Австрија го замрзна имотот на руските олигарси во вкупна вредност од 254 милиони евра во врска со санкциите на Европската унија. Средствата се вложени на 97 банкарски сметки, соопшти вчера австриската канцеларија.

Властите, исто така, пронајдоа пет записи во регистарот на земјиште што се чини дека биле користени за прикривање на имотот, рече канцеларот.

Истрагата на сомнителните случаи е значително попречена од фиктивни меѓународни компании.

Ако руските олигарси или нивните организации ја поддржуваат војната против Украина, тие се соучесници во злосторствата извршени таму“, изјави австрискиот канцелар Карл Нечамер.

„Со овие мерки, ние ги удираме олигарсите токму онаму каде што тие ги повредуваат нивните пари“, додаде тој.

The post Австрија го замрзна имотот на руските олигарси за вкупно 254 милиони евра appeared first on Република.

Се истражува мистериозната смрт на двајца руски олигарси и нивните семејства кои биле пронајдени мртви во рок од неколку дена.

Рускиот милионер Сергеј Протосења и неговото семејство се пронајдени мртви во нивната вила во Љорет дел Мар. Полицијата се сомнева дека  55-годишниот Протосења ги убил сопругата и ќерката со секира и нож, пред да се обеси. Неговото тело е пронајдено во дворот на вилата.

Протосења седум години бил потпретседател на руската компанија за природен гас „Новатек“ и неговото богатство се проценуваше на 330 милиони долари.

Претходно, во стан во Москва во понеделникот биле пронајдени телата на уште еден руски мултимилионер и на неговите сопруга и ќерка. Медиумите во Русија објавија дека 51-годишниот Владислав Авајев бил застрелан, исто како и трудната сопруга Јелена и 13-годишната ќерка Марија. Според сознанијата на полицијата Авајев го убил своето семејство, по што се самоубил, но полицијата истражува и други траги.

Авајев беше потпретседател на „Газпромбанк“, третата најголема банка во Русија, пред ненадејно да поднесе оставка. Тој исто така порано бил функционер во Кремљ.

The post Се истражува мистериозната смрт на двајца руски олигарси и нивните семејства кои биле пронајдени мртви во рок од неколку дена appeared first on Република.

Белата куќа најави нови санкции против руските олигарси, а како што пишува Си Ен Ен, тоа е нов обид на американскиот претседател Џо Бајден да го спречи рускиот колега Владимир Путин и неговата инвазија врз Украина.

На новиот список на санкционирани се наоѓаат пријатели на Путин и членови на нивните семејства, кои ќе бидат отстранети од американскиот финансиски систем, нивниот имот во САД ќе биде замрзнат и блокиран, соопшти Белата куќа.

Станува збор за осум членови на руската елита, а меѓу нив е и еден од најбогатите во Русија – Алишер Усманов. Нему ќе му бидат блокирани и неговата супер-јахта и приватен авион, објави Си Ен Ен.

САД ќе го санкционираат и портпаролот на Кремљ, Дмитриј Песков, кого Белата куќа го опишува како „најголем продавач на пропагандата на Путин“.

– САД и владите низ светот ќе работат заедно за да ја идентификуваат руската елита и да ги замрзнат нивните средства што се чуваат во тие земји – јахти, луксузни станови, пари и други профити, соопшти Белата куќа.

Ова е списокот на руските олигарси кои ќе бидат санкционирани:

– Николај Токарев (заедно со неговата сопруга Галина, ќерката Маја и неговите две компании за луксузни недвижности)
– Борис Ротенберг (заедно со неговата сопруга Карина и синовите Роман и Борис)
– Аркадиј Ротенберг (заедно со синовите Павел и Игор и ќерката Лилија)
– Сергеј Чемезов (заедно со неговата сопруга Екатерина, синот Станислав и поќерката Анастасија)
– Игор Шувалов (заедно со неговите пет компании, сопругата Олга, синот Евгениј и неговата компанија и авионот и ќерката Марија и нејзината компанија)
– Евгениј Пригожин (заедно со неговите три компании, сопругата Полина, ќерката Љубова и синот Павле),
– Дмитриј Песков, портпарол на Путин
– Алишер Усманов (неговата супер-јахта, една од најголемите во светот што штотуку ја заплени Германија, и неговиот приватен авион, еден од најголемите руски авиони во приватна сопственост)

САД ќе воведат и визи за 19 олигарси и 47 членови на нивните семејства. Тоа ќе биде насочено кон олигарсите за кои е познато дека финансираат, значително поддржуваат или спроведуваат злонамерни активности кои ја поддржуваат дестабилизирачката надворешна политика на Русија, пишува Си Ен Ен.

Британската Влада денеска, исто така, соопшти дека воведува санкции за милијардерот бизнисмен Алишер Усманов и поранешниот руски вицепремиер Игор Шувалов, како дел од казнените мерки поради инвазијата на Москва врз Украина.

Двајцата олигарси, која поседуваат имот од 19 милијарди долари (14 милијарди фунти) и имаат „значајни интереси во Британија и блиски врски со Кремљ“, се „санкционирани со моментален ефект“, соопшти британското Министерство за надворешни работи. гт/

The post И најбогатиот Русин во немилост на САД и Британија: Санкционирани нова тура олигарси appeared first on Република.

Јапонија ќе го замрзне имотот на руските олигарси блиски до претседателот Владимир Путин, додека Токио ги заострува санкциите поради руската инвазија на Украина, објави јапонскиот премиер Фумио Кишида.

Кишида рече дека Јапонија додава олигарси на листата на санкции како дел од заедничките напори на САД и европските земји и дека со тој чекор ќе се замрзне имотот на Путин и на највисоките функционери во неговата влада.

Тој додаде дека Јапонија исто така исклучува седум руски банки од меѓународниот платен систем СВИФТ.

„Руската инвазија е едностран обид насилно да се промени статус квото и да се разнишаат темелите на меѓународниот поредок, не само во Европа и Азија“, рече Кишида.

Јапонија, која сака да ја врати контролата врз некои острови контролирани од Русија, што ги спречува двете земји да потпишат мировен договор со кој формално би завршиле нивните непријателства во Втората светска војна, претходно не сакаше да воведе строги санкции кон Русија.

The post Јапонија ќе го замрзне имотот на руските олигарси блиски до Путин appeared first on Република.

Суперјахтите во сопственост на руски милијардери поврзани со претседателот Владимир Путин се во движење додека САД и нивните сојузници подготвуваат дополнителни санкции за нивниот имот по инвазијата на Украина.

Податоците од Марин трафик прегледани од Си-ен-би-си покажуваат дека најмалку четири суперјахти во сопственост на руски бизнис-лидери се движат кон Црна Гора и Малдивите откако во последните денови беа објавени широк спектар санкции.

Вагит Алекперов, претседателот на руски Лукоил, со својата јахта плови кон Црна Гора, соопшти Марин трафик. Се очекува да стигне од Барселона во наредните денови.

Јахтата на Алекперов е позната како „Галактика супернова I“, според страницата Суперјахт фан, која ги следи овие типови пловила, има „базен со стаклено дно од шест метри и водопад. Има и хелиодром, лифт и голем клуб“.

Според Форбс, Алекперов има нето-богатство од нешто помалку од 25 милијарди долари.

Црна Гора е членка на НАТО и кандидат за членство во ЕУ и најави дека ќе се приклучи на санкциите на ЕУ против Русија.

Најмалку три јахти на руски милијардери се приближуваат кон Малдивите.

Оваа островска држава со години е жариште на туристи од Русија, а министерот за туризам на Малдиви изјави дека руската инвазија ќе има големо влијание врз нејзиниот туристички сектор.

Јахтата на милијардерот Олег Дерипаска, позната како „Клио“, ја напушти Шри Ланка пред речиси две недели и се очекува наскоро да пристигне на Малдивите, соопшти Марин трафик.

САД во 2018 година ги санкционираа Дерипаска и компаниите поврзани со него. Тој беше еден од неколкуте милијардери со седиште во Русија што се спротивставија на конфликтот во Украина.

„Мирот е приоритет. Преговорите мора да почнат што е можно поскоро“, напиша на Твитер Дерипаска, кој има проценета нето-вредност од околу 4 милијарди долари.

Малдивите немаат договор за екстрадиција со САД.

Според Си-ен-би-си, имотот на погодените руски раководители најверојатно ќе добие нов удар, бидејќи администрацијата на американскиот претседател Џозеф Бајден неодамна најави создавање работна група што ќе се занимава со нивните профитабилни средства, вклучувајќи јахти и вили.

Франција составува список на имоти во сопственост на руски олигарси, вклучувајќи автомобили и јахти, кои би можеле да бидат запленети под санкциите на Европската Унија.

„Оваа недела ќе почнеме мултилатерална трансатлантска работна група за да ги идентификуваме, пронајдеме и замрзнеме имотите на санкционираните руски компании и олигарси - нивните јахти, нивните вили и сите други незаконски профити што можеме да ги најдеме и да ги замрзнеме“, соопшти неодамна Белата куќа.

Некои од најбогатите во Русија сега ги преместуваат своите јахти и бродови на други локации, надевајќи се дека ќе избегнат нивно одземање.

The post Малдивите и Црна Гора ќе ги вдомат јахтите на руските олигарси appeared first on Република.