Македонски
Израелскиот премиер Бенјамин Нетанјаху изрази надеж дека преостанатите заложници во Појасот Газа наскоро ќе бидат ослободени.
На прагот сме на големо достигнување, рече Нетанјаху во видео обраќање.
Меѓутоа, тоа сè уште не е апсолутно сигурно.
Се надевам дека, со Божја помош, ќе можеме да ве информираме во наредните денови, уште за време на фестивалот „Сукот“, за враќањето на сите наши заложници, додаде тој во обраќањето.
„Сукот“, своевиден есенски фестивал на жетвата, почнува во понеделник вечер и завршува на 13 октомври.
Израел досега успеа да врати 207 од киднапираните на 7 октомври 2023 година, а постигна и други воени цели, рече Нетанјаху.
Тој тврди дека израелската офанзива во градот Газа создала услови за ослободување на преостанатите 48 заложници, од кои Израел верува дека 20 се уште се живи.
Во првата фаза, исламистичката терористичка организација ќе ги предаде сите заложници. Истовремено, израелската армија ќе се препозиционира, но ќе продолжи да ги контролира стратешки важните области длабоко во Појасот Газа, рече Нетанјаху.
Израел и САД се решени да ги ограничат индиректните преговори со Хамас на само неколку дена.
Во втората фаза, Хамас потоа ќе биде разоружан, а Појасот Газа демилитаризиран, објави израелскиот премиер.
Ова може да се постигне или дипломатски, во согласност со мировниот план на Трамп, или преку воени средства.
Ќе се постигне или на лесниот или на потешкиот начин – но ќе се случи, рече тој, повторувајќи слични коментари што ги даде неодамна на заедничката прес-конференција со Трамп.
Нетанјаху додаде дека паралелно со ова, „координирал дипломатска иницијатива со (американскиот претседател Доналд) Трамп со која се менува ситуацијата за 180 степени“.
Наместо Израел да биде изолиран, Хамас е изолиран, изјави Нетанјаху, додавајќи дека Хамас сега се согласил со планот на Трамп под воен и дипломатски притисок.
Нетанјаху изјави дека му наложил на израелскиот преговарачки тим да отпатува во Египет за да ги финализира деталите за ослободувањето на заложниците.
Хамас се согласи со делови од планот на Трамп, но не го прифатил експлицитно барањето за положување на оружјето, потсетува германската агенција.
