Македонски
Германскиот канцелар Фридрих Мерц изјави дека ќе направи сè што е во негова моќ за да се осигура дека гасоводот „Северен тек 2“ нема повторно да биде пуштен во употреба, објави денеска бриселскиот портал „Политико“.
Мерц рече дека тоа ќе „ја ослабне воената машинерија на Москва и ќе го отвори патот за преговори“.
Бриселскиот портал потсетува дека Мерц неодамна, на заедничка прес-конференција со украинскиот претседател Володимир Зеленски во Берлин, истакна дека тогаш ќе може да се постигне крај на војната, „бидејќи армијата во Русија нема да биде толку силна или добро финансирана од руската влада“.
Еден од двата гасоводи „Северен тек 2“ е сè уште во функција и покрај експлозијата во 2022 година.
Експлозијата во септември 2022 година, која ги прекина испораките на гас, останува под истрага, иако извештаите ја поврзуваат експлозијата со украински државјани.
Гасоводот „Северн тек“ долго време е извор на тензии меѓу Германија и Украина, при што украинските претставници тврдат дека купувањето евтин руски гас од страна на Германија го охрабрило рускиот претседател Владимир Путин и помогнало во финансирањето на воената машинерија на Москва.
Некои германски политичари, вклучувајќи ги и оние од конзервативната Христијанско-демократска унија на Мерц, вклучувајќи го и премиерот на Саксонија, Михаел Кречмер, инсистираа на рестартирање на гасоводот „Северн тек“ за подобрување на дипломатските односи со Москва и намалување на цените на енергијата во Германија во услови на економска стагнација, наведе бриселскиот портал.
Гасоводите „Северн тек“, што претходно транспортираа гас од Русија до Германија преку цевководи под Балтичкото Море, беа кренати во воздух во очигледен чин на саботажа на крајот од 2022 година.
Оттогаш, некои германски политичари го поддржаа рестартирањето на протокот на природен гас.
Владата на канцеларот Фридрих Мерц истражува правни опции, вклучувајќи и засилени мерки за проверка на инвестициите, за да спречи какви било идни обиди за реактивирање на гасоводот „Северн тек“ што ги поврзува Германија и Русија, објави во петокот „Фајненшл тајмс“.
Берлин разгледува законски измени во своите закони за проверка на инвестициите за да ги опфати промените во сопственоста што би можеле да доведат до реактивирање на гасоводот „Северен тек“, а како одговор на прашањата од пратениците на Зелената партија, Министерството за економија ги потврди тековните дискусии за потенцијалните измени во законот.
Според германскиот закон, Берлин може да ги блокира промените во сопственоста што вклучуваат инвеститори надвор од ЕУ во клучна инфраструктура ако трансакцијата се смета за „закана за јавниот ред или безбедноста на Германија“.
Мешутоа, бидејќи компанијата што управува со гасоводот „Северен тек“ е со седиште во Швајцарија, која е дел од Европската асоцијација за слободна трговија, преземањето нема да биде предмет на преглед на инвестициите според сегашните правила, се наведува во него.
Без законски измени, улогата на Германија би била ограничена на издавање технички сертификати доколку се случи реактивирање на гасоводот, но нема овластување поинаку да го блокира.
„Фајненшл тајмс“ во март објави дека Москва ангажирала близок пријател на рускиот претседател да ги рестартира испораките на гас за Европа преку „Северен тек“, со поддршка на американски инвеститори.
Американскиот инвеститор Стивен Линч, кој го истражува реактивирањето на гасоводот „Северен тек“, се сретна со претставници на германското Министерство за економија на 6 мај, објави германскиот весник „Цајт“.
Меѓутоа, како одговор на прашање од пратениците на Зелените, германското министерство изјави дека не е одржан состанок на високо ниво и дека тоа било само рутинска размена на информации со луѓе кои имаат експертиза во ова прашање.
Добро информиран извор изјавил дека инвеститорот верува оти Европа на крајот би можела повторно да купува руски гас и тврдел дека само еден гасовод ќе треба да се обнови за да се задоволи европската побарувачка за овој енергенс.
