Еврејски студенти го тужат Универзитетот Харвард затоа што, според нив, дозволил нивниот кампус да стане „бастион на неконтролираниот антисемитизам“.

Харвард е обвинет дека селективно спроведува антидискриминаторска политика за да избегне заштита на еврејските студенти од вознемирување, со игнорирање на нивните молби за заштита и ангажирање професори кои поддржуваат насилство врз Евреите и шират антисемитска пропаганда.

Врз основа на искуството од минатото, незамисливо е Харвард да дозволи која било друга група освен Евреите да биде цел на слична злоупотреба или дека ќе дозволи, без одговор, студентите и професорите да повикуваат на уништување на која било друга земја освен Израел, се наведува во тужбата, пренесува „Хина“.

Универзитетот е обвинет за кршење на федералниот Закон за граѓански права, кој забранува дискриминација.

Тужбата е поднесена осум дена откако претседателката на Харвард, Клодин Геј поднесе оставка. Таа беше цел на критики за нејзиниот одговор на антисемитизмот по нападот на Хамас врз Израел на 7 октомври 2023 година и се соочи со обвинувања.

Од избувнувањето на војната меѓу Израел и Хамас, академските институции ширум светот се соочуваат со спорови околу слободата на говорот и правото на протест. Други колеџи, вклучувајќи го и Беркли, се соочуваат со слични тужби.

Студентите велат дека Харвард не може да дозволи „еврејските напади“ да ескалираат поради наводната потреба да им се дозволи на луѓето слобода на изразување.

Тие изјавија дека пристрасноста на Харвард се протега и на приемните испити, поради што бројот на еврејски студенти наводно е намален за 60 проценти. Повеќе од 30 студентски групи на Харвард потпишаа петиција ден по нападот на 7 октомври, обвинувајќи го Израел.

The post „Кампусот стана бастион на нескротливиот антисемитизам“: Еврејските студенти го тужат Харвард appeared first on Република.

Германскиот канцелар Олаф Шолц во синагогата Бет Цион во Берлин на 85-годишнината од „Кристалната ноќ“, кога беше извршен големиот погром против Евреите, изјави дека е засрамен и огорчен од неодамнешниот бран антисемитски инциденти во Германија, предупредувајќи дека Берлин нема да толерира омраза против Евреите.

- Секој облик на антисемитизам го труе нашето општество, рече Шолц, кој носеше кипа, традиционалната еврејска покривка за глава што е вообичаена во синагогата за мажи.

Шолц ги повика Германците активно да се спротивстават на маргинализацијата или прогонството на Евреите денес.

- И покрај шокантната историја на холокаустот, Евреите продолжуваат да се соочуваат со дискриминација и исклучување, рече Шолц на комеморацијата по повод одбележувањето на Кристална ноќ во синагогата Бет Цион во Берлин.

- Ова е срамота. Тоа ме навредува и длабоко ме засрамува, рече Шолц.

Претседателот на Централниот совет на Евреите, Јозеф Шустер, призна дека, за разлика од пред 85 години, денес еврејскиот живот во Германија е заштитен. Сепак, тој исто така нагласи дека луѓето не сакаат да живеат зад „заштитните штитови“, јави ДПА.

- Сакаме да живееме слободно во Германија, во нашата земја, да живееме слободно во ова отворено општество, рече Шустер.

Забелешките на Шустер се однесуваат на порастот на антисемитските инциденти во Германија во месецот откако исламистичката милитантна група Хамас изврши терористички напади врз Израел. Во средината на октомври, двајца неидентификувани мажи фрлија молотови коктели врз синагога и центар на еврејската заедница во Берлин.

Денешната комеморација во синагогата се одржа под огромни безбедносни мерки. Патиштата беа блокирани, а полицијата беше во синагогата со специјалци и оклопни возила. ссм/

The post Шолц: Засрамен сум и огорчен од антисемитските инциденти во Германија appeared first on Република.

Вашингтон е „длабоко загрижен поради драматичното зголемување на антисемитските инциденти“, изјави специјалниот претставник на САД за следење и борба против антисемитизмот, Дебора Липстад, додека претставник на ЕУ изјави дека антисемитизмот е „длабоко вграден расизам во европското општество“.

„Владите, органите на прогонот и групите на заедницата во Европа, Латинска Америка, Австралија, Јужна Африка, Северна Америка, Русија и на други места пријавија нагло зголемување на антисемитските инциденти, реторика и поттикнувања во последните три недели“, рече Липстад.

Таа додаде дека Евреите биле малтретирани и нападнати во текот на октомври, но и дека имало хакерски напади на еврејски веб-страници, поврзувајќи ги тие инциденти со конфликтот на Блискиот Исток.

Директорот на Агенцијата за фундаментални права на ЕУ, Мајкл О'Флаерти, денеска изјави дека антисемитизмот е „длабоко вграден расизам во европското општество“ што претставува егзистенцијална закана за еврејската заедница на континентот и за основните цели на Европската унија.

The post САД и Европа предупредуваат дека антисемитизмот е во пораст на глобално ниво appeared first on Република.

Постојат различни историски мислења за холокаустот во различни земји, а можевме да посведочиме и на зголемување на бројот на политичари кои го користат холокаустот за свои политички поени. Не сум тука да коментирам што кажала една или друга држава, но важно е да се проценат фактите и она што се случувало во минатото, рече на денешната прес-конференција директорот на ОДИХР, Матео Мекачи, во одговор на новинарско прашање.

Прашан за став во врска со изјавите на денешни политичари, на држава која денес негира дека воопшто испратила Евреи во логорите во Германија и Полска, Мекачи одговори дека ОДИХР не е историска институција, но целта е на конструктивен начин да се придонесе за заедничко разбирање на она што се случувало и да се избегне учество во вакви политички дискусии.

Овде сме за да зборуваме за борбата против антисемитизмот. Пред само неколку дена бев во Аушвиц по повод Меѓународниот ден на сеќавањата на жртвите од холокаустот, каде со свои очи можев да видам колку многу Евреи од сите места од Европа биле депортирани. Мислам дека е важно за нас да се обидеме да продолжиме да го шириме знаењето за тоа што се случило тогаш, и да продолжиме да соработуваме на конструктивен начин со сите соговорници, за да се справиме со ова. Како што споменав, образованието е клучна алатка за да се направи тоа, рече Мекачи.

The post Мекачи: Зголемен е бројот на политичари кои го користат холокаустот за политички поени appeared first on Република.

Антисемитизмот го донесе холокаустот, но не исчезна со холокаустот, ниту пак е поразен. Мораме да ги удвоиме нашите напори да за да се справиме и со тековните предизвици и со заканите коишто се појавуваат. Само преку активна промоција на толеранција и недискриминација можеме да се бориме против антисемитимот, рече денеска претседавачот со ОБСЕ, министерот за надворешни работи Бујар Османи.

Османи во денешното обраќање на Конференција за борбата против антисемитизмот, во рамки на претседавањето со ОБСЕ, што се одржува во Скопје, информираше дека следниот месец Македонија одбележува 80 години од депортација од 7.144 Евреи од Скопје, Битола и Штип во камповите на смртта во Треблинка.

Како што рече, ниту еден од 3.276 Евреи од Битола депортирани во Треблинка не преживеа. Тој посочи дека Меморијалниот центар на холокаустот во Скопје е еден од малкуте центри од ваков вид што постои во светот.

Според шефот на дипломатијата, само преку активна промоција на толеранција и недискриминација можеме да се бориме против антисемитимот.

Затоа ова е наш приоритет во текот на претседавањето со ОБСЕ. Ова претставува добра можност да се набројат сите постигања од регинот на ОБСЕ и да дадеме препораки за тоа што треба да преземеме во борбата против антисемитизмот. Антисемитизмот го донесе холокаустот, но не исчезна со холокаустот , ниту пак е поразен. Оваа отровна омраза продолжува да се јавува на нов начин, потенцираше Османи.

Според Османи, aнтисемитските пораки и холокаустот се користеа како пропаганда во промовирањата и оправдувањата на руската воена агресија во Украина.

Тој е дециден дека се користат и новата технологија, но и социјалните мрежи за ширење на пропаганда и омраза.

Антисемитизмот се појавува и влијае на сите наши општества. Затоа мора да ги интезивираме нашите напори и да го интезивираме одговорот како дел од координирана меѓународна коалиција на засегнатите страни. Справувањето со антисемитизмот е нешто на кое што треба секојдневно да сме посветени и тоа е морална обврска на секого. Се додека во нашите општества не се искористи антисемитизмот никој не е безбеден, додаде Османи.

The post Османи: Антисемитизмот не е поразен, потребна промоција на толеранција и недискриминација appeared first on Република.

Германската турнеја на поранешниот член на Пинк Флојд, Роџер Вотерс, се соочува со зголемени повици да се откаже, наведувајќи го неговиот се поотворен антисемитизам, повиците до музичарите да не настапуваат во Израел и поддршката за рускиот претседател Владимир Путин.

Роџерс ги навредувал и музичарите кои настапуваат во Израел, а на мета на поранешниот басист на Пинк Флојд биле Ник Кејв и Том Јорк од групата Radiohead.

Вотерс не се плаши искрено да го каже своето мислење, дури и за сериозни теми, пишува веб-страницата Rock Celebrity. Иако тврди дека никогаш во животот немал антисемитски мисли, сега се соочува со обвинувања за антисемитизам, што ги доведе во прашање концертите во Германија. Тој се подготвува за турнејата наречена „This is not a drill tour“, во чии рамки на 28 мај треба да настапи во неколку германски градови, меѓу кои и Франкфурт. Сепак, политичарите од Франкфурт, вклучително и градоначалникот Наргес Ескандари-Гринберг, бараат да се откаже неговиот концерт. Од почетокот на војната во Украина, Вотерс го поддржува Кремљ и ги критикуваше западните влади за испраќање оружје во Украина, а го обвини и американскиот претседател Џо Бајден дека го провоцира почетокот на војната.

Не се само концертите во Германија во прашање. Одредени извори во Полска објавија дека двата концерта на Вотерс закажани за април во Полска исто така биле откажани поради неговите ставови за војната во Украина. Тој неодамна испрати отворено писмо до првата дама на Украина, Олена Зеленски, во кое ја критикуваше владата во Киев дека ги охрабрува екстремните националисти. Тоа предизвика бура од реакции на социјалните мрежи.

The post Концертите на Роџер Вотерс во Германија и Полска се откажуваат поради неговите повици музичарите да не настапуваат во Израел и поддршката за Путин appeared first on Република.

Германскиот Врховен суд одлучи дека средновековен каменорез со антисемитски карактеристики, може да остане на црквата во градот Витенберг, отфрлајќи ја постапката на тужителот од еврејско потекло, кој со години тврди дека тој приказ ги навредува сите Евреи.

Рељефот „Јуденсау“ или „еврејска маторица“ е каменорез од 13 век поставен на предната страна на градската црква и претставува навредлива карикатура на рабин, свиња и еврејски деца под неа. Во време кога политичарите предупредуваат на можен пораст на антисемитизмот во Германија, пресудата е своевиден потсетник на широко распространетите антиеврејски чувства уште во средниот век.

Тужителот води судска битка за отстранување на каменорезот од 2018 година.

Судот одлучи дека рељефот на фасадата на црквата во Витенберг не мора да биде отстранет - се вели во соопштението на судските власти.

Споменатиот приказ е еден од дваесетина слични средновековни уметнички дела коишто сѐ уште се наоѓаат по црквите низ Германија и на други места во Европа. Во 2020 година, и Високиот регионален суд во Наумбург одлучи дека рељефот во Витенберг, поставен на околу четири метри над земјата, не претставува прекршок.

Историјата вели дека во спорната црква во Витенберг во 1517 година проповедал и германскиот реформатор Мартин Лутер, кој важи за познат антисемитист.

The post Германски суд одлучи антисемитски каменорез од средниот век да остане на црквата во Витенберг appeared first on Република.