Македонски
Во рамките на свечената манифестација „Спортисти на годината 2025“ министерот за спорт, Борко Ристовски, уште еднаш ја потврди поддршката за македонските спортисти од страна на државата.
-Спортистите се нашите најдобри амбасадори. Ветувам дека сите пречки ќе бидат совладани и спортот ќе го ставиме на вистинска патека. Успесите и развојот во овие неполни две години се должат на поддршката од Владата и Министерството за спорт. Напорно продолжуваме да работиме на подобрување на спортската инфраструктура и поддршка за врвниот спорт и најуспешните македонски спортисти. Со измените во законот ја исправивме долгогодишната неправда и им оддадовме признание на нашите најдобри спортисти кои изминатите 20 години ја претставуваа Македонија во Европа и во светот. Тие треба да се пример за 500 наши стипендисти кои вечерва се овде со нас, истакна Ристовски.
Министерот им упати порака на сите наши спортисти, никогаш да не се откажуваат и да веруваат во себе, затоа што, како што рече, тоа е патот до успехот.
На свеченоста во Национална опера и балет – Скопје, присуства и премиерот Христијан Мицкоски, како и голем број гости од јавниот живот.
