Македонски
Во Кучково денеска и утре ќе се одржи првото издание на фестивалот за електронска музика „Кора“. Организаторите најавуваат два дена танцување, дружење и слушање добра музика под отворено небо.
Фестивалот е организиран од скопскиот клуб „Минус Еден“, а ќе собере околу 30 локални, регионални и интернационални артисти. Како што е најавено, меѓу интернационалните имиња што ќе настапат на „Кора“ се Matrixxman, Legowelt, Object Blue, Interstellar Funk и Adriana Lopez. Регионалната сцена ја претставуваат Невена Јеремиќ, Little Lu, Sev-Dah и UnDoo, додека од домашната сцена настапуваат Stojche Cvetanovski, Herzel Live, Андреј Мицајков, Душко Јаневски, Васо, Nashasya Kish, DJ Chvare, Diah, Бодан Јамакоски, L.O.V.D., Double G, Ivana Dragsiq, DJ UX, Daphunk, Iman Yam, Dejan Dex, Chrisot, Martina Peneva, Martin Vojdanovski, Tomi Bojadzi, Shef Shef и Egorius.
Фестивалот е замислен како отворен простор за современата електронска сцена, без строги жанровски рамки, со фокус на внимателна селекција, моќен звук и различни пристапи кон современа електронска музика. Програмата се движи од сурово и хипнотичко техно, преку електро и необични синт линии, до прекршени ритми, експериментални форми и слоевити музички текстури, наведуваат од „Минус Еден“.
„Кора“ е поддржан од Општина Ѓорче Петров.
