Македонија е меѓународно признаена како функционално модерно мултиетничко општество каде што се почитуваат сите права. Сите извештаи го потврдуваат тоа. Обвинувањата наведени на овој Самит од страна на претставникот на Бугарија се целосно неосновани и доаѓаат од земја која што не ги почитува пресудите на ЕСЧП и стандардите на Советот во областа на човековите права. Ова го истакна премиерот Димитар Ковачевски на генералната дебата „Обединети за Европа“ на Самитот на Совет на Европа во Рејкјавик.

Ковачевски рече дека дискурсот кој се користи од Бугарија кон Македонија, за жал, е многу сличен на дискурсот кој Руската Федерација го користи кон Украина.

Неприфатливо е таквите обвинувања да се злоупотребуваат за политички цели особено во овој клучен период за иднината на Европа, посочи Ковачевски.

Додаде дека Македонија и Албанија заслужуваат да продолжат напред и заедно затоа што кога соседите се движат напред и останатите се движат напред.

Не смееме да дозволиме влијание од трети страни особено не од Русија и во срцето на Балканот, што е срцето на Европа, додаде Ковачевски.

Тој посочи дека Македонија целосно ја поддржува декларацијата на Самитот и сите анекси и верува дека тие обезбедуваат солидна агенда за решавање на проблемите.

Со нашите партнерски организации особено ЕУ, особено решавањето на грижите и проблемите што ги споделуваме. Како претседавач со ОБСЕ и членка на НАТО ќе продолжиме да ја покажуваме нашата цврста посветеност на мултилатерализмот и нашата посветеност особено кон Украина, како што правевме и досега, кажа Ковачевски.

Премиерот порача дека се собрале во Рејкјавик за да покажат единство, солидарност и посветеност на заедничките вредности во областа на демократијата, човековите права и владеењето на правото соочени со невидената агресија против земја членка Украина.

Руската агресија против Украина е очигледно кршење на меѓународното право како и еден остар потсетник за последиците од целосното непочитување на поредокот. Се уште сме убедени дека мултилатеразмот со сите негови грешки е начин да се мобилизира колективен одговор на воените кризи и предизвиците од различна природа. Тие само сакаат да ја изберат својата иднина меѓу сојзуниците. Ние го направивме истото кога ја покажавме нашата солидарност и ја избркавме Русија од Советот на Европа. Се уште сме обединети во барањето на одговорност за извршените злодела. Почнавме да размислуваме и за тоа што правиме добро во Стразбур и каде можеме да се подобриме. А правиме многу добра, започнувајќи како мировен проект во 1949 година Советот се разви во светилник на надеж за милиони европејци преку европската конвеција за човекови права, истакна премиерот Ковачевски во своето обраќање.

Посочи дека нормите и стандардите придонесоа за подобрување на животот на нашите граѓани, а денес повеќе од кога било е важно Европа да остане обединета и Европа нема да биде обединета целосна и слободна и мирна без Балканот целосно интегриран во европското семејство.

Премиерот Ковачевски изрази благодарност на исландското претседателство за неуморните напори за успех на Самитот и му посака на претстојното летонско претседателство иста издржливост и посветеност.

The post Ковачевски: Дискурсот кој се користи од Бугарија кон Македонија е многу сличен на оној кој Русија го користи кон Украина appeared first on Република.

Претседателот на Владата на Република Македонија, Димитар Ковачевски пристигна на четвртиот Самит на Совет на Европа, во Рејкјавик, Исланд.

Како дел од делегацијата која што ја предводи премиерот е Бојан Маричиќ заменик на претседателот на Владата задолжен за европски прашања.
Премиерот Ковачевски на отворањето на Самитот беше пречекан од премиерката на Исланд Катрин Јакобсдотир и генералната секретарка на Советот на Европа Марија Пејчиновиќ Буриќ.

На четвртиот Самит на Совет на Европа кој годинава се одвива во Рејкјавик, лидерите ќе разговараат на теми кои се однесуваат на мирот и почитувањето на човековите права, особено во овие тешки времиња кога во Европа не е нападната само една држава, туку се нападнати демократските принципи и вредности на меѓународниот поредок.

Целта на Самитот е да се обединат земјите членки кон принципите за демократија, обезбедувајќи јасно заедничко разбирање за тоа како ја обезбедуваме и зајакнуваме демократијата во Европа. Токму затоа Агендата на Самитот, покрај официјалното отворање, опфаќа и дискусии на тркалезна маса на различни теми како што се човековите права, демократијата, владеењето на правото животната средина, вештачката интелигенција и дигиталниот развој, како и работна вечера што ќе биде посветена на Украина.

На крајот на Самитот, Исланд официјално ќе и го предаде на Латвија претседавањето со Комитетот на министри на Советот на Европа.

Латвија е следната земја-членка што ќе претседава со Комитетот на министри на Советот на Европа за период од шест месеци.

The post Премиерката на Исланд Јакобсдотир го пречека Ковачевски на Самитот на Совет на Европа appeared first on Република.