ke-mozhe-da-bide-pushten-vo-upotreba/

„Во суштина, нема ништо кое што влијае на стабилноста, сигурноста и безбедноста на мостот и тоа е она што е најважно за нас. Денеска ми јавија дека се готови со сите испитувања кои се направени и дека мостот „Беласица“ ќе се санира многу брзо. Сметам дека веќе од наредната недела ќе можеме да го пуштиме во употреба“, изјави градоначалничката на Град Скопје.

Пожарот на мостот „Беласица“ избувна ноќта меѓу 11 и 12 мај, запалена беше електричната инсталација и системот за парно греење кој поминува под мостот.

The post Гаревски реален: Нема шанси мостот „Беласица“ да се пушти во употреба наредната недела appeared first on Република.

Шокантна беше сликата за прв пат видена не само во Македонија, мислам и пошироко со коктел да се одбележи крајот на грејната сезона и со благодарници. Прво со неверување го примив сето тоа, но кога продолжив да ги гледам прилозите, сфатив дека навистина тоа се случило, дека премиерот наместо да пушта или отпочнува проект, тој приредува коктел затоа што ја завршиле грејната сезона, изјави претседателот на ВМРО-ДПМНЕ, Христијан Мицкоски за време на неговата посета во градско одговарајќи на новинарско прашање за коктел забавата со која власта одбележа крај на грејна сезона.

Мицкоски потенцираше дека кога мислиме дека го допреле дното тие копаат уште подлабоко надоле и можат да одат подлабоко и којзнае што шокантно може да ни приредат овие неколку месеци додека се уште се влада.

Работата е алармантна, повеќе од 200 милиони евра пари на граѓаните по пат на трансфери од буџетот беа префрлени во АД ЕСМ, поранешно ЕЛЕМ за да може едвај да ги задоволи потребите на стопанството и граѓаните со електрична енергија и затоплување. Бизнис заедницата едвај крај со крај врзува, едвај успева да обезбеди средства да исплати плати за вработените кои така ги хранат своите семејства затоа што не добија никаква помош и поддршка од владата за справување со енергетската криза. Беа оставени сами на себе, истакна Мицкоски.

Тој посочи дека добра вест е што доаѓа одговорна влада набргу од сега, која знае како да го реструктуира енергетскиот сектор, а потоа да овозможи на стопанството правилно да се развива и да обезбеди енергенс со кој ќе може да се развиваат и да додаваат додадена вредност на своите производи и да обезбедуваат навремена плата, така вработените ќе ги задржиме дома.

The post Мицкоски: ЕСМ ја мина грејната сезона со 200 милиони евра помош од државата, а Ковачевски прави коктел како да пушта проект appeared first on Република.

Во просториите на АД ЕСМ се одржа чинот на примопредавање на должноста генерален директор. Новоименуваниот генерален директор Васко Стефанов ја презеде функцијата од досегашниот генерален директор Васко Ковачевски.

Во срдечна атмосфера, си посакаа многу успех и ефикасно справување со предизвиците што претстојат.

Чест ми е што сум именуван за нов генерален директор на АД ЕСМ. Денес имав продуктивна средба со досегашниот генерален директор Васко Ковачевски. ЕСМ ќе продолжи  посветено и транспарентно да се подготвува за следната грејна сезона“ - изјави генералниот директор Стефанов.

Васко Стефанов е новиот генерален директор на АД ЕСМ, откако досегашниот директор Васко Ковачевски ја депонираше својата оставка. Надзорниот одбор на АД ЕСМ ја констатираше оставката на Васко Ковачевски од должноста член и претседател на Управен одбор, со назив генерален директор, а за нов член и претседател на Управниот одбор и генерален директор на АД ЕСМ, по препорака на Владата, го избра Васко Стефанов.

Стефанов, на новата позиција доаѓа со претходно искуство од АД Водостопанство и АД Пошти на РСМ, каде што бил генерален директор.

The post Стефанов ја презеде функцијата генерален директор на АД ЕСМ appeared first on Република.

Директорот на АД ЕСМ Васко Ковачевски од лични причини поднел оставка од функцијата и на негово место на следната владина седница ќе биде назначен, Васко Стефанов.

Информацијата ја потврди премиерот Димитар Ковачевски на денешната прес-конференција во Владата посветена на годишниот извештај на АД ЕСМ.

Сакам лично да му се заблагодарам затоа што целото свое знаење и труд и време ги вложи во менаџирањето на компанијата во една исклучително тешка и деликатна ситуација која произлезе од енергетската криза, рече премиерот Ковачевски.

За одлуката на директорот на АД ЕСМ, премиерот рече дека разговарале уште во текот на минатата година и дека утрово усно, а утре и писмено, ќе биде доставена оставката која ќе биде констатирана на следната владина седница.

Генералниот директор на АД ЕСМ, како што изјави, останува да работи во компанијата.

Вработен сум во АД ЕСМ. Прво ќе го земам одморот од 20 дена, а потоа по проценка на новиот менаџмент на ЕСМ и министрите ќе процениме каде ќе биде моето место во компанијата. Она што го протежирам е да се посветам пред се на семејството, односно на моите две деца кои имаат потреба од мене за иден раст и развој односно доообразование, истакна Ковачевски.

Во однос на тоа дали е задоволен колку успешно менаџирал со компанијата, Ковачевски рече дека бројките во делот на производството и во делот на финансиите се најдобра потврда за тоа.

Убеден сум дека пред се како држава, а потоа и како компанија, успешно ја изменаџиравме кризата, рече тој.

Ковачевски во јули 2019 година беше избран за претседател на Управниот одбор и за генерален директор на АД ЕСМ. На функцијата дојде од местото директор на РЕК „Битола“ каде што беше назначен во јануари 2018 година.

Ковачевски е дипломиран инженер по термоенергетика. Тој е поранешен советник во Советот на општина Битола во периодот од 2013 до 2014 година, како и пратеник во Собранието во два мандата од 2014 до 2016 година и од 2016 до 2017 година.

Поради пензионирање од АД ЕСМ ќе замине и Добрила Стефанова, а на нејзно место за нов член на Управниот одбор и директор на финансии ќе биде назначена Марија Пејкова.

The post Васко Ковачевски од лични причини се повлекува од директорското место, Стефанов доаѓа на чело на ЕСМ appeared first on Република.

АД ЕСМ донесе одлука за избор на набавувач на природен гас за месец март 2023г за потребите на топланите Исток, Запад, Енергетика и Скопје Север, како и за други стопански субјекти кои се снабдуваат преку ЕСМ Продажба. Природниот гас за март ќе се набави по цена од 60,10е/MWh, а добавувач ќе биде фирмата Макпетрол, соопштија од АД ЕСМ.

Имено, на јавниот повик кој траеше од 21-24 февруари 2023г и кој беше достапен за сите домашни и странски компании регистрирани за дејноста, се бараше испорака на 1200 MWh до 2380 MWh количини гас дневно. На повикот пристигнаа три понуди.
Конечните финансиски понуди, без ДДВ, изразени во фиксни цени како што се бараше во повикот, беа следните:
1. Макпетрол АД – Скопје понуди крајна фиксна цена од 60,10 е/MWh
2. Balkan Utilities од Р. Бугарија понуди крајна фиксна цена од 67 е/MWh и
3. Actael од Р. Бугарија понуди крајна фиксна цена од 78 е/MWh

-Со оглед на тоа што најниска фиксна цена понуди фирмата Макпетрол, донесена е одлука за избор на Макпетрол за добавувач на природен гас за март.

Ние тоа го поздравуваме и го поддржуваме фактот што Макпетрол одлучи да учествува на повикот, да достави понуда со фиксна цена, и да достави најповолна понуда. Во интерес и на државата е домашна компанија да снабдува со природен гас во толку значајни количини, капиталот да останува тука, и добивката да ја дели со своите вработени и акционери.
ЕСМ Продажба и во овој трет по ред јавен повик ги задржа истите услови кои претходно беа критикувани од одредени медиумски субјекти. Тоа што се смени е токму однесувањето на Макпетрол кој овој пат одлучи да даде понуда која ги исполнува условите на повикот и да не бара менување на условите како што и одговара на оваа компанија, изјави директорот на АД ЕСМ, Васко Ковачевски.

Додаде дека, во јануари и февруари некоректно се тврдеше дека ЕСМ Продажба бара фиксна цена за да фаворизира некоја фирма, односно за да го оневозможи друга фирма да конкурира, и дека тоа нанесувало штета на државата и на граѓаните.

ЕСМ Продажба во изминатите месеци повеќе пати го повикуваше Макпетрол, и јавно и директно, да учествува и да поднесе понуда и на претходните повици. Но, наместо тоа, тоа што се обидуваше да го направи оваа фирма и нејзините медиумски поддржувачи беше да се обидат да ги сменат условите за јавна набавка на една државна компанија за да удоволат на една приватна фирма. Се вршеше невиден и непримерен притисок кој не остана незабележан, и кај најголем дел од јавноста наиде на неодобрување.
Овде сакаме да потенцираме уште еден факт.
Имено, како носител на набавката за природен гас за месец март, сегашниот добавувач ќе обезбеди и гаранција, што е услов во јавниот повик, како што имаше обезбедено гаранција и претходниот добавувач. И бевме напаѓани од неговите медиумски поддржувачи, токму на темата гаранција.
Во изминатите два месеца неоправдано беа прозивани и обвинувани и АД ЕСМ, и највисоките државни и владини претставници за некакви заговори против домашната фирма и фаворизирање странски фирми. Одлуката за месец март најдобро ги демантира сите тие инсинуации.
Се испостави дека не биле пречка законите и подзаконските регулативи, не биле проблем фиксните цени, не биле проблем гаранциите, не биле проблем условите поставени да важат подеднакво за сите. Бидејќи кога некој ќе сака да се однесува пазарно и фер, тоа и го прави.
Ние останавме доследни, го испочитувавме законот и поширокиот интерес, а останува да видиме дали одредени субјекти ќе имаат доблест да се извинат за своето јавно однесување во изминатиот период, за кое беа сведоци сите граѓани.
Како државни институции, професионално е задоволството и сознанието дека реалната либерализација на пазарот од 1 јануари доведе до конкуренција на пазарот со снабдување со природен гас, што очигледно резултира со намалување на цените и ставање крај на плаќањето одредена цена диктирана од постоењето на само една понуда, соопштија од компанијата.

The post Во март „Макпетрол“ ќе нѐ снабдува со гас, фирмата понуди најниска цена од 60,10 евра за мгвч., капиталот останува дома, велат од АД ЕСМ appeared first on Република.

Сакајќи да го прикрие сопственото неуспешно работење и неспособноста во управување на АД ЕСМ, генералниот директор на АД ЕСМ Васко Ковачевски  сака да ја префрли вината на други, велат од Комисијата за енергетика на ВМРО-ДПМНЕ. Изјавата на Ковачевски се однесува за период што ги опфаќа двете раководни гарнитури, на ВМРО-ДПМНЕ и на СДСМ. Спорот со германската фирма, како што велат од ВМРО-ДПМНЕ, го губи токму тој.

Имено, тој пред новинарите во петокот на 10.2.2023 година изјавува дека за раскинат договор меѓу германска фирма и ЕСМ тужени сме за 28 милиони евра за ремонт.

Договорот е склучен во 2012 година е раскинат во 2016 година, од страна на тогашното раководство на ЕСМ. По тој договор е направен ремонт на блоковите 2 и 3. Според образложението за раскинувањето на договорот, тој еднострано е раскинат од ЕСМ затоа што не биле добри перформансите на извршениот ремонт. Германската компанија понудила споодба, да се приближат ставовите, но тоа не е постигнато. Чесно е да кажеме дека овој спор ќе го загубиме само прашање е колку тимот на адвокати ќе успее да го намали бараниот износ од 28 милиони евра – изјави Ковачевски.

Сакаме  да го корегираме Ковачевски да не дава паушални искази за кои постојат и докази. Најодговорно тврдиме дека преговорите за спогодба кои се случија пред да се активира арбитражниот суд,  се одвиваа уште пред  СДСМ да го преземе раководењето на АД ЕСМ, кое се случи на 4.8 2017 година. Тие преговори продолжија и после  овој датум, но сега под водство на раководната гарнитиура на СДСМ. Овие преговори за спогодба со германскиот изведувач ги изгуби токму Васко Ковачевски и тоа минатата година. И тоа во услови кога има документи од германскиот изведувач кои се  потврдени од независни надворешни консултанти дека бараните параметри за котлите не се постигнати и тоа по вина на самиот изведувач.

Зошто АД ЕСМ под  водство на Васко Ковачевски ги изгуби овие преговори  и спогодби пред арбитражниот суд кога претходното раководство на АД ЕСМ предводено од ВМРО-ДПМНЕ му остави сигурни позиции со аргументи за неисполнети технички параметри за ремонтираните котли и оправдани барања од АД ЕЛЕМ за наплата на штети?  Котел 2 и 3 имаат полоши технички карактеристики од колку пред модернизацијата. На изведувачот од Германија  не му е одобрено да работи на модернизација на котел 1 сè додека не се изврши поправка на неисполнетите барани технички параметри на котлите од блок 2 и блок 3.

Наместо да ја замајува јавноста со лаги и  небулози  за некаква штета од 28 милиони евра, требало да се погрижи почната постапка од ВМРО-ДПМНЕ да ја доврши со цел АД ЕСМ да нема никакви загуби, стои во реакцијата на ВМРО-ДПМНЕ на изјавата на Ковачевски.

The post ВМРО-ДПМНЕ: Ковачевски ги загуби преговорите поради кои германска компанија не тужи за 28 милиони евра appeared first on Република.

АД ЕСМ на 03.12.2022 година произведe 12.797 MWh електрична енергија, со што целосно ги задоволи потребите на домаќинствата и малите потрошувачи.

Во Термоелектраните произведени се 8.472 MWh, а во хидроелектраните и во Ветерниот парк Богданци произведени се 4.325 MWh.

Во изминатото деноноќие преку ЕСМ Продажба набавени се 3.940 MWh електрична енергија. Тоа е електрична енергија наменета за болници, градинки, училишта, јавни претпријатија, капацитети од прехранбената индустрија и објекти од виталната инфраструктура во државата.

* Податоците се преземени од Диспечерски извештај на АД ЕСМ за 03.12.2022 година.

The post Вчера произведeни 12.797 MWh електрична енергија appeared first on Република.

За 23 дена во ноември АД ЕСМ (поранешно АД ЕЛЕМ) потрошило околу 23.000.000 евра за увоз на струја, посочи претседателот на ВМРО-ДПМНЕ Христијан Мицкоски, додавајќи дека дневно се трошеле по 1.000.000 евра само за увоз на струја.

Да ги видиме фактите!

1. За периодот од 7ми до 13ти ноември увезени се вкупно 16.800MWh струја по вкупна цена од 3.614.440€.
2. За периодот од 14ти до 20ти ноември увезени се вкупно 21.770MWh струја по вкупна цена од 5.414.528€.
3. За ден 18ти ноември увезени се вкупно 3.600MWh струја по вкупна цена од 904.075€.
4. За периодот од 21ви до 27ми ноември увезени се вкупно 32.060MWh струја по вкупна цена од 8.009.093€.
5. За периодот од 28ми до 30ти ноември увезени се вкупно 13.740MWh струја по вкупна цена од 4.918.933€.

За само 23 дена во ноември увезени се 87.970MWh струја за вкупна цена од 22.861.069€ или просечно секој MWh увезена струја граѓаните на Македонија го плаќале околу 260€.
Незнаењето и корупцијата продолжуваат и во првите 4 дена во Декември. За периодот од 1ви до 4ти декември АД ЕСМ ќе увезе нови 23.240MWh струја и истите ќе ги плати АВАНСНО (слика 1)!. Оваа набавка, граѓаните ќе ги чини за само 4 дена околу 8.000.000€ или просечно нови 2.000.000€ дневно.
Авансно плаќаат со народни пари за авансно да добијат провизии. Одговорност ќе има!!!, порача Мицкоски.

The post Во ноември АД ЕСМ дневно трошеле по милион евра само за увоз на струја appeared first on Република.

Од електроенергетскиот систем ноческа околу полноќ е исклучен Блок 1 на РЕК Битола. Се работи за планско исклучување заради санација на кондензаторот и на дел од цевководниот систем во постројката. Преземени се сите чекори со цел интервенцијата да биде кратка и ефикасна и в понеделник блокот повторно да биде на мрежа, соопшти АД ЕСМ​.

Исклучувањето на блокот е планирано за време на викендот заради вообичаено намалениот конзум на електрична енергија во овој период од седмицата.

Електричната енергија од Блок 1 на РЕК Битола, АД ЕСМ ќе ја надомести со зголемување на производството во останатите свои постројки, како и со набавката на струја за која компанијата има веќе склучен договор до 20 ноември.

The post Блок 1 на РЕК Битола во краткотраен прекин appeared first on Република.

АД Скопје Север одби да го потпише договорот за соработка, на нив паѓа одговорноста за прекин на греењето во Чаир и Бутел.

АД ЕСМ нема правен основ да му дава директни субвенции на АД Скопје Север, но може да помогне само преку договор за деловно техничка соработка кој приватниот субјект одбива да го потпише. Доколку АД Скопје Север не сака да ги прифати истите услови кои важат за сите други субјекти кои испорачуваа топлинска енергија за над 58 илјади потрошувачи, одговорноста за прекин на греењето на 500 потрошувачи кои ги снабдува во општините Чаир и Бутел паѓа исклучиво на АД Скопје Север, порачуваат од ЕСМ.

АД Скопје Север одби да го потпише договорот, затоа што овој субјект бара неповратни средства, односно смета дека треба да му се исплати финансиска помош која не треба да ја врати, иако АД ЕСМ истите средства ги должи кон државниот буџет. Скопје Север побарува субвенционирање директно од АД ЕСМ, кое нашата компанија ниту има правен основ, ниту смее да го прави, односно смее да постапува исклучиво по задолжението од Владата и во рамките на одобрениот договор од страна на Владата, велат од ЕСМ.

Нагласуваат дека Владата на 94-та седница донесе Заклучоци со кои го задолжи АД ЕСМ да склучи договор за деловно техничка соработка за грејна сезона 2022/2023 година , со иста содржина како и договорот склучен за 2021/22 година, со кој ќе се регулираат сите права и обврски на Друштвото Скопје Север АД Скопје.

Со Договорот се предвидува АД ЕСМ да му помогне на приватниот субјект АД Скопје Север со средства од државниот буџет во набавката на гас за потребите на испорачување греење кон дел од корисниците на градот Скопје. Средствата треба да бидат обезбедени со гаранција од страна на АД Скопје Север, прецизираат од ЕСМ.

После потпишување на договорот и после правењето на пресметки за цената за топлинската енергија кои треба да се достават во Влада и да се побараат субвенциите за грејната сезона 2022/23, додаваат, АД Скопје Север ќе ги добие субвенциите, исто како и топланите Исток, Запад и Енергетика.

Од примените субвенции и од остварената наплата од потрошувачите, АД Скопје Север ќе треба да ги врати средствата кон АД ЕСМ, примени како помош со договорот, прецизираат од ЕСМ.

The post ЕСМ: АД Скопје Север одби да го потпише договорот за соработка, на нив паѓа одговорноста за Чаир и Бутел appeared first on Република.

АД ЕСМ нема правен основ да му дава директни субвенции на АД Скопје Север, но може да помогне само преку договор за деловно техничка соработка кој приватниот субјект одбива да го потпише. Доколку АД Скопје Север не сака да ги прифати истите услови кои важат за сите други субјекти кои испорачуваа топлинска енергија за над 58 илјади потрошувачи, одговорноста за прекин на греењето на 500 потрошувачи кои ги снабдува во општините Чаир и Бутел паѓа исклучиво на АД Скопје Север, порачуваат од ЕСМ.

АД Скопје Север одби да го потпише договорот, затоа што овој субјект бара неповратни средства, односно смета дека треба да му се исплати финансиска помош која не треба да ја врати, иако АД ЕСМ истите средства ги должи кон државниот буџет. Скопје Север побарува субвенционирање директно од АД ЕСМ, кое нашата компанија ниту има правен основ, ниту смее да го прави, односно смее да постапува исклучиво по задолжението од Владата и во рамките на одобрениот договор од страна на Владата, велат од ЕСМ.

Нагласуваат дека Владата на 94-та седница донесе Заклучоци со кои го задолжи АД ЕСМ да склучи договор за деловно техничка соработка за грејна сезона 2022/2023 година , со иста содржина како и договорот склучен за 2021/22 година, со кој ќе се регулираат сите права и обврски на Друштвото Скопје Север АД Скопје.

Со Договорот се предвидува АД ЕСМ да му помогне на приватниот субјект АД Скопје Север со средства од државниот буџет во набавката на гас за потребите на испорачување греење кон дел од корисниците на градот Скопје. Средствата треба да бидат обезбедени со гаранција од страна на АД Скопје Север, прецизираат од ЕСМ.

После потпишување на договорот и после правењето на пресметки за цената за топлинската енергија кои треба да се достават во Влада и да се побараат субвенциите за грејната сезона 2022/23, додаваат, АД Скопје Север ќе ги добие субвенциите, исто како и топланите Исток, Запад и Енергетика.

Од примените субвенции и од остварената наплата од потрошувачите, АД Скопје Север ќе треба да ги врати средствата кон АД ЕСМ, примени како помош со договорот, прецизираат од ЕСМ.

The post ЕСМ: АД Скопје Север одби да го потпише договорот за соработка, на нив паѓа одговорноста за прекин на греењето во Чаир и Бутел appeared first on Република.