Македонски
Камерниот оркестар „Профундис“ синоќа во Македонската филхармонија одржа спектакуларен концерт на кој како солист настапи српскиот виолончелист Петар Пејчиќ, под диригентство на Ѓурѓица Дашиќ.
Концертот го организираше НУ „Охридско лето“ во рамки на оф-програмата на фестивалот, која годинава првпат се претставува пред скопската публика.
Концертот ќе се одржи во препознатливата candlelight атмосфера, под светлината на илјадници свеќи – амбиент кој ширум светот прерасна во современ симбол за интимно, емотивно и визуелно импресивно музичко искуство. Овој уникатен концепт, кој обединува минимална светлина и максимална музичка експресија, овозможува слушателот да се фокусира на секој звук, секој здив на инструментите и секоја суптилна динамика што ја создава ансамблот, соопшти организаторот на концертот.
За диригентката на „Профундис“, Ѓурѓица Дашиќ е чест што „Охридско лето“ токму на „Профундис“ му ја довери премиерата на оф-програмата во Скопје.
Верувам дека овој концерт е посебен не само по атмосферата, туку и по начинот на кој музиката прозвучи – искрено, концентрирано и со длабока намера. Нашата цел е да создадеме простор каде звукот и светлината се во совршен дијалог, а публиката да ја почувствува онаа тивка, но моќна магија што ја прави музиката неповторлива, рече Дашиќ.
Ексклузивен гостин-солист на концертот на овој камерен оркестар беше Петар Пејчиќ од Србија, еден од најперспективните млади европски уметници, финалист на престижниот натпревар „Кралица Елизабета“ и солист кој веќе настапува со водечките европски оркестри. Пејиќ со својот настап ја воодушеви публиката во салата која неколкупати со стоечки аплауз и извици „браво“ ги поздравуваше неговите настапи. Се врати три пати на бис и со тоа покажа колку и самиот уживаше во вечерта.
Публиката имаше можност да ужива во внимателно селектирана програма што ги спојува контемплативната минималистичка естетика на Филип Глас преку свитата од филмот „The Hours“, драматичната експресивност и виртуозност на Поперовата Унгарска рапсодија оп. 68, како и елеганцијата, духовитоста и романтичната длабочина на Чајковски и неговите рококо варијации – создавајќи заедно музичка целина исполнета со динамика, суптилна емоција и беспрекорна артистичност, идеална за свечениот candlelight амбиент.
Овој концерт беше исклучителна можност скопската публика да го почувствува уметничкиот идентитет на „Профундис“ – оркестар кој со континуирана посветеност, автентичност и висок квалитет го гради своето место на македонската и регионалната музичка сцена.
