Македонски
Во Белгија денеска се одржува генерален штрајк, поради што се откажани сите летови од белгиските аеродроми, редуциран е јавниот превоз и не работат јавната администрација, државната пошта, училиштата и комуналните служби, како затворските чувари.
Штрајкот е во организација на неколку белгиски синдикати, како резултат на незадоволство од најавените реформи и економска политика на новата Федерална влада на Белгија.
Согласно Коалицискиот договор за формирање на Владата, постигнат на 31 јануари, меѓу другото се предвидува намалување на буџетските трошоци за 23 милијарди евра во следните пет години, како и реформи во даночната политика, зголемување на старосната граница за пензионирање и намалување на средствата за социјалната заштита.
Во рамки на штрајкот се најавени и протестни маршеви на кои се очекува учество на неколку десетици илјади лица. Само на протестот во Брисел се очекуваат околу 60.000 демонстранти.
Кон генералниот штрајк се приклучија и контролорите на летање, поради што воздушниот простор над Белгија е затворен од 06:45 до 22:15 часот, па авионите што минуваат над белгиска територија летаат на висина од над 7.500 метри и ги опслужуваат од контролите на летање од соседните земји.
Откажани се сите летови кон и од бриселските аеродроми „Брисел-Завентем“ и „Брисел Југ-Шарлроа“, како и од аеродромите во Антверпен, Остенде и Лиеж.
Бриселското градско сообраќајно претпријатие СТИБ соопшти дека очекува „сериозни нарушувања“ на јавниот превоз во Брисел, поради целосен прекин на сообраќањето на некои метро, трамвајски и автобуски линии и редуцирање на останатите.
Редуцирање на автобуските и трамвајските услуги се најавени и во Фландрија, додека во Валонија целосно се откажани неколку линии на јавниот превоз.
Оние кои доцнат на работа или на училиште поради штрајкот може да побараат потврда за првичните за доцнење преку веб-страниците на јавните сообраќајни претпријатија.
За разлика од патниот превоз, возовите ќе сообраќаат нормално, бидејќи железничарите решија да не прекинат со работа за да им овозможат на штрајкувачите од целата земја да допатуваат на протестот во Брисел. Белгиската железница СНЦБ соопшти дека се очекува зголемен обем на патници на линиите од и кон Брисел, па најави можност и за зголемување на бројот на возови што ќе сообраќаат.
Покрај поради штрајкот, ограничувања на движењето во Брисел има и поради состанокот на министрите за одбрана на НАТО, почетокот на фестивалот „Брајт“ и фудбалскиот натпревар во рамките на Лига Европа меѓу локалниот Унион Сен Жилоаз и холандскиот Ајакс на стадионот „Крал Бодуен“ (поранешен „Хејсел“).
Размислете за работење од дома, патување со воз или автомобил или користење на друго превозно средство, порача бриселската полиција.
