Во тешка сообраќајна несреќа во американската сојузна држава Вермонт загина Трит Вилијамс (71), холивудски актер со повеќе од 120 улоги.

Според полицискиот извештај, Вилијамс во понеделникот околу 17 часот свртел со својот мотор на патот кога бил удрен од автомобил и усмртен. Околностите на несреќата сѐ уште се истражуваат.

Уништен сум. Тој беше прекрасен човек и фантастичен актер. Режисерите го обожаваа. Беше срцето на Холивуд од 1970-тите. Годинава договоривме многу работи и тој со нетрпение очекуваше да работи, изјави за „Пипл“ неговиот агент Бери Мекфирсон.

Вилијамс е роден во 1951 година во Конектикат. Тој се проби во Холивуд во 70-тите, а славата ја стекна со улогата во познатиот мјузикл на Форман „Коса“ во 1979 година, заедно со Џон Севиџ и Беверли Д’Анџело.

https://youtu.be/fO7D4Fh7CvE

Тој беше номиниран за Златен глобус за неговата улога во „Коса“.

Во следните децении тој беше препознатливо лице во бројни филмови. Тој глумеше во „1941“ на Спилберг и во „Беше еднаш во Америка“ од Серџо Леоне, а во последната фаза од кариерата се фокусираше на телевизија, каде беше познат по улогата во серијата „Евервуд“ и настапувањето во божиќните филмови од продукцијата „Халмарк“.

Вилијамс беше оженет и татко на две деца.

The post Во тешка несреќа замина актерот Трит Вилијамс appeared first on Република.