Македонски
Унгарија сè поцврсто се позиционира на европската карта на современите технологии со проширувањето на фабриката за цивилни дронови на компанијата „ABZ Innovation“.
Во новиот производствен капацитет се инвестирани седум милиони евра, а со проширувањето производството треба да се зголеми на околу 2.000 дронови годишно при работа во една смена. Доколку фабриката работи во две смени, капацитетот би можел да достигне и до 3.500 летала годишно.
Од компанијата велат дека станува збор за еден од најголемите производствени капацитети за цивилни дронови во Европа. Инвестицијата е поддржана од американскиот фонд „Assembly Ventures“, германскиот „Vsquared Ventures“ и унгарскиот „Day One Capital“.
Дроновите произведени во Унгарија се користат во земјоделството за прецизно прскање, сеење и распрскување ѓубрива, но и за индустриско чистење и транспорт на товар. Производите на компанијата веќе се извезуваат во повеќе од 40 земји, а најголеми пазари се САД и Европа.
Проширувањето на фабриката има и пошироко значење за европската индустрија, бидејќи треба да придонесе за намалување на зависноста од дронови и компоненти произведени во Кина.
Од „ABZ Innovation“ очекуваат побарувачката за ваквата технологија дополнително да расте, особено во земјоделството и индустријата, каде што дроновите сè почесто преземаат задачи што досега бараа повеќе работна сила, време и финансиски средства.
