На церемонија организирана од Регионалниот фонд за предизвици во Скопје, Комисијата за избор одлучи да ги финансира двата најуспешни проекти од Македонија. Фондот поддржан од Германија и Швајцарија неодамна ги објави добитниците во третиот круг на неговата програма која обезбедува грантови за стручно образование и обука (СОО) заедно со претпријатијата и установите за стручно образование и обука (УСОО)  од регионот на Западен Балкан.

Комплетна листа на добитниците е достапна овде.

Регионалниот фонд за предизвици (RCF) го зголемува одржливиот конкурентски капацитет на бизнисите во Западен Балкан 6 на пат кон единствениот пазар на ЕУ со финансирање на  VET установите и адресирање на потребите за вештини во соработка со компаниите.

„Во три отворени повици до сега, RCF ангажирал 7,13 милиони евра за поддршка на вкупно 16 проекти за стручно образование и обука од Македонија, со 85 партнерски претпријатија. Остануваме посветени на придонесот кон економскиот раст на земјата со надградба на вештините и знаењата на младите за да произведеме работоспособна работна сила што е потребна на компаниите“, рече г-дин Мориц Реме, директор за Косово и Македонија, KfW.

Тој спомена некои од активностите што веќе се имплементирани во земјата, како што се обуки за ментори за учење преку работа кои доаѓаат од партнерските претпријатија.

„Обуките беа организирани за потребите на четири проекти од Скопје, Тетово, Виница и Богданци и нивните партнерски претпријатија. Обуките се одржаа онлајн и на лице место во Стопанската комора на Македонија и резултираа со четириесет и четири вработени кои стекнаа вредни знаења за менторство и практична примена на вештини потребни за обезбедување соодветна насока, совети и повратни информации на учениците во програмите за учење преку работа“, додаде Реме.

На третиот повик, пристигнаа 155 изјави на интерес од земјите на Западен Балкан, од кои 25 беа од Македонија. Комисијата за избор одлучи да ги финансира двата најуспешни проекти од Македонија со вкупен износ од 951,905 евра. Овие средства ќе се искористат за подобрување на инфраструктурата на образовните установи и за обезбедување обука на учесниците во програмата за кооперативно образование.

Регионалниот фонд за предизвици беше создаден по иницијатива на Германската банка за развој, а средствата произлегуваат од Германското федерално министерство за економска соработка и развој (BMZ), со кофинансирање од Владата на Швајцарија.

Петра Дрекслер, амбасадорката на Сојузна Република Германија во Македонија зборуваше за потребата на усогласување на образовниот систем и потребата за работна сила во приватниот сектор: „Тука настапува Регионалниот фонд за предизвици - работејќи како поврзувач помеѓу образовните институции и потребите на приватниот сектор. Токму затоа потребни се измени во образониот систем и образовните програми што изискува меѓусебна соработка на сите заинтересирани страни. “

По повод интернационалниот ден на Девојките во ИКТ амбасадорката истакна: „Не треба да им честитаме на девојките туку на сите нам како општествени чинители бидејќи препознавме дека економски развој не е возможен без нивната стручност и нивните способности“.

Во 2022 година, Швајцарската Влада покажа интерес за финансирање на РЦФ, со обезбедување на 10 милиони евра за финансирање на кооперативни обуки во регионот. Придонесот беше направен преку Швајцарската агенција за развој и соработка (SDC), со што обемот на Фондот се зголеми на скоро 75 милиони евра.

„Швајцарија е силно посветена на поддршката на соработката помеѓу установите за обука и приватниот сектор, и токму затоа се приклучи на  KfW Регионалниот фонд за предизвици. Додека го прославуваме доделувањето на двата грантови денес, пред нас е уште еден следен голем чекор, а тоа е заеднички со клучните чинители да најдеме решение за да го пресликаме моделот на Регионален фонд за предизвици на национално ниво и на сите нивоа на образовниот систем. Само на овој начин можеме да го зголемиме ограничениот број на успешни приказни во одржливи промени на системско ниво низ целата земја,“ вели  Луциен Аегертер, DHoM, Швајцарска амбасада,

Главниот партнер за имплементација на проектот е Коморскиот инвестициски форум за Западен Балкан 6 - асоцијација на коморите на трговија на регионот, чија членка е Стопанската комора на Македонија.

„Индустријата за информациски и комуникациски технологии (ИКТ) важи за една од најбрзо растечките индустрии, како и за најпросперитетна професија на денешницата. За ова говори и фактот дека сè поголем број на луѓе решаваат за квалификација, но и преквалификација во професии во оваа сфера, што е во значајна мера присутно и во нашата земја. Статистичките резултати од истражувањето покажуваат дека застапеноста на девојките студенти на ИТ студиите во Македонија е на високо ниво, споредбено со поголем број  ЕУ држави, при што над 50% од студентите кои студираат природни науки, математика и информатика, како и инженерство, производство и градежништво се жени, “ истакна Антони Пешев, извршен директор на Стопанска комора.

„ Денес е интернационалниот ден на девојките во ИКТ и морам да споменам дека Стопанската комора и во таа насока работи на низа активности за да ги разбие стереотипите дека не постои машка и женска професија, туку сè зависи од интересите и можностите на личноста, “ додаде тој.

Во оваа насока се обрати и Михаела Ставревска ученичка во средното училиште „Ѓорги Наумов“ од Битола: „Иднината е во компјутерите, не е важно дали си машко или женско, ако си доволно интелигентен можеш да успееш во секоја насока. Многу сум благодарна што се доделуваат вакви грантови, бидејќи најголем бенефит од новите опреми во училиштата имаме токму ние, учениците.“

„Една од главните додадени вредности што Регионалниот фонд за предизвици ги носи во регионот на Западен Балкан е неговиот интрарегионален ефект. Ова е регион на шест економии, кои сите имаат различни институционални подесувања кога станува збор за системот на стручно образование, пристапот кон дуално или учење на работно место во системите на стручно образование  се имплементираат во различни модели во секоја од економиите и на многу различно ниво. Сепак, предизвиците за обезбедување на квалификувана работна сила која може да одговори на потребите на денешните економии се исти во сите шест економии“, оцени г-ѓа Татјана Штерјова Душковска, генерален секретар на Коморскиот инвестициски форум за Западен Балкан 6. Таа исто така изрази и задоволство од бројот на поддржани проекти до сега.

„Во моментот имаме дадено поддршка на 99 проекти, кои добиваат 44 милиони евра во грантови, менувајќи ја сликата на стручно образование и обука  низ регионот, но исто така ширејќи многу позитивен ефект низ регионот во областа на развој на човечки капитал и транзицијата на Западен Балкан кон зелени и дигитални економии“, заклучи таа.

Церемонијата на доделување собра претставници од Стопанска комора на Македонија, Амбасада на Сојузна Република Германија во Македонија, Амбасада на Швајцарија во Македонија,  Канцеларијата на Германската банка за развој во Македонија и Косово и Коморскиот инвестициски форум на шесте земји од Западен Балкан

The post Нови проекти за развивање на вештини ќе бидат финансирани од Регионалниот фонд за предизвици во Македонија appeared first on Република.

Македонката Светлана Мојсов, светски познат научник чие истражување за хормоналните предизвикувачи за производство на инсулин доведе до револуционерни третмани за дијабетес и дебелина, е меѓу 100-те највлијателни личности во светот за годинава, според најновиот избор на американскиот магазин „Тајм“.

Таа се најде во овој престижен избор заедно со уште двајца научници, Џоел Хабенер и Ден Дракер, во сегментот „Пионери“, меѓу други влијателни личности како Америка Ферера, Лесли Локо, Офелија Дал, Кенеди Одеде и други.

Како што пишува Алис Парк, виш дописник на „Тајм“, во образложението за изборот на Мојсов, Хабенер и Дракер, појавата на ефикасни лекови за слабеење како што е Вегови (Wegovy ) е кулминација на долгогодишната тимска работа.

Научниците во Европа и во САД, кои први работеа на лекови за дијабетес, направија критична врска помеѓу инсулинот и инкретините, дел од семејството на цревни хормони познати како глукагони, со што им помогнаа да разберат како да управуваат со нивото на шеќер во крвта и тежината.

Во годинашнава листа на магазинот „Тајм“ во категоријата на највлијателни лидери се сопругата на починатиот руски опозиционер, Јулија Навални, кинескиот премиер Ли Џијанг, полскиот премиер Доналд Туск, аргентинскиот претседател Хавиер Милеи и италијанската премиерка Џорџа Мелони меѓу лидерите.

Покрај нив, помеѓу највлијателните лидери се и бразилската министерка за животна средина и климатски промени, Марина Силва, директорот на ЦИА, Вилијам Барнс и шефот на кабинетот на украинскиот претседател, Андриј Јермак.

Во изборот на највлијателните личности на американскиот весник се најдоа и јапонскиот режисер Хајао Мијазаки, британската пејачка со албанско потекло Дуа Липа, британскиот актер Дев Пател и австралиската пејачка Кајли Миног.

The post Македонската професорка Светлана Мојсов е меѓу 100 највлијателни луѓе на светот во избор на „Тајм“ appeared first on Република.

Продуктивноста, како и сè друго - се вежба. Притоа, важно е да се биде искрен кон себе, свесен за своите слаби точки и да се работи на нив.

Лошо е чувството да се легнува навечер со сознание дека не сме направиле апсолутно ништо од планираното за тој ден. А, има и такви денови... И, во ред е ако се исклучок, некогаш човек треба да се одмори, а некогаш едноставно нема волја или енергија да биде продуктивен. Но, што ако, ден по ден, постојано ги одложуваме работите, ги одолговлекуваме задачите и само „се влечеме“ од точката А до точка Б, со усти „полни планови“ коишто не успеваат? Тогаш тоа е веќе проблем што треба да се реши со стручно лице. Советот гласи: Разговор со психолог.

Во позадината на сè тоа може да има посериозни нешта од едноставна мрзеливост. На пример - опсесивно компулсивно нарушување, депресија или синдромот на невнимание. Меѓутоа, ако ништо од тоа не е случај и всушност сме само мрзливи, продуктивноста и делотворноста се вежбаат, се подобруваат, како на пр. и трчањето, учењето, самодисциплината...

Следат неколку начини за зголемување на својата продуктивност, т.е. да се постигне што е можно повеќе од она што е зацртано за денеска и да се биде задоволен со себе.

Научете да кажете: Не!

Важно е да се знае како да се постават граници. Во спротивно, ќе бидете роб на туѓите потреби, желби и каприци и секогаш ќе бидете зафатени и „растргнати на сто страни“... Тоа, несомнено, е фрустрирачки и демотивирачки. Но, никој друг не е виновен за тоа освен самите вие. Кога се почитувате себеси и своето време, полесно е да се каже „не“ на сè што не е важно. Тоа „не“ се практикува. Се почнува со мали нешта: кажете му „не“ на телефонскиот продавач кој се јавува во лошо време, на службеничката на шалтер во банка која нуди непотребни „поволности“ и услуги, на познаникот со кого не сакате да излезете на кафе, на пријателот што позајмува пари, но никогаш не ги враќа, на партнер /-ка што не ве почитува...

Медитирање

Тоа помага да се зајакне концентрацијата, сосредоточеноста на она што е важно. Вештината на медитација ја поттикнува креативноста, смирува и на тој начин нè прави попродуктивни. Медитација може да бидат и едноставни техники на дишење коишто ќе помогнат да се префрли насоченоста однадвор кон себе... Лаички кажано - „да се склопите“ себеси и на крајот да си верувате себе и на своите чувства, претчувства и знаење.

Работата за денеска - завршете ја денеска, испланирана синоќа!

Успешните луѓе имаат една тајна: Денот го почнуваат со точно дефиниран распоред. Не го склопуваат во девет часот, по пиењето кафе, туку претходната вечер. Советот гласи: Запишете ги сите задачи што треба да ги направите следниот ден.

Подредете ги - од најважните и најтешките до најмалку важните, и обидете се да ги направите по тој редослед. Може и да се пречкртаат завршените задачи. Со тоа се развива чувството, а со тоа и мотивација да се продолжи.

Познавачите велат: Не одете на спиење без план за следниот ден!

Без одложувања и одвлекувања на вниманието!

Во денешно време, кога пораките и известувањата се составен дел од животот и сè нешто „ќе потсвирне“ некаде, концентрацијата е сè потешка. Затоа, се советува да се исклучат известувањата за е-пошта, Фејсбук, Икс и сл., на пр., додека се работи на нешто битно. Познато е дека никогаш не одзема само пет - 10 минути, туку тоа редовно преоѓа во барем половина час, а и многу повеќе.

Може, исто така, да се одредат и еден или два дена во седмицата за „без работа“. Во тие денови, потрудете се - без состаноци и без деловни телефонски повици. Според стручњаците, ако се почне со примена на сите овие совети уште денеска, за една седмица ќе се почувствуваат позитивни промени.

The post Дел од тајните на успешните луѓе: Неколку правила за поголема продуктивност appeared first on Република.

Денес, во рамките на клиничката настава на Американскиот универзитет на Европа – ФОН,имавме чест наш гостин да биде господинот Jonathan BERKSHIRE MILLER како предавач на темата “Economic security and supply chains”.
Студентите од различни дисциплини, вклучувајќи економија, право, политички науки , детективи и безбедност, имаа можност да го истражат важниот аспект на економската сигурност и комплексноста на ланците на снабдување, преку интерактивна и инспиративна дискусија.
Со гордост споделуваме дека настанот привлече голем број на присутни, преку 80 студенти и професионалци, што го потврдува интересот и ангажманот на нашата заедница. Сесијата беше жива и интерактивна, со бројни прашања и размени на мислења кои го обогатија дискурсот.
Оваа успешна дискусија уште еднаш го потврдува значењето на клиничката настава и ангажманот на студентите во истражување и анализа на актуелни теми.
Дополнителни информации за господинот Jonathan BERKSHIRE MILLER и неговата работа, Ви се достапни на неговиот Twitter профил @J_BerkshireM.За сите дополнителни прашања и информации, ве молиме контактирајте ја нашата служба на [email protected]к

The post Високо ангажирана дискусија за економска сигурност и ланците на снабдување со Jonathan BERKSHIRE MILLER во Американскиот универзитет на Европа – ФОН appeared first on Република.

Проф. д-р Оливер Бакрески, редовен професор на Институтот за безбедност, одбрана и мир, денеска е избран за декан на Филозофскиот факултет на Универзитетот „Св. Кирил и Методиј“-Скопје.

На тајното гласање тој добил повеќе гласови од двајцата противкандидати - професорите Никола Минов и Зоран Киткањ.

Бакрески на позицијата декан на Филозофскиот факултет на УКИМ доаѓа на местото на досегашниот декан, проф. д-р Ратко Дуев.

The post Оливер Бакрески избран за декан на Филозофскиот факултет на УКИМ appeared first on Република.

Децата во земјава на возраст од 7 до 15 години најчесто имаат проблем со вниманието, концетрацијата и брзината на реакција, покажува истражувањето „Когнитивно функционирање на децата на возраст од 7 до 15 години“ на проф. д-р. Слаѓана Анѓелкоска, универзитетски професор, психолог и психотерапевт.

Истражувањето е спроведено од февруари 2023 година до декември 2023 година на територијата на целата наша држава, во сите осум региони (Вардарски, Источен, Југозападен, Југоисточен, Пелагониски, Полошки, Североисточен и Скопски), а се опфатени 2032 ученици по случаен избор на возраст 7 до 15 години.

Истражувањето има за цел да ги согледа когнитивните постигнувања на децата во делот на вниманието, концентрацијата, помнењето, работната меморија, нивниот фокус, брзина на реакција, визуопросторна ориентација, развој на фина моторика, егзекутивни функции и да ја утврди фактичката состојба наспроти зачестеното алармирање од страна на наставниците, психолозите, педагозите, родителите дека децата имаат сè поголеми тешкотии во совладувањето на наставните содржини, како на часовите, така и дома.

Резултатите покажале дека во сите возрасни групи најголем процент на деца влегуваат имаат намалена одржливост на когнитивното функционирање при решавање на задача.

Кај децата на возраст од 14 и 15 години се очекуваше да нема деца коишто нема да можат да ја решат задачата и најголем процент да бидат деца коишто ќе влезат во сината зона. Сепак, за жал, и тука имаме 4 отсто деца кои не успеале да ја решат задачата, а 50 отсто од децата се во портокаловата зона, што е особено загрижувачки податок, и за кој е потребно да се анализира подлабоко со понатамошни истражувања за откривање на причините, покажува истражувањето.

Во втората задача што им била зададена да ја решат, забележани се значајни поразителни резултати, велат истражувачите.

-Кај децата на возраст од 12 до 15 години, во периодот кога се очекува да имаат развиена способност да ја одржат постојаноста на вниманието во насока на поставената цел и следење на чекори за постигнување на целта, добиваме резултат во кој е голема процентуалната разлика на деца коишто тоа можат да го следат и деца коишто имаат значајни потешкотии да ги следат чекорите за постигнување на целта. Деветнаест отсто, 11 проценти и 6 отсто на деца коишто не успеваат да ја завршат задачата се поразителни проценти коишто ни укажуваат на потешкотиите на децата во совладување на наставниот материјал и постигнувањето на успех во учењето, покажуваат резултатите од истражувањењето.

Резултатите добиени во однос на направените грешки, додаваат истражувачите, се уште поголем аларм за присуство на одреден проблем.

Од децата се бараше поврзувањето во двете задачи да го направат без да ги креваат раката и моливот од листот. Потребно беше додека ги извршуваат задачите во исто време да запомнат две инструкции: да поврзуваат по даден редослед и да не го креваат моливот од листот додека ги поврзуваат точките, стои во истражувањето.

Процентите прикажани во двата графикона, додаваат истражувачите, покажуваат дека голем процент на деца се оние кои што направиле повеќе од 4, односно 5 грешки (полето означено со сива боја), што покажува дека децата имаат потешкотија ментално да задржат две различни и неповрзани информации и нив да ги следат.

Она што се бараше од децата е за одредено време да извршат две задачи: во првата задача да поврзат последователни броеви од 1 до 25, а во втората задача да направат нaизменично поврзување број-буква-број-буква. Се тргна од претпоставка и очекување дека првата задача без никаков проблем ќе ја решат сите деца во определеното време предвидено за нејзино решавање, а втората задача дека ќе биде потешка за децата од 7 години, но не и за повозрасните ученици, велат истражувачите.

Додаваат дека по анализата на резултатите, за жал беше утврдено дека генерално, сите деца коишто учествуваа во истражувањето имаат проблем со внимание, концентрација, брзина на реакција, визуопросторна ориентација, егзекутивните функции кои што претставуваат ментален капацитет значаен за дефинирање на цели, планирање на начинот за доаѓање до целта и успешно извршување на дадениот план.

Појаснуваат дека причините за вака добиените резултати се препишуваат на различни фактори - од недоволна рана стимулација на децата, препуштеност на децата самите да го структурираат своето време од најмала возраст, недоволна посветеност на родителите во раниот развој на децата со отсуство на активности коишто поттикнуваат когнитивно созревање на децата. Сите овие фактори може да се земат како причинители за оваа појава, но не смееме да генерализираме, се вели во истражувањето.

Истражувањето беше спроведено со стандардизиран психолошки тест (прв тест од ваков тип на нашите простори) којшто ги задоволува сите критериуми за истражување и е наменет за проценка на одредени когнитивни домени: внимание, концентрација, помнење, работна меморија, фокус, брзина на реакција, визуопросторна ориентација, развој на фина моторика, егзекутивни функции.

The post Учениците во Македонија на возраст меѓу 7 и 15 години не можат да задржат внимание и концентрација appeared first on Република.

Единаесет млади научници како дел од Програмата за поддршка на млади еколози Д-р Љупчо Меловски, успешно спроведоа 11 научно истражувачки проекти. Станува збор за проекти кои се занимаваат со истражување на биолошката разновидност, но и проекти од областа на заштита на животната средина и кревање на јавната свест, соопштија од Македонското еколошко друштво (МЕД).

Младите научници, во присуство на своите колеги и дел од менторите, во просториите на МЕД ги презентираа извештаите од своите реализирани проекти.

Во текот на 2022 и 2023 година беа реализирани два истражувања како дел од Програмата за поддршка на млади еколози „Д-р Љупчо Меловски“.

Д-р Драган Арсовски кој е раководител на Програмата за поддршка на млади еколози, истакна дека е горд што младите еколози успешно ги реализираа своите грантови.

И покрај тоа што во текот на целата година, има толку многу активности кои се потребни за да се реализираат сите овие грантови, на крајот кога младите грантисти ќе ги презентираат своите извештаи, сум екстремно горд за успешно завршената работа. Мислам дека енергијата која ја инвестирам во поддршка за реализирање на грантовите, навистина вреди и допринесува за научната работа во Македонија, вели Драган Арсовски од МЕД.

Дел од оние кои реализираа мали грантови, во следните две години добија шанса да реализираат и среден грант.

На настанот присутни беа и новите грантисти од Програмата за поддршка на млади еколози, кои во идните две, односно една година ќе ги реализираат своите грантови.

Македонското еколошко друштво отсекогаш било место на собирање на младите научни умови од екологијата, и активно работи на екуцирање на младите. Преку Мрежата за искуствено учење стотици ученици имаат можност да учат за природните науки, преку експерименти кои сами ги спроведуваат, секако под менторство на спроведувачите на работилниците. Тимот на МЕД е горд што во македонското општество постои голем потенцијал за научно истражувачка дејност.

The post 11 млади научници ги презентираа своите проекти од областа на животната средина appeared first on Република.

Во Бања Лука, пред неколку дена беше прогласена шестата генерација на најдобри наставници од земјите на екс Југославија. Од повеќе од неколку стотици пријавени просветни работници, со тутилата „Најдобар наставник на просторите на поранешна Југославија“ се стекнаа вкупно 28 наставници избрани според строги критериуми, од кои дури 12 се од нашата држава.

Прогласувањето се одржа во рамки на шестата регионална конференција насловена како „Светот на образованието ги брише границите“, во организација на Асоцијацијата на наставници.

Признанија добија наставниците Марија Богатиновска, Александра Митровска, Билјана Лазареска, Дивна Карапанчева, Јелена Мандиќ, Ксенија Николова, Марина Станиславова, Олгица Бајалџиева, Раде Илијевски, Валентина Клопчевска, Весна Бошковска и Весна Недановска.

Целта на конференцијата е да поттикне регионално вмрежување на најдобрите едукатори, наставници, професори, стручни соработници.

„Иновативната работа на овие наставници е двигател и иницијатор на формални образовни реформи, на кои се повикуваат сите земји во регионот.

На конференцијата присуствуваа повеќе од 200 наставници од Босна и Херцеговина, Република Србија, Македонија, Хрватска, Црна Гора и Словенија. За време на доделувањето на наградите на најдобрите наставници и директори од регионот, во Асоцијацијата беа примени нови полноправни членови од сите 6 земји, а од нашата земја член на Асоцијацијата стана наставничката Роза Николова од ООУ „Св. Кирил и Методиј“, Кочани.

The post Дванаесет наставници од Македонија прогласени за најдобри во земјите во екс ЈУ appeared first on Република.

В петок, на 12 април, Центарот за кариера при Универзитетот „Св. Кирил и Методиј“ во Скопје, од 11 до 15 часот, на платото на УКИМ, во кампусот на општествените науки, организира одбележување на два настана – Отворен ден на УКИМ и Ден за кариерен развој на УКИМ.

По пригодните обраќања на ректорката на УКИМ, проф. д-р Биљана Ангелова, раководителката на Центарот за кариера, проф. д-р Јасмина Тониќ Рибарска и претседателот на Универзитетското студентско собрание на УКИМ, Александар Николовски, секој од факултетите и институтите на УКИМ, како и повеќе од 30 компании, ќе се претстават на свој штанд пред заинтересираните средношколци – матуранти и пред студентите кои сакаат да се запознаат со можностите за вработување и практикантство, за време и по завршувањето на студиите.

Настанот ќе биде интерактивен, со дискусии, насоки и советување и од претставниците на единиците и од компаниите, преку запознавање на студиските програми, можностите за стипендирање, вклученоста во научноистражувачки проекти, можностите за меѓународна размена и за студентскиот живот, со цел инспирација, насочување и помош во донесување одлука при изборот на конкретната академска средина или идниот кариерен развој во бизнис-средината. Исто така, во рамките на настанот ќе има и зона за забава (со настап на студентите од Факултетот за драмски уметности и Факултетот за музичка уметност), како и освежување со пијалаци и одбрана музичка плеј-листа.

The post УКИМ в петок организира Отворен ден и Ден за кариерен развој appeared first on Република.

Националната агенција за европски образовни програми и мобилност во четвртокот, 4 април 2024 година го официјално го отвори првиот Еразмус+ инфо центар во Битола. Овој креативен простор кој се наоѓа во централното градско подрачје на Битола или место како што битолчани го знаат “Кафе чао“, е наменет за сите млади но и генерално сите кои сакааат да се информираат за програмите или мрежите со кои раководи Националната агенција за европски образовни програми и мобилност.

Оваа канцеларија ќе биде место за информирање и презентирање на можностите од програмите Еразмус+ и ЕСК, како и сите мрежи со кои управува Националната агенција и навистина ми претставува голема чест и задоволство што го отвораме овој прв Еразмус+ инфо центар во Битола. Се започна од една идеја која подоцна беше ставена во работна програма, па одобрена на седница на Влада на Република Македонија ,а сега дојдовме и до денешното отворање со кое започнува оваа нова приказна. Овој простор ќе служи за дружење, едукација на младите, но и можност да творат и да ги искажат своите идеи. Просторот е отворен за сите кои се вклучени или сакаат да се вклучат во Еразмус+ програмата, која е една од најуспешните програми во Европската Унија. Сакам да се заблагодарам на сите битолчани, кои одлично не прифатија и ни помогнаа во изминатиов период”- истакна Ѓоргиевски во обраќањето кон присутните.

[caption id="attachment_763484" align="alignnone" width="769"] Просторот е отворен за сите кои се вклучени или сакаат да се вклучат во Еразмус+ програмата, која е една од најуспешните програми во Европската Унија, истакна на отворањето директорот Марко Ѓоргиевски[/caption]

На отворањето присуствуваа многу млади лица од регионот, студенти, наставници, професори и претставници на дипломатскиот кор во земјава. Сите присутни имаа можност да ја проследат изложбата од одбрани дела на младата битолска уметница Јана Танчевска и да уживаат во класична музика за која беа одговорни учениците од музичкото училиште во Битола.

Овој Инфо центар ќе биде безбедно место за младите, за нивните идеи и креативност . Националната агенција за европски образовни програми и мобилност продолжува со континуираната промоција на европските вредности и приоритети за поддршка на стручното образование, на инклузивно општество, на активности кои ја промовираат „зелената агенда“ и одржливост за постигнување на долгорочно одржливи цели, велат од Националната агенција.

The post Отворен првиот Еразмус+ инфо центар во Битола appeared first on Република.

Под покровителство на сопругата на кандидатот за претседател Стево Пендаровски, г-а Елизабета Ѓоргиевска, а по повод Денот на здравјето, денеска се организираше тркалезна маса на која учествуваа д-р Милена Стевановиќ, г-а Елена Ковачевска и група млади студенти од областа на медицината.

Фокусот на дискусијата беше насочен кон иднината на медицината, со особено внимание на менталното здравје на младите, можности за младите доктори во нашата држава, како и предизвиците кои се пред нив.

Г-а Ѓоргиевска го истакна значењето на менталното здравје кај младите, посочувајќи дека темелното разбирање и интеграција на оваа компонента во медицинското образование е клучно за развојот на целосно подготвени здравствени професионалци. Таа ја нагласи важноста од промовирање на свесноста и поддршката за менталното здравје, особено во контекст на стресот и притисокот со кои се соочуваат младите луѓе во нивното образование и различни фази на кариерата.

Околу одлевањето на кадри и креирањето можности, г-а Ѓоргиевска посочи „Како професор и доктор, ја имам привилегијата секој ден да работам со талентирани и посветени студенти. Тоа ми овозможува да бидам дел од нивното образование и развој, што е исклучително инспиративно и исполнувачки. Сепак, се соочувам со сериозен предизвик – голем број од моите најдобри студенти си заминуваат во странство во барање на подобри можности. Ова е проблем со кој мораме активно да се бориме, ангажирајќи се да создадеме подобри услови за нив овде, дома.

Во мојата улога како координатор на Еразмус програмата, веќе неколку години се обидувам да обезбедам можности за нашите млади да искусат и учат од европските метрополи, со цел тие да ги пренесат своите стекнати знаења и вештини назад во нашата земја. Така исто, ги охрабрувам да ги искористат различните можности и стипендии што ги нудат Министерството за образование и наука и различни амбасади. Наша задача е да ги мотивираме да се вратат и да придонесат кон развојот на нашата заедница, осигурувајќи дека иднината на нашата земја е во сигурни раце."

Елена Ковачевска и Милена Стевановиќ придонесоа со свои перспективи за можностите и предизвиците со кои се соочуваат младите доктори во земјата, подвлекувајќи иницијативи и мерки кои треба да се преземат за подобрување на нивните услови и перспективи.

Младите студенти активно учествуваа во дискусијата, споделувајќи свои искуства и мислења за иднината на медицината и своето место во неа. Тие ја истакнаа потребата од поинклузивен пристап кон менталното здравје и подобрена поддршка во нивните образовни и професионални патеки.

Настанот заврши со заклучок дека соработката меѓу образовните институции, здравствените организации и младите професионалци е клучна за создавање на подобра иднина во медицината, каде што менталното здравје и благосостојбата на здравствените работници ќе бидат во преден план.

The post Тркалезна маса со студенти „Иднината на медицината во рацете на младината“ appeared first on Република.

Петте големи меѓународни дизајн платформи и фестивали – “Skopje Design Week” на “Public Room” (Македонија), Фестивал Миксер (Србија), Дизајнавстрија (Австрија), What Design Can Do, Амстердам (Холандија) и Центарот за дизајн од Барселона (Шпанија) – се обединија за да го започнат амбициозниот проект: Next Gen Design.

Проектот има за цел не само да го поттикне учеството на младите туку и да поттикне промена на парадигмата и насочување кон циркуларен дизајн. Партнерството се појави како одговор на итна потреба да се поттикнат младите дизајнери на возраст помеѓу 18 и 35 години ширум Европа да преземат активна улога во обликувањето на одржлива иднина.

Проектот Next Gen Design, поддржан од Европската комисија и Министерството за култура на Македонија, директно се справува со нужноста за иновативно и амбициозно вклучување на младите во изнаоѓање долгорочни дизајн и иновативни решенија. За таа цел ќе бидат отворени меѓународни конкурси за дизајн решенија за сите млади дизајнери од Европа кои ќе се реалзираат во 2024, 2025 и 2026 година ќе ги промовираат принципите на одржлива и циркуларна економија.

Од вчера е активен онлајн центар преку веб страницата https://nextgendesign.eu чија намена е споделување идеи и учење за позелена иднина во која е инкорпориран прашалник за млади од 18 до 35 години (https://nextgendesign.eu/survey/) со цел да се детектира свесност за Европскиот зелен договор и истиот да се прилагоди на потребите и можностите на младите во регионот и Европа.

Соработката на петте меѓународни платформи за дизајн ќе понуди серија истражувања, отворени повици за дизајн решенија и учество на европскит дизајн фестивали, работилници и резиденции во фабрики. Ова фестивалско партнерство означува значаен чекор за формирање на следната генерација дизајнери свесни за климатските промени во светот.

Public Room е основана во 2007 година врз основа на бизнис модел на социјални иновации и претприемништво. Од 2015 година го лансира уникатниот модел на социјално претприемништво и станува водечка граѓанска организација за дизајн на социјални иновации во целиот балкански регион. Активностите и програмата го зајакнуваат непрофитниот сектор од регионот главно во доменот на креативните индустрии и особено дизајнот. Во 2011 година Public Room го иницираше годишниот фестивал “Skopje Design Week” во Скопје и ја користи оваа платформа за тесно поврзување на дизајнот секторот, бизнисот и образованието. Овогодинешното издание на “Skopje Design Week” ќе се одржи од 6. до 10. ноември на две локации во Скопје, Public Room и Мала станица. Врзете ги појасите, полетуваме повторно!

The post Македонија преку „Public Room“ е меѓу петте водечки европски дизајнерски платформи кои ќе ја оформуваат следната генерација на паметни дизајнери appeared first on Република.

Националната агенција за европски образовни програми и мобилност (НАЕОПМ) утре во Битола ќе отвори Еразмус+ инфоцентар кој ќе биде креативен простор за информирање и вмрежување на сите Еразмус+ корисници и млади лица.

Од Агенцијата велат дека инфоцентарот ќе биде „почетокот на нова приказна од каде ќе произлезат нови идеи и можности преку Еразмус+“.

-Инфоцентарот ќе биде креативен простор на младите, каде што нивните идеи ќе бидат слушнати и ќе се информираат за сите новости од НАЕОПМ, соопшти Национаната агенција.

На отворањето на инфоцентарот ќе бидат претставени дела на младата уметница Јана Танчевска, ќе има дегустација на македонски вина и музичка програма на учениците од музичкото училиште во Битола.

The post Еразмус+ инфоцентар ќе биде отворен во Битола appeared first on Република.

Во значајна иницијатива насочена кон справување со предизвиците со кои се соочуваат младите во регионот, сто динамични млади поединци од Пелагонискиот регион успешно ја лансираа првата Младинска платформа. Овој пионерски проект означува голем скок кон унапредување на соработката помеѓу граѓанскиот и јавниот сектор, со крајна цел за подигање на гласот на младите во заедницата.

Девет клучни локални организации, предводени од Про Локал, и деветте општини од Пелагонискиот регион, денес потпишаа меморандум кој означува колективна заложба за искористување на човечките и финансиските ресурси за позитивно трансформирање на условите за живот на младите во регионот.

Емилија Ѓероска, претседателка на Pro Local, ја најави иницијативата, наведувајќи: „Денес ни се придружуваат 100 нови млади лидери кои се збогатија со витални знаења и вештини во текот на изминатите три години, сите во стремеж за подобрување на нивната заедница. Воспоставувањето на оваа платформа означува храбар чекор напред, олицетворувајќи ја нашата заедничка определба да поттикнеме позитивна промена за младите во нашиот регион.“

Тони Коњановски , градоначалникот на Битола, претставувајќи ги градоначалниците од Пелагонискиот регион, увери дека општинските врати се секогаш отворени за свежи идеи и предлози насочени кон општествено подобрување. Тој изјави: „Младинската платформа ќе функционира на принцип на еднаквост, обезбедувајќи еднакви права. Тоа значи дека ќе носи одлуки со еднакво право на глас меѓу политичарите и граѓанските активисти“.

Заменик амбасадорот на Кралството Холандија, Н.Е. Роберт Декер, упати честитки до младите за нивната проактивен став кон општествените предизвици, инспирирајќи ги нивните врсници од целиот земја. Тој ја пофали Платформата како критичен механизам за континуиран успех на соработката меѓу локалните власти и граѓанскиот сектор. Оваа иницијатива произлегува од проектот „Зајакнување на луѓето од Пелагонија“, поддржан од Амбасадата на Кралството Холандија.

Настанот се случуваше во иновативниот простор на IWConnect, ИТ компанија со силни деловни врски со Холандија, со што нивниот придонес е значаен за оваа иницијатива. Како компанија која не само што има свои канцеларии во Холандија, туку и се гордее со тоа што е пријател на земјата која го поддржува финансиски овој проект, IWConnect со овој потег ја покажува нивната посветеност за поттикнување младинско зајакнување и развој.

The post Холандска поддршка за младинска платформа appeared first on Република.

Според истражувањето, најголемите предности на сезонската работа се стекнувањето нови знаења и вештини (68% од испитаниците), запознавањето нови луѓе (61%) и платата која вообичаено е значително повисока отколку во случајот со цела година. Има и престој на море (45%) и интересноста и атрактивноста на работата (44%), а само шест проценти од луѓето сметаат дека сезонската работа нема предности, несоодветно сместување и премалку плата и одвоеност од семејството .

Кога станува збор за просечната плата, очекуваната месечна нето-плата за сезонско работно место е 1.307 евра нето, што е за шест отсто повеќе од лани.

Месечниот приход, се разбира, зависи и од видот на работата:

– Келнерите очекуваат просечна месечна плата од 1.408 евра;

– Готвачите би сакале да добијат минимум 1.482 евра за својата работа;

– Собари во просек очекуваат минимум 1.145 евра месечно;

– Рецепционерите сметаат дека за својата работа треба да добијат минимум 1.259 евра;

– Продавачите очекуваат просечна плата од 1.105 евра;

– Магационерите очекуваат 1.050 евра во сезоната;

– Асистенти во кујната очекуваат 1.322 евра.

Извор: bancometar.mk

The post Колкави се платите на сезонските работници во Хрватска appeared first on Република.

Европскиот кампус на Универзитетот Јорк, СИТИ Колеџ одржа средба на дипломци во Скопје со која уште еднаш покажа дека е најголемата заедница на дипломци од странска високообразовна институција во земјава. На средбата на која освен дипломците, беа присутни и претставници на академскиот кадар од СИТИ Колеџ, беше потенцирано значењето на институцијата во обезбедување квалитетна образовната опција за севкупен развој на општеството.

СИТИ Колеџ 35 години ги поддржува младите студенти и менаџери од Македонија преку можности за стипендирање за додипломски и постдипломски студии на оваа престижна високообразовна институција, беше истакнато на средбата.

Додека ја прославуваме нашата 35-годишнина, се радуваме на иднината со оптимизам и амбиција. Се стремиме да бидеме водечка институција во регионот и пошироко, обезбедувајќи извонредност во образованието, истражувањето и иновациите. Наша цел е да ги поттикнеме нашите студенти да станат глобални граѓани и лидери кои можат да се справат со предизвиците и можностите на 21 век. Создаваме трајно наследствои влијание што ќе им користи на генерациите што доаѓаат. За да се постигне оваа визија и цел, потребна ни е континуирана поддршка и партнерство меѓу нашите студенти и дипломци. Ги охрабруваме да се поврзат со своите колеги дипломци, да разменуваат искуства, да соработуваат на проекти и да ги слават нивните успеси. Затоа што тие не се само наше минато, туку и наша сегашност и наша иднина, рече д-р МегаклисПетмезас, заменик директорна Европскиот кампус на Универзитетот Јорк, СИТИ Колеџ.

Европскиот кампус на Универзитетот Јорк, СИТИ Колеџ, како интегриран ентитет на Универзитетот Јорк, претставува уникатна меѓународна институција која ги поврзува академските, истражувачките, националните и корпоративни мрежи низ целиот регион. Во Македонија има приближно 1500 дипломци до сегасо што се сочинуванајголемата заедница на дипломци од странска високообразовна институција во земјава.

СИТИ Колеџ го издвојува вредносното наследство што го создаваме изминативе 35 години и општествената улога што ја имаме преку овозможување квалитетно високо образование. Како единствена образовна институција веќе20 години ја спроведуваместипендиската програма за ЕМБА студии во соработка со државата, Борис Трајковски, програма што дава можности секоја година нашите млади кадри да се изградат во професионалци од меѓународни размери и што ја зајакнува билатералната соработка меѓу нашата земја и Република Грција. Во 2021 година официјално станавме Европски кампус на Универзитетот Јорк и остваривме соработка за дуални програми со Универзитетот од Стразбур. Со сите овие години создавање високопрофилирани и едуцирани индивидуалци, ја даваме нашата поддршка за развојот на општеството во кое живееме, економски и културен, истакна Марија Никовска, директор на канцеларијата во Скопје.

СИТИ Колеџ, Европскиот кампус на Универзитетот Јорк е лоциран во Солун, Грција, со академска мрежа воспоставена и распространета во уште 8 земји. Моментално имаактивни студенти од 60 држави и спроведува 38 различни програми. Станувајќи дел од Универзитетот Јорк добива статус на меѓународен кампус на овој универзитет и станува дел од заедницата на Универзитетот Јорк, водечката британска академска институција.

Денес, Европскиот кампус на Универзитетот Јорк, СИТИ Колеџ ги проширува можностите за студентска мобилност и за интернационализација и обезбедува можности за применето учење, со што целосно го менува студентското искуство нудејќи содржини кои го збогатуваат секој аспект од академскиот живот.

The post Европскиот кампус на Универзитетот Јорк СИТИ Колеџ има 1500 дипломци во Македонија appeared first on Република.

Во Европа последниве години се забележува стремеж кон намалување на бројот работни часови. Некои држави се залагаат и за воведување четиридневна работна недела.

Во Германија во февруари 2024 година почна експериментален проект за испробување работни седмици од четири наместо пет дена, со едноставна замисла - вработените да се обидат да ги завршат работните обврски за четири дена, за да имаат еден слободен ден повеќе и иста плата. Во германскиот проект учествуваат 45 компании што, согласно пократката работна недела, ќе им обезбедат на вработените повеќе индивидуална работа и помал број состаноци, пренесува „Панкуфер“ (Punkufer).

Во 2022 година, Белгија стана првата земја што ја легализираше четиридневната работна седмица. Тоа не значи дека вработените ќе работат помалку, туку имаат можност сами да си направат распоред, како што појасни и белгискиот премиер Александар де Кро.

Исланд, Португалија, Шпанија, Велика Британија и Канада се исто така дел од земјите каде се тестира пократката работна недела.

Каде најмалку се работи? Организацијата за економска соработка и развој (ОЕЦД) ги провери светските податоци од последните неколку години и ја состави и таа листа на држави. Така, земја со најкратка работна недела е Холандија, просек од 29,5 часа неделно, а потоа следат Данска (32,5 часа) и Норвешка (33,6 часа).

Топ-10 списокот го дополнуваат Швајцарија (34,6 часа), Австрија (35,5 ч.), Белгија (35,5 ч.), Италија (35,5 ч.), Ирска (35,6 ч.), Шведска (36 ч.) и Финска, со просечни 36,3 часа во една седмица. Според Евростат - официјалната статистичка служба на Европската Унија, Балканците работат и над 40 часа неделно.

The post Балканците работат и над 40 часа неделно, во Холандија таа бројка е далеку пониска appeared first on Република.

Дополнителната заменичка министерка, Јованка Тренчевска денес заедно со директорката за Државниот инспекторат за труд, Весна Томовска ја посетија текстилната компанија „Албатрос“ управувана токму од жени. Конфекцијата според извештаите на ДИТ е без ниту една претставка во изминатиот период.

Тренчевска посетата на компанијата ја реализираше во склоп на почеток на низата активности по повод Меѓународниот ден на жената, 8ми март - „Ти не си тоа што ти кажуваат да бидеш“. Целта на активностите е да се охрабрат што повеќе жени да се вклучуваат на пазарот на трудот и да бидат економски независни.

По посетата на погонот министерката се средна со неколку вработени со цел согледување на нивното мислење во однос на висината на минималната плата и како тоа влијае на нивниот работен однос. Воедно министерката ги охрабруваше да зборуваат за нивните предлози за како тоа можат да се подобрат условите за работа и што е тоа што треба да се променува на пазарот на трудот.

The post Тренчевска: Кога ќе влезеш во еден погон доколку те пречека насмевка се работи за компанија со задоволни вработени appeared first on Република.

Високи стандарди во медицината, сертификат од Joint Commission International, првата операција на отворено срце во Македонија се само дел од достигнувањата на Клиника Жан Митрев изминатите 24 години постоење.

Историјатот на Клиниката започнува да се испишува од 1 март 2000 година кога почна официјално да работи со правење на првата бај-пас операција во Македонија, предводена од д-р Жан Митрев. Со оваа операција се поставија темелите на современите медицински услуги во Македонија и започнува континуираното подигнување на стандардите на здравствена услуга и нега.

„Мене ми се гледа како да беше вчера кога започнавме со работа, а во суштина кога ќе се навратам сме поминале многу овие 24 години. На шега велам дека ќе почнам да пишувам мемоари како сме почнале и до каде сме стигнале, но навистина од една просторија сега пред нас имаме клиника со највисоки стандарди во регионот. Да се опстои и да се расте и развива клиника беше вистински предизвик бидејќи имавме и се уште имаме пат исполнет со многу препреки, опструкции. И покрај се одиме напред и кај нас се знае дека пациентот добива врвна медицинска услуга. Нашиот успех се мери со успешните приказни на нашите пациенти, со бројот на оперативни зафати, примена на современи методи и поставување на највисоки стандарди во здравствената нега признати на светско ниво од најреномирани здравствени инстанци“, изјави д-р Жан Митрев осврнувајќи се на 24 години од постоењето на Клиниката.

Денес, Клиника Жан Митрев претставува регионален современ медицински центар со комплетни дијагностички процедури во повеќе медицински гранки, поддржани со услуги од модерната хирургија, анестезија и интензивна нега. Гo поседува сертификатот Златен печат за здравствен центар со највисоки стандарди од аспект на квалитет на здравствените услуги и грижа за безбедноста на пациентите доделен од Joint Commission International споредувајќи ја македонската Клиника Жан Митрев со Мајо Клиника. Сертификатот се доби по третпат во континуитет од седум години.

Досегашното работење на Клиника Жан Митрев е обележано со над 40 000 операции, вклучувајќи ги револуционерните методи во современата медицина како првата операција на отворено срце врз буден пациент направена во 2002 година, TAVI– Transcatheter Aortic Valve Implantation револуционерен метод за замена на срцев залисток/ валвула и TEVAR, сложен хибриден зафат на торако-абдоминалната аортна аневризма како и третмани на вродени срцеви заболувања. Направени се повеќе од 1 милион прегледи и над 400 000 пациенти се лекувале во клиниката.

Комерцијален текст

The post Клиника Жан Митрев 24 години – 1 милиони прегледи и 400 000 успешни приказни appeared first on Република.

Македонија има идеални услови за одгледување на квалитетен орев, кој се извезува во земји како Германија, Италија и Турција. Според податоците, производството на орев на годишно ниво изнесува околу 2.200 тона, со просечен принос од 1.800 килограми по хектар. Ова го става оревот на трето место по производство, веднаш по лешникот и бадемот.

Во Македонија, најраспространети се сортите „Чандлер“, „Франкет“, „Хартли“ и „Серс“, кои се одликуваат со големина, вкус и квалитет на плодот.

Овие сорти се погодни за извоз, бидејќи имаат долг рок на траење и се транспортираат лесно.

Цената на оревот на пазарот варира во зависност од понудата и побарувачката, но во просек се движи околу 200 денари за килограм.

За да се вклучат во овој агробизнис, младите земјоделци имаат можност да аплицираат за субвенции и кредити од државата и од Европската Унија.

Една од мерките која се нуди е финансиска поддршка за засадување на нови насади од орев. Исто така, постојат и други програми за подобрување на конкурентноста, квалитетот и пласманот на производите од орев.

Меѓутоа, не сите млади земјоделци се заинтересирани за овој вид на производство, бидејќи сметаат дека тој бара голем влог, труд и време, а не нуди брза и сигурна заработка.

Некои од нив преферираат да се занимаваат со поинтензивни и поисплатливи култури, како зеленчук, овошје или цвеќе. Други, пак, се соочуваат со проблеми како недостаток на земјиште, вода, механизација, складишен простор и пазар.

Затоа, за да се поттикне развојот на ореварството во Македонија, потребно е да се обезбедат подобри услови и поддршка за младите земјоделци, кои би го препознале потенцијалот на овој плод.

Оревот не е само здрава храна, туку и можност за работа, приход и напредок.

извор: денар.мк

The post Расте бавно, ама заработката е сигурна appeared first on Република.