Руски напад го оштети еден од најголемите стадиони во Украина, има повредени

Еден од најголемите фудбалски стадиони во Украина, „Чорноморец“ во Одеса, беше оштетен во руски напад, при што има и повредени лица. Нападот се случил вчера попладне, околу 15 часот по локално време. Според украинските власти, во нападот е оштетен стадионот кој има капацитет од повеќе од 34.000 гледачи и се наоѓа во центарот на Одеса, во паркот „Шевченко“. Оштетени се покривот, прозорците и трибините, а при експлозијата била оштетена и дел од носечката конструкција на објектот. Во близина на стадионот избувнал и помал пожар на сувата трева, кој брзо бил изгаснат.

Гувернерот на Одеската област, Олех Кипер, потврди дека во нападот била повредена 29-годишна жена, која добила медицинска помош. Други извештаи наведуваат дека вкупно биле повредени две лица, најверојатно вработени на стадионот.

Нападот се случи само еден ден пред планираниот натпревар меѓу „Чорноморец“ и „Колос“, кој требаше да се одигра на стадионот на 8 август. Поради оштетувањата, натпреварот е одложен.

„Чорноморец“ е еден од најпознатите украински стадиони и домашен терен на фудбалскиот клуб од Одеса. Објектот редовно се користи за натпревари од украинската Премиер лига, а на него настапувала и украинската репрезентација.