Македонски
Македонската фудбалска репрезентација вечерва на „Планет Груп“ арената во Гент ќе го одржи последниот тренинг пред одигрувањето на квалификацискиот дуел против селекцијата на Белгија кој е на програмата утре со почеток во 20 :45 часот.
Македонската репрезентација е лидер на табелата во квалификациската група со бод повеќе од Белгија против која на првиот натпревар во Скопје одигра нерешено 1-1.
„Белгијците сега знаат против кого играат. Сметам дека тие сега ќе имаат поголем респект кон нас. Мислам дека притисокот е врз нив. Ние секој натпревар го играме исто, се подготвуваме на ист начин. Нормално е како тече циклусот да се зголемува и притисокот, но треба да го тргнеме на страна и да одиграме како што знаеме и да обидеме да стигнеме до добар резултат“, изјави репрезентативниот напаѓач Александар Трајковски.
Влогот за двете репрезентации е голем, бидејќи победникот од утрешниот дуел ширум ќе ги отвори вратите за пласман на Мундијалот идната година во САД, Мексико и Канада.
„Мислам дека ова ќе биде добар натпревар и дека нема да им биде лесно ниту на нив. Како што доаѓа крајот на квалификациите притисокот расте, исто е за нив и за нас. Ова ќе биде една од поважните средби која може да го реши патот во финишот на циклусот. Белгија без разлика на генерацијата, секогаш е силна, произведува добри играчи и не случајно е таму каде што е“, посочи Трајковски
