Македонски
Со силното мото „Заедно можеме, заедно сме посилни!“, денес, на 14 јуни 2025 година, во амфитеатарот на Медицинскиот факултет во Скопје, успешно се одржа првата секција наменета за медицински сестри и техничари од областа на нефрологија, дијализа и трансплантација.
Настанот се одвиваше под покровителство на Универзитетската клиника за нефрологија, секција на медицински сестри во нефрологија дијализа и трансплантација и во соработка со сите дијализни центри низ земјата: Диаверум, Д.МЕД и Нефроплус.
Оваа значајна средба имаше за цел размена на знаење, искуство и новитети, фокусирана кон унапредување на квалитетот на живот на пациентите, но и кон професионален развој, мотивација и поддршка на медицинскиот персонал. Медицинските сестри и техничари беа едногласни во ставот дека вакви настани се потребни и дека ќе продолжат да се организираат во иднина – во уште поголеми размери.
Присутните истакнаа дека ова не е само стручен настан, туку и поттик за заедништво, напредок и мотивација. Преку споделување на практични искуства и иновативни пристапи, се трасира патот кон поефикасно справување со предизвиците во нефролошката пракса.
Грижата за пациентот започнува токму од нас – обединети, подготвени и посилни од кога било,“ беше една од пораките што најгласно одекна во текот на денот.
Настанот претставува важен чекор напред во унапредувањето на сестринството и нефролошката пракса во Република Македонија.
