Денеска, (20.07.2023) во рамки на проектот на МВР - „Отворен кабинет“, со кој се опфатени сите Сектори за внатрешни работи низ државата, министерот за внатрешни работи Оливер Спасовски беше во посета на СВР Битола, со цел низ непосредни средби со граѓаните, да ги слушне нивните идеи и предлози за подобрување на безбедноста во заедницата во која живеат.
Притоа, тој оствари средба со раководството на оваа организациона единица при МВР на којашто беше информиран за безбедносните состојби на подрачјето во надлежност на СВР Битола.

При реализацијата на овој проект водени сме од премисата дека партнерството помеѓу полицијата и граѓаните започнува во заедницата и токму на тој начин сакаме да покажеме дека секој еден може да даде свој придонес во гарантирање на безбедноста на сите. Воедно, средбите со раководствата на секторите и одделенијата за внатрешни работи, како оваа што денеска ја имав со раководството на СВР Битола, се дополнителна можност заеднички да ги разгледаме резултатите од реализираните активности, но и да ги зацртаме претстојните приоритети”, истакна министерот Спасовски во изјава за медиумите. Притоа, тој ги сподели податоците од брифингот со раководството на СВР Битола во однос на безбедносната состојба:

„Согласно презентираните податоци на средбата со раководството на Секторот, можам да констатирам дека вкупниот број на извршени кривични дела на подрачјето на СВР Битола во изминатите шест месеци, споредбено со истиот период лани, бележи намалување за 26%. Вкупната ефикасност на расчистување на кривичните дела изнесува 43%, што е за 8% повеќе од лани. Според статистичките податоци, најголем број на кривичните дела се во областа на класичниот криминал, а за поздравување е податокот што само во Битола имаме намалување на бројот на евидентирани кривични дела за 51%, а ефикасноста е 47%, додека на подрачјето на целиот Сектор за внатрешни работи, вклучувајќи ги и Прилеп, Ресен, Демир Хисар, Крушево и Македонски Брод, имаме намалување на кривичните дела за 30% со ефикасност во расчистувањето од 43%, што само говори дека соработката на полицијата и граѓаните е сѐ подобра, а тоа придонесува за зголемена безбедност на заедницата. Притоа, ако за тешките кражби е постигната ефикасност во расчистувањето за 39%, за кривичното дело „кражба“ ефикасноста е 67%, а за разбојништвата дури 140%. Зајакнати беа и контролите за недозволена трговија со дрога и оружје, па во првата половина од годината само на подрачјето на Битола поднесени се 36 кривични пријави против 48 сторители, што претставува зголемување за 67%, додека на подрачјето на целиот сектор зголемувањето е 3%.  Во делот на сообраќајот вкупниот број на сообраќајни незгоди е во намалување за  -9,7%, а во текот на средбата бев информиран и за успешно спроведените оперативни акции од локален и регионален карактер, како што се оние за откривање на кривични дела за противзаконско складирање на отпад, вршење јавен превоз без лиценца, криумчарење на стока и илегална миграција, нелегална сеча на дрва, кои директно влијаат на безбедноста на заедницата”, информираше Спасовски.

По средбите  со граѓаните во рамки на „Отворен Кабинет”, министерот Спасовски ќе го посети и Граничниот премин Меџитлија, каде што ќе оствари средба со раководството на Регионалниот центар за гранични работи Југ, со цел брифирање за состојбите на овој граничен премин, за евидентираните податоци од полициските станици за надзор на државната граница, полициските станици за гранични проверки, како и одделенијата и отсеците кои се во состав на РЦ за ГР Југ.

The post Спасовски со Отворен Кабинет во Битола: Партнерството помеѓу полицијата и граѓаните започнува во заедницата, заеднички да ја гарантираме безбедноста appeared first on Република.

Новиот проект „Отворен Кабинет“ на Министерството за внатрешни работи, во рамки на утврдениот концепт „МВР за ГРАЃАНИТЕ“, кој веќе започна со реализација на 5 јуни во просториите на СВР Штип, продолжува на 15 јуни во ОВР Струга.

Ако имате прашање за министерот, идеја која сметате дека ќе ја подобри безбедноста, предлог за подобрување на севкупното работење на полицијата, а притоа досега не сте имале можност да ја презентирате во неговиот Кабинет во Министерството за внатрешни работи, Кабинетот на министерот Спасовски на еден ден ќе дојде кај вас – во Секторот за внатрешни работи кој го покрива подрачјето каде што живеете, информираа денеска од МВР.

Граѓаните од ова подрачје во текот на оваа недела, можат да се јават телефонски на бројот 072 33 31 85 или електронски на [email protected], да си закажат термин за средба со министерот, а неговиот тим ќе ве пречека и ќе ви овозможи и вашето мислење да добие на значење, да бидете дел од процесот на креирање политики во врска со безбедноста која нѐ засега сите нас.

Да докажеме уште еднаш дека полицијата е во служба на граѓаните и мислењето на секој граѓанин вреди, подвлекуваат од МВР.

The post Отворен Кабинет на министерот Спасовски на 15 јуни во ОВР Струга appeared first on Република.

Во пресрет на 3 декември, Меѓународниот ден на лицата со попреченост денеска се реализираше активноста Отворен Кабинет, во рамки на која Кабинетот на Претседателот на Република Македонија го посетија ученици со атипичен развој од ООУ „Ѓорги Сугарев" - Битола.

Учениците се сретнаа со претседателот Пендаровски и со неговата сопруга, Елизабета Ѓоргиевска и ги споделија нивните желби, хобија, интереси и омилени активности во рамки на образовниот процес.

Во разговорот со специјалните едукатори и рехабилитатори, претседателот Пендаровски и г-ѓа Ѓоргиевска се запознаа со тековните проекти на Центарот за поддршка на учењето на децата со попреченост, што во рамки на битолското основно училиште, овозможува инклузивност, личен развој и индивидуална надградба на учениците.

Претседателот и неговата сопруга се заблагодарија за денешната посета на учениците, посакувајќи им да гo следат својот сон и постојано да се стремат кон остварување на своите цели.

Посетителите имаа можност да ги разгледаат и работните простории на претседателот Пендаровски, како и Мозаик салата во која е поставен диптихот „Македонија – светла земја“ и „Македонија памети“ на нашиот уметник – академик Глигор Чемерски.

Отворен Кабинет е дел од проектот Лице в лице со Претседателот, во рамки на кој, институцијата ја посетиле граѓани од различни возрасти, професии и занимања, студенти од земјава и од странство, како и ученици од основни и средни училишта.

The post Ученици од ООУ „Ѓорги Сугарев” – Битола во посета на претседателскиот кабинет appeared first on Република.

Ученици од ООУ „Киро Глигоров“ од Скопје денеска го посетија Кабинетот на Претседателот на Република Македонија, во рамки на Отворен Кабинет, активност којашто овозможува директни средби на граѓаните со претседателот Стево Пендаровски.

Посетителите се запознаа со претседателот Пендаровски и поразговараа за неговата работа и надлежности, а имаа можност и да присуствуваат во просториите во коишто се одржуваат официјалните и работните средби, како и во салите во коишто се одвиваат свечености, состаноци, седници на Советот за безбедност и прес-конференции.

Од вработените во Кабинетот учениците беа информирани за историјатот на објектот во којшто е сместен Кабинетот на Претседателот, како и за начинот на функционирање на оваа институција, а го разгледаа и импозантниот диптих „Македонија – светла земја“ и „Македонија памети“ на авторот – академик Глигор Чемерски, поставен на двата ѕида во Мозаик салата.

Денешниот настан е дел од проектот Лице в лице со Претседателот, во рамки на кој, досега Кабинетот го посетиле граѓани од различни возрасти и занимања, студенти од земјава и од странство, како и ученици од основни и средни училишта од земјава.

The post Ученици од ООУ „Киро Глигоров“ од Скопје го посетија Кабинетот на Претседателот Стево Пендаровски appeared first on Република.