На амбасадорката на САД Кејт Мери Брнз и посакувам многу успех и среќа во професионалниот и приватниот живот. Таа успешно го завршува својот мандат во Скопје за чие време даде огромен личен придонес во унапредување на политичките процеси во земјава, напиша премиерот Ковачевски на испраќањето на амбасадорката.

The post Koвачевски ја испрати Брнз appeared first on Република.

Во чест на Илинден, амбасадорката на САД во Македонија Кејт Брнз денеска положи свежо цвеќе на Меморалниот центар на АСНОМ.

Честит Илинден! Претставници на Амбасадата, исто така, се приклучија на официјалните церемонии во Крушево и Пелинце во чест на оние кои се бореа за независност, се вели во објавата на фејсбук-страницата на Амбасадата на САД во земјава.

The post Амбасадорката Брнз положи цвеќе на Меморалниот центар на АСНОМ appeared first on Република.

Кога се работи за пристапувањето во ЕУ тоа е разговор кој треба да го водат Cеверна Македонија и Унијата, а Вашингтон отсекогаш го поддржувал пристапувањето на Cеверна Македонија во ЕУ, порача во интервју за МИА, американската амбасадорка Кејт Мари Брнз и изрази надеж дека францускиот предлог ќе биде компромис што ќе ги отвори следните чекори.

Амбасадорката на САД во Cеверна Македонија деновиве е во Вашингтон. Дописникот на МИА имаше можност да разговара со неа за тековните прашања, дискусии и нејаснотии што се појавија кај македонската јавност околу европскиот предлог за старт на претпристапниот процес за членство на Cеверна Македонија во ЕУ. Разговорот го водевме во американскиот Стејт департмент, а на прашањето дали САД се запознаени со содржината на протоколот и дали е тој нешто за кое македонските граѓани треба да бидат загрижени, Брнз одговори дека тие на процесот гледаат одвоенo и секогаш истакнувале дека билатералните прашања треба да бидат решавани надвор од преговарачката рамка.

„Нашата позиција е многу јасна, нашата оценка е дека предлогот го штити интересот на Cеверна Македонија во пристапниот процес. Тоа е наше и мислење на нашите експерти. Билатералниот протокол за кој говорите, до некаде изгледа дека е споен во овие два процеса. Билатерален договор меѓу Скопје и Софија треба да има. Слушнавме како некои нешта се нафрлаат. Мислам дека ова е дел од забуната, тоа што напоменавте дека јавноста не е сигурна какви ќе бидат тие дискусии. Ќе има посебни дискусии, и мислиме дека тие прашања треба да бидат решени на билатерална основа и тоа го кажавме уште на почетокот. Секако не само за влезот во ЕУ, туку и за вашата долгорачна стабилност важно е тие прашања да се решат, истакна Брнз“.

Во интервјуто таа се осврнува на протестите во Скопје, на загриженоста дека со предлогот се задира во идентитетот и историјата, на предлогот на Едвард Џозеф, кој сугерираше дека ако европскиот предлог го признава македонскот јазик и идентитет, САД треба да ги поткрепат своите добри намери со правење на истото – да го признаат македонскиот јазик и идентитет.

Еве го интервјуто со амбасадорката Кејт Мари Брнз:

Францускиот предлог за почеток на преговорите на земјава со ЕУ ги возбуди духовите во Cеверна Македонија, се шират разни шпекулации. Македонската опозиција излезе на протести и бара власта да не го прифати предлогот поради претензии од страна на Бугарија околу идентитетот и историјата. Може да ја коментирате ситуацијата?

Амбасадор во земјава сум веќе три години и дел од мојот мандат е поддршка на интеграцијата на Cеверна Македонија во ЕУ. Се изоди тежок пат со пристапувањето во НАТО и следниот стратешки чекор за земјата е членство во ЕУ. Многу сме задоволни од тоа што веќе подолго време ЕУ истакнува дека Cеверна Македонија е подготвена да пристапи. Како и многу државјани на Cеверна Макаеднија, и САД исто така очекуваа процесот конечно да започне. Тоа што го видовме преку дипломатски ангажмани во изминатите месеци меѓу Брисел и Cеверна Македонија, како и меѓу други земји-членки, е дека имаше прогрес во изнаоѓање на решенија и одење напред.

Не бевме дел од тоа, но како што знаете САД, редовно ја истакнуваа поддршката за изнаоѓање начин да се овозможи Cеверна Македонија да го започне пристапниот процес. Во тој контекст ја гледам понудата со европскиот предлог, како можност за конечен старт на она што се надевавме подолго време. Моментално, САД ја следат ситуацијата во Cеверна Македонија и дебатата во јавноста, очекуваме да има дискусија во парламентот следните денови. Важно да се истакне е дека една од поентите што државниот секретар Блинкен ја истакна во заедничката изјава со високиот претставник на ЕУ, потпретседателот Жозеп Борел беше токму тоа. Се надевме дека предлогот ќе биде компромис што ќе ги отвори следните чекори.

Опозицијата и дел од македонската јавност не се загрижени толку од сaмиот предлог, туку од некои негови скриени делови кои сеуште не се објавени. Се работи за протоколот, за кој се оценува дека е дел од преговарачкиот процес. Некои во тоа гледаат нагази мини што можат да бидат користени од Софија за кочење на процесот, да се бараат разни неприфатливи барања поврзани со идентитетот и историјата. Дали САД се запознаени со содржината на овој протокол? Дали е тој нешто за кое македонските граѓани треба да бидат загрижени?

На процесот гледамe одвоенo. И секогаш сме истакнувале дека билатералните прашања треба да бидат решавани надвор од преговарачката рамка. Нашата позиција е многу јасна, нашата оценка е дека предлогот го штити интересот на Cеверна Македонија во пристапниот процес. Тоа е наше и мислење на нашите експерти. Билатералниот протокол за кој говорите, до некаде изгледа дека е споен во овие два процеса. Билатерален договор меѓу Скопје и Софија треба да има. Слушнавме како некои нешта се нафрлаат. Мислам дека ова е дел од забуната, тоа што напоменавте дека јавноста не е сигурна какви ќе бидат тие дискусии. Ќе има посебни дискусии, и мислиме дека тие прашања треба да бидат решени на билатерална основа и тоа го кажавме уште на почетокот. Секако не само за влезот во ЕУ, туку и за вашата долгорачна стабилност важно е тие прашања да се решат.

Да нема такви преседани во ЕУ за проширувањето, вклучувајќи билатерални прашања…

Македонија и Бугарија се соседи, сојузници во НАТО, тие инвестираат во заемната иднина и безбедност, така што тие прашања треба да бидат адресирани во накоја форма, и тоа треба да се решава и тоа се прави, надвор од преговарачкиот процес. Да се навратиме на нашата прва поента, тоа една од причините зошто мислиме дека францускиот предлог ги штити интересите на Cеверна Македонија, затоа што прави издвоеност.

Вашето отворено писмо до јавноста главно беше прифатено позитивно. Едвард Џозеф, напиша блага критика на вашите ставови, сугерирајќи дека ако европскиот предлог го признава македонскот јазик и идентитет, САД треба да ги поткрепат своите добри намери со правење на истото – да го признаат македонскиот јазик и идентитет, наспроти негирањето од страна на Бугарија. Според Џозеф, ова може да се направи преку билатерален културен договор, со преземање на текстот од Преспанскиот договор. Дали ова е возможно?

Се соочуваме со специфична одлука што Cеверна Македонија сега треба да ја донесе, а во однос на влезот во ЕУ и дали предлогот ставен на маса е добар за одење напред. Понатаму, дали тој предлог го почитува македонскиот идентитет и јазик. Според наше мислење – да, го почитува. Имаше неколку изјави не само од високи ЕУ лидери, туку и од лидери на земји-членки кои исто така ја признаваат вредноста на овој предлог, тоа што го признава македонскиот јазик и идентитет. А тоа е важно за граѓаните на Cеверна Македонија, да размислат додека ја носат оваа одлука, и тоа е одлука што тие ја носат.

Во врска со прашањето за ангажманот на САД со Cеверна Македонија. Ова исто така е важна тема, но не може да биде замена за односите меѓу вашата земја и ЕУ. Кога станува збор за тоа, САД и Cеверна Македонија имаат многу силна билатерална врска, ние сме презадоволни што минатиот месец ја засиливме таа врска со Стратешкиот дијалог овде во Вашингтон. Се разгледаа многу прашања, вклучително и прашања од културата. Начини за соработка во нови области со што се прошируваат односите. Ние одамна го признаваме македонскиот јазик и идентитет. Подготвуваме дипломати кои го учат македонскиот јазик, со македонски учители. Доделуваме грантови за поддршка на проекти од културата, како заштита на наследството во Cеверна Македониј, вклучително и заштита на македонското наследство и други прашања. Всушност, меѓу Cеверна Македонија и САД има договор за културата потпишан во 2010 година. Едно од прашањата поставени во стратешкиот дијалог е како да се употреби овој договор за да се дооформат некои тековни и да се започнат нови проекти.

Значи, пак ќе повторам, бидејќи ова е толку сложено и тешко прашање многу работи се испреплетени. Постои вредност во сите овие нешта. Билатералата не е единствена авенија со која соработуваме со Cеверна Македонија. Тука исто така се односите по НАТО, што се посебно значајни за нас. Неодамна започнавме да ја поддржуваме и иницијативата Отворен Балкан, и каква улога САД можат да имаат во неа. Она што го сакаме е четвриот столб од сето ова, е да го поддржиме пристапувањето на Cеверна Македонија во ЕУ, затоа што тоа е важен столб, и не сакаме можноста да биде пропуштена.

Во врска со отвореното писмо. Ние како влада на САД со децении држиме позиција на поддршка на земјата за влез во ЕУ, како дел од нејзината европска иднина. Во последните неколку години сме повеќе вклучени во тоа. Имаше изјави и од администрацијата на Бајден. Заменичката-државен секретар Карен Донфрид го истакна ова кога го посети Скопје во мај. Проширувањето на ЕУ е стратешка цел на САД, посебно влезот на Cеверна Македонија и Албанија во Унијата. Кога предлогот беше испратен до Cеверна Македонија, се постави прашањето каква е позицијата на САД по овој предлог, дали го поддржувате и зошто. Тоа прашање го одговаравме за повеќе политички лидери, за експертите и аналитичарите и наша намера е овој разгвор да се води и со граѓаните. И тоа е рационална прашање, зошто САД, кои не се членка на ЕУ, го поддржуваат овој договор, каква вредност гледаат во него и тоа да се искористи да се донесе одлука и дали таа одлука е добра за нив. Мислевме дека е важно да се објави ова јавно.

Бидејќи имаше многу прашања дали тоа е важно, дали односите со САД може некако да променат нешта во предлогот? Беше важно луѓето да разберат дека кога се работи за пристапувањето во ЕУ, тоа е разговор кој треба да го водат Cеверна Македонија и ЕУ. Немаме место на таа маса. Но САД имаат интерес во тоа вие да добиете место на таа преговарачка маса и да го искажате тоа што е важно за Cеверна Македоннија на почетокот на процесот. Тоа е причинита што ние излеговме да кажеме, додека има можност да седнете на масата ние се надевам дека ќе размислите за оваа можност. Затоа што ова го сметаме за важен дел од тоа демократско и евроатлантско патување. Мислам дека ова е патеката со која ќе ја осигурате не само вашата иднина во ЕУ, туку и вашата македонска иднина. Бидејќи предлогот всушност го дава признавањето на македонскот јазик и идентитет, конечно, она што го баравте одамна. Да не напоменувам и за придобивките што доаѓаат со почетокот на пристапниот процес, експерти од Брисел да дојдат кај вас, ваши експерти да одат таму, скрининг процесот итн. За можноста вие да почнете да давате правила тон на дискусијата, каде наместо да ја чекате поканата конечно да имате можност да го користите вашиот глас.

Очигледно е дека многу луѓе подлегнуваат на лажните вести што се шират по социјалните мрежи. Дали се согласувате се претседателот Стево Пендаровски дека странски актери од трети земји водат кампања на дезинформации во Cеверна Македонија во обид да се прават поделби во јавноста и да се дестабилизира ситуацијата?

Немам информации за тековната ситуација околу ова. Сепак, дезинформациите и манипулациите се проблем во сите наши општетсва. Како и вие во Cеверна Македонија, со тоа се судираме во однос на секој голем политички проблем и овде во САД. Дезинформацијата и погрешната информација се употребувале во минатото. Затоа е мошне важно да се има веродостојни извори, да се прави транспарентна јавна и парламентарна дебата. Важно е вистинската информација, вистинско читање за тоа од што има во документите (за пристапниот процес) да биде презентирано и луѓето да имаат можност да одговорат.

Претседателот Бајден лани во јуни издаде извршна наредба со цел санкции и забрана за влез во САД на лица кои учествуваат во дестабизлиација на Западен Балкан. Некои политичари од Бугарија со нивната поддршка за ветото, и со изјавите за негирање на македонската државност, историја и јазик ја поткопуваат политичката стабилност во Cеверна Македонија. Пратениците од бугарската националитичка партија Преродба, неодамна во собранието на Бугарија истакнаа транспаренти со натпис „Македонија е Бугарија“. Дали лицата како нив можат да бидат предмет на извршната наредба на претседателот Бајден издаден во јуни 2021 година?

Не мислам дека тоа е намерата на наредбата на претседателот, која пред сѐ се фокусира на националнита безбедност на САД и дали се нарушуваат нашите интереси во регионот. Овие случаи за кои зборувате се специфични и сигурна сум дека ќе има дискусија во Cеверна Македонија и за тоа, но не сметам дека тие можат да бидат предмет на извршната уредба со санкции. Има разлика меѓу слободниот говор и говорот на омраза, разликата овде важна, но навистина тоа е до вашата земја да одлучи како да влијае на нештата.

The post Кејт Брнз: Предлогот го штити интересот на Македонија во преговорите со ЕУ appeared first on Република.

Премиерот  Димитар Ковачевски заедно со министерката за одбрана, Славјанка Петровска и амбасадорката на САД во нашата земја, Кејт Брнз, денеска го посетија носачот на авиони „Хари С. Труман“ – воен брод со капацитет да носи 90 авиони или хеликоптери, со носивост од 100 000 тони и од генерацијата на најголемите бродови-носачи на Соединетите Американски Држави.

Ковачевски изјави дека е особено горд на посетата со која, како што вели, ја демонстрираме поддршката за операциите на американските поморски сили во Европа.

Со нашето присуство на носачот на авиони „Хари С. Труман“, дел од НАТО флотата на Медитеранот го демонстрираме нашиот и капацитетот на нашите стратешки партнери, одбранбен капацитет, кои се дел од системот на Алијансата. Македонија е дел од комплексниот систем за ефикасни оперативни задачи, насочен кон обезбедување ефикасна колективна одбрана и одржување на безбедноста. Нашата земја, заедно со партнерите, од најголемиот безбедносен и одбранбен сојуз во светот учествува и ќе продолжи активно да учествува во глобалните процеси за обезбедување мир, слобода и суверенитет. Ние, заедно со НАТО-сојузниците ги јакнеме нашите позиции за справување со сите конвенционални и неконвенционални закани и предизвици за сигурноста, безбедноста и за мирот, истакна Ковачевски.

Како што соопшти владината прес-служба, премиерот посочи дека безбедноста на една држава, нејзината стабилност, мирот и стабилноста во регионот е еден од основните услови кои обезбедуваат економски развој, просперитет и квалитетен живот за граѓаните и додаде дека заедно со нашите сојузници од НАТО силно стоиме на позициите дека нашето заедништво е нашата најголема придобивка, гаранција за нашиот територијален интегритет и сигурност и воедно обезбедува перспектива и иднина за граѓаните.

Тоа го докажавме и со нашето единство и во пружањето поддршка, хуманитарна помош и медицински материјали за граѓаните на Украина, кои последните месеци се соочуваат со воената агресија од страна на Русија. Војната во Украина покажа дека нашата одлука за членство во НАТО беше успешна стратешка цел и ве уверувам дека продолжуваме во нашата определба за зголемување на безбедноста и јакнење на демократијата, за исполнување на евроинтеграциската стратешка цел. Заедно со членките во НАТО, покажувајќи несебична солидарност, учествуваме во обезбедувањето и зајакнувањето на демократските вредности, стандарди и права на сите граѓани, на сите земји на кои им е потребно. Денес, повеќе од видливо е дека со овој наш стратешки влог, вложуваме во долгорочниот развој на нашата земја, ја обезбедуваме иднината на нашите деца, како рамноправен дел од најмоќниот воен сојуз во светот изграден и заснован на највисоките цивилизациски демократски вредности, истакна Ковачевски.

The post Ковачевски: Заедно со НАТО-сојузниците ги јакнеме нашите позиции и обезбедуваме сигурност, безбедност и мир за нашите граѓани appeared first on Република.

Чувајте ги полициските службеници да останат мотивирани, како што биле кога влегле во службата, потенцираше Кејт Мари Брнз, амбасадор на САД во Македонија на предавањето на акредитацијата на Меѓународната асоцијација на директори на Полициски академии за стандарди и обуки (ИАДЛЕСТ).

Успешен исчекор на Центарот во неговото целосно етаблирање како кредибилен, професионално оспособен и специјализиран образовен сегмент, чија неопходност е директно поврзана со успешното функционирање на министерството, односно сите негови полициски служби и организациони единици.
Ова раководство на МВР е решено континуирано да го унапредува статусот на полициските службеници и вработените во МВР, како преку драстичното и сеопфатно материјално-техничко и инфраструктурно подобрување на условите за работа, така и со спроведувањето на гарантираните права на сите вработени, секогаш имајќи го предвид фактот дека само задоволна полиција претставува ефикасен сервис на граѓаните, работи со полн капацитет и легитимитет и испорачува резултати во активностите за справување со криминалот, велат од МВР.

The post Брнз до Спасовски: Чувајте ги полициските службеници да останат мотивирани, како што биле кога влегле во службата appeared first on Република.

Кејт Брнз, американската амбасадорка во Скопје денеска на конференција пред судиите изјави дека македонските граѓани немаат доверба во судството. Повикувајќи се на неодамнешна анкета на „Еуротинк“ дека само 8 отсто од граѓаните имаат доверба во судството, таа изјави дека е неопходно да се врати довербата кај граѓаните да видат дека системот функционира.

Не е тајна дека јавноста не верува во судството. Всушност, неодамнешна анкета на ‘Еуротинк’ покажа дека само 8 отсто од граѓаните на Македонија имаат доверба во судството и обвинителството. Очигледно, има многу за работа, вклучувајќи судски реформи и зајакнување на институциите, но исто така треба да се адресираат и перцепциите – луѓето треба да видат и да почувствуваат дека системот функционира. Граѓаните мора да се бидат уверени дека нивните случи ќе бидат сослушани од неутрални и независни судови во разумен рок. Ова е основен принцип во секоја слободна и функционална демократија, рече Брнз на меѓународната судска конференција „Судска независност низ реформскиот процес – очекувања и реалност“ во Скопје.

Според неа, судството мора да биде ефикасно, независно и да го спроведува законот еднакво за сите доколку сака да ја врати довербата на граѓаните.

Враќањето на довербата на јавноста може да се постигне само ако сите судии прават повеќе од она што се очекува од нив кога ја дале заклетвата, вели Брнз.

The post Брнз до судиите: Јавноста нема доверба во судството, потребни се реформи appeared first on Република.

Проблемот може да се реши за шест дена, а седмиот ќе одмараме.

Ова беше брзиот рецепт на првиот вицепремиер и министер за политички систем и односи меѓу заедниците, Артан Груби, со кој не така одамна не убедуваше дека толку брзо може да се решат недоразбирањата со Бугарија за конечно отпочнување на преговорите на Македонија за членство во Европската унија. За луѓето, кои ги знаат работите околу спорот стар повеќе од едно столетие, ова беше чиста илузија, што само го отсликув аше елементарното непознавање на работите на Груби.

Сега, само месец-два подоцна од таа повеќе комична, отколку несреќна изјава, Груби врти нова страница. Од соопштението, што по вчерашната средба со амбасадорката на САД во Скопје, Кејт Мери Брнс, го издаде неговиот кабинет, може да се види дека првиот вицепремиер и министер барал помош токму за надминување на спорот со Бугарија.

-Тие разменија мислења и за отворениот спор со Република Бугарија. Во оваа прилика Груби ја истакна потребата на уште поголема американска и европска помош кога се работи за спорот меѓу Скопје и Софија, како и потребата Владата да го задржи реформскиот курс, стоеше меѓу другото во соопштението.

Е, како одеднаш Груби бара помош од нашиот стратешки партнер и од ЕУ? И за што? Да извршат само притисок врз Софија или они да ги решат главните историски и идентитетски прашања, што се наметнаа со потписот на Зоран Заев на целосно асиметричниот Договор за добрососедство, пријателство и соработка? Та нели работата беше толку едноставна, анализира „Пресинг ТВ“.

Додека чекаме одговори на прашањата, во меѓувреме ќе се забавуваме со други глупости на Груби, што ја отсликуваат неговата антилогика, но пред се ниското политичко ниво на комуникација со албанскиот дел од електоратот.

На 3 март годинава, Груби за ТВ Клан истресе уште една „зелена“, што некако остана без соодветни реакции во јавноста. Говорејќи за кризата во Украина и војната, што се одвива таму, изјави дека обидот на обединетата албанско-македонска опозиција да ја урне Владата, заедно со Левица, било сценарио подготвено од Русија. Како што утредента пренесе Индекс.мк, Груби меѓу другото, рекол:

-Тоа беше сцена кога 61-годишник се појави, за да ја урне власта, но денеска се зборува дека тоа било руско сценарио.

Вакво поигрување со интелигенцијата и на Македонците и на Албанците одамна немало на овие наши простори. Се разбира, со исклучок на онаа забелешка на министерот за надворешни работи Бујар Османи, поврзана со младоста, полот и етничката припадност на несудената конзулка во Њу Џерси, Бесмира Ејупи.

Ако се врати филмот наназад, од изјавата на претседателот Стево Пендаровски може да се заклучи дека власта ги имала информациите за војната во Украина уште на 5 ноември. Значи, уште пред обидот за формирање ново парламентарно мнозинство.

Но, според антилогиката на Артан Груби, тогаш и оставката на партиската и на премиерската позиција на Зоран Заев била дел од таквото руско сценарио! А, таа, за потсетување, беше резултат на катастрофалниот пораз на локалните избори, што со други зборови значи и дека народот, кој излегол на избори и се изјаснил како што се изјаснил, без оглед на неговата партиска, етничка или било каква друга припадност, бил дел од тоа исто руско сценарио! Ама за тоа никој, па ни првиот вицепремиер не зборува! И не може да зборува, зашто е плиток во објаснувањата, со што ги навредува најмногу самите Албанци, се наведува во анализата на „Пресинг ТВ“.

Извор: Pressing TV

The post Груби се фалеше дека спорот со Бугарија ќе го реши за шест дена, а седмиот ќе одмара, а сега бара помош од амбасадори appeared first on Република.

Премиерот Димитар Ковачевски ја прими амбасадорката на Соединетите Американски Држави Кејт Мари Брнз.

Премиерот Ковачевски и амбасадорката Брнз разговараа за ситуацијата во Украина при што истакнаа дека воената агресија на Руската Федерација на една суверена земја е сериозна закана за мирот и безбедноста во Европа и во светот која како таква ја оцени огромен дел од меѓународната заедница.

На средбата беше истакнато дека во ова време на кризна состојба во светот вредноста и придобивките од членството на Република Македонија во НАТО, и од стратешкото партнерство со САД се од исклучително значење.

Премиерот Ковачевски во разговорот со амбасадорката Брнз ги презентираше мерките на Владата за справување со последиците од економската и енергетската криза, кои дополнително се усложнуваат со војната во Украина, и истакна дека станува збор за сеопфатни мерки таргетирани да ја заштитат социјалната сигурност и стандардот на граѓаните, како и да обезбедат стабилни услови за работа на компаниите.

Амбасадорката Брнз нагласи дека сегашната безбедносна криза во Европа укажува на потребата од континуиран фокус на регионот и на Македонија, вклучувајќи ја и Европската интеграција на земјата.

The post Ковачевски – Брнз: Во ова кризно време, членството во НАТО и стратешкото партнерство со САД се од исклучително значење appeared first on Република.

Владеењето на правото е основа за сите демократски институции, за економскиот просперитет и најважно за безбедноста.Тоа е основен фактор што гарантира дека се исполнуваат потребите на граѓаните. Со нашите програми и канцеларии тука се трудиме да ја поддржиме владината агенда за примена на владеењето на правото, особено напорите за гаранција на независноста и функционалноста на судството.

Ова го истакна вечерва амбасадорката на САД во земјава Кејт Мари Брнз во интервју за ТВ21. Според неа, демократските реформи и примената на владеење на правото се нешто што бара многу труд, смелост и енергија, за на крајот да се успее и да се искорени корупцијата и втемелениот кронизам кои го спречуваат напредокот и да се решат дел од темелните проблеми со кои Владата мора да се справи.

-Сметам дека не постои само една пречка за напредокот, туку дека системот е отворен и ранлив на повеќе места. За да бидете успешни, мора да се нападне секое ниво на институционалните структури и на системот. Тоа значи дека е потребна комбинација на промовирање на транспарентност, да им се прикаже на граѓаните и на гласачите што всушност се случува. Македонија има потреба од систем на одговорност. Ова се однесува на структурата на судството, но и на личностите кои се на одредена функција. Тие личности мора да бидат квалификувани за нивните позиции и мора да сносат одговорност за работата на тие позиции, вели амбасадорката.

Таа посочи дека итно мора да се завршат случаите покренати од поранешното Специјално јавно обвинителство, да се обработат во системот и да се види правда во тие случаи.

-Сметам дека искуството и особено тоа што уште има случаи од поранешното СЈО кои се во системот, покажува дека луѓето сакаат правда. Сакаат случаите да поминат низ системот, да бидат обработени од способни професионалци, без политичко мешање и со конечно решение со кое ќе се одреди одговорноста за криминалот што ќе се докаже дека бил извршен, вели Брнз.

Амбасадорката на САД, посочи дека „треба да се одреди каде постои корупција и потоа да се справиме со неа“. Според Брнз, во секоја држава мора да постои национално решение, но постојат и начини за соработка како можност да се внесат најдобрите пракси и заедничката експертиза кои, вели, ќе ни помогнат да се поддржиме меѓусебно и да се справиме со прашањата.

-Сметам дека во Македонија се гледа многу динамична дискусија за корупцијата и опасноста од корупција на секое ниво. Би рекла дека тоа е сигнал дека вашата демократија е жива и силна. Секако, справувањето со корупцијата е тешко и напорно и нема да Ве лажам. На демократиите им треба постојано внимание. Бараат постојана работа, особено кога се работи за дел од овие проблеми, кои се поврзани со интересите на некои луѓе и културолошките пракси кои мора да се променат. Но, сметам дека е важно што имате многу гласно и енергично граѓанско општество и НВО-сектор, кои ја присилуваат Владата да одговори на дел од овие прашања. Тоа е огромно барање, а луѓето бараат резултати и дејствување, порача американската амбасадорка Брнз

The post Aмериканската амбасадорка побара итно да се завршат случаите на поранешното СЈО appeared first on Република.

Треба да се премине на отворање на пристапните преговори со Европската Унија и Македонија да напредува од сите аспекти, порачува амбасадорката на САД во земјава Кејт Мари Брнз.

-Влегувањето на Македонија во НАТО беше голем исчекор и веќе ги гледаме резултатите од тој потег на терен. Затоа нам ни е важен и следниот чекор, Македонија и целиот Западен Балкан да се придвижи кон единствена, безбедна Европа. Тоа значи интеграција во евроатлантските институции. Мислам дека зборувате за вистинската фрустрација, која и јас ја слушам, зашто процесите не се одвиваат доволно брзо, рече Брнз во интервју за ТВ21.

Според неа, едно нешто што се потенцира во моментов е потребата, како што вели, повторно да се придвижат тие процеси, да се забрзаат напорите и да ја видиме Македонија целосно интегрирана.

-Треба да преминеме на отвoрање на преговорите со Европската Унија и да напредува од сите аспекти за не само да се усогласи со институциите на ЕУ, туку и да се остварат аспирациите кои граѓаните ги имаат долго време… Очигледно на граѓаните на Македонија им треба исчекор, не им се потребни дополнителни назадувања. САД уште од почетокот беа многу јасни. Го поддржуваме влезот на Македонија во ЕУ, вели американската амбасадорка.

Таа посочува дека иако САД не се членка на ЕУ, сепак сметаат дека тоа е стратешки интерес на Македонија, на регионот, на ЕУ, па дури и на Соединетите Американски Држави

-Постојано и јасно велиме дека сакаме пристапувањето кон ЕУ да се придвижи, колку што може побргу. Мислам дека гледаме единство и решителност во меѓународната заедница, помеѓу САД и европските партнери и во западната заедница во целина, за важноста на продолжувањето. И не само за да се одржи глобалната безбедност туку и да видиме напредок во заедничката агенда за демократија и владеење на правото. А токму тоа ќе се поттикне со влезот на Македонија во ЕУ, додава Брнз.

Во контекст на односите помеѓу Бугарија и Македонија таа вели дека е охрабрена од обновените дипломатски разговори помеѓу двете земји.

-Охрабрени сме зашто сега постојат и работни групи кои работат не само на решавање на билатералните прашања туку и на воспоставување долгорочна соработка што ќе им оди во корист на граѓаните на двете држави и ќе помогне да се промовира идејата дека пристапниот процес за ЕУ е во најдобар интерес на двете држави, порача Брнз.

Таа истакна дека одржала средби со новиот премиер Димитар Ковачевски и министрите кои се вклучени во преговорите со соседна Бугарија и слушнала дека се посветени да ја искористат можноста да се обидат да ги решат отворените прашања.

-Имав шанса да се видам со новиот премиер и со повеќе од министрите кои сега се вклучени во повеќе аспекти од разговорите. Од нив чув дека се посветени да ја искористат оваа можност што се создаде со новата влада во Софија, да се обидат да ги решат отворените прашања и да постигнат договор за процесот да може да продолжи и Македонија да ја одржи првата Меѓувладина конференција и потоа да го започне процесот на отворање и затворање на поглавја и задоволување на критериумите за членство во ЕУ, рече амбасадорката Брнз.

Како што дополни, многу внимателно се следат преговорите.

-Искрено, се надеваме дека овие разговори ќе создадат таков импулс и ќе помогнат во премостување на разликите за да може сѐ да продолжи. Откако ќе се одржи Меѓувладината конференција, сакаме да видиме подеднаква итност при исполнување на критериумите и реформите кои се неопходни за крајната интеграција во ЕУ, додава Брнз.

The post Брнз: Македонија треба да ги почне преговорите со ЕУ, охрабрени сме од обновениот дијалог помеѓу Скопје и Софија appeared first on Република.

Американската амбасадорка Кејт Мери Брнз денеска и предаде американско знаме на министерката за одбрана Радмила Шекеринска, како знак на заслуги за одбранбената соработка меѓу Македонија и САД, на церемонија во Скопје што започна со интонирање на химните на двете земји.

Шекеринска е првиот наш министер на кој му е врачено американско знаме како симбол и признание за одличната соработка и зајакнато партнерство и сојузништво со САД.

Благодарение на вашата визија и влијание, Армијата брзо се модернизираше и се движеше напред во целосна НАТО интеграција. Како најнов член на Алијансата, вашата земја веќе е значителен придонесувач кон стабилноста и безбедноста. Под вашето лидерство, двете земји дополнително ја продлабочија меѓусебната соработка како никогаш досега во 28-годишната соработка во одбраната на двете земји, што најдобро ја потврдува развојот на „Криволак“ во најдобра тренинг зона во Европа, истакна амбасадорката Брнз.

Прифатете го ова знаме, што се вееше над Амбасадата на САД во Скопје, рече Брнз, како симбол на наша благодарност и пријателство.

Министерката Шекеринска изрази задоволство што заедно двете држави испишале историја и покажале дека географската оддалеченост од неколку илјади километри може да се претвори во блискост и да се споделуваат исти вредности.

Вредности кои и во овие моменти се на тест. Заедно стоиме на страната на демократијата, правото на избор, мирот и стабилноста во пошироката евроатланска област, каде токму сега еден друг, и на двете земји пријателски народ, бие битка за политичка слобода, да ја определи својата иднина, рече Шекеринска.

Зад денешниот чин и заедничкото пријателство и сојузништво, како што посочи министерката, стојат повеќе од 41-заеднички изведена вежба со приближно пет илјади припадници на нашата и повеќе од три илјади припадници на Армијата на САД, 100-тина школувања и обуки, заедничките планови и видливите резултати во Криволак, проектите за модернизација на Вооружените сили.

За министер за одбрана не постои поголема награда од тоа да работиш и да учествуваш во двата историски резултати од последните две пандемиски години – членството во НАТО во 2020 година и целосна воена интеграција со Алијансата во 2021 година. Овие успеси се наша национална гордост, но тие имаат силен печат од нашиот сојузник и зад нив стои силна американска поддршка и помош. Благодарам што останавме со нас и покрај нас, благодарам што верувавте и кога ние ја губевме вербата, благодарам што постојано дававте поддршка на Министерството, Армијата и на нашата држава, нагласи Шекеринска, изразувајќи уверување дека соработката ќе продолжи и во иднина.

Знамето што денеска и беше врачено на Шекеринска, како и македонското знаме што пред една година го добила од колегите во НАТО, како што рече, ќе сведочат за „искушенијата низ кои поминавме, но и за заедничкиот историски резултат кој е постигнат“

The post Брнз ѝ подари американско знаме на Шекеринска: Двете држави испишаа историја appeared first on Република.

Амбасадорката на САД Кејт Мери Брнз денеска на министерката за одбрана Радмила Шекеринска ќе и го предаде американското знаме како знак на заслуги за одбранбената соработка меѓу Македонија и Соединетите Американски Држави.

– Доделувањето на американското знаме кое се вееше на зградата на амбасадата на САД во Скопје претставува симбол на исклучителните достигнувања во одбранбената соработка и односите меѓу двете земји во изминатите четири и пол години, велат од Министерството за одбрана.

Најавени се обраќања на министерката Шекеринска и амбасадорката Брнз, а настанот ќе се одржи согласно протоколите од Ковид-19.

The post Aмбасадорката Брнз ќе и предаде американско знаме на Шекеринска appeared first on Република.