Во 2020 година, на тие избори не ветивме уставни измени на граѓаните. Ниту ВМРО-ДПМНЕ, ниту СДСМ, ниту ДУИ, ниту Алијанса, ниту никој, а сега кога ќе има избори нека излезат и нека ветат уставни измени, па да видиме дали ќе ги гласаат граѓаните, порача потпретседателот на ВМРО-ДПМНЕ, Александар Николоски во гостување во „Детектор“ на Сител телевизија.

Николоски додаде да не се дозволи да се случи како што се случи со Охридскиот Рамковен договор, кога политички партии во 1998 година не ветија таков договор,а го потпишаа во 2001 година.

Македонскиот народ 30 години е притискан да попушта нешто, нагласи Николоски.

Николоски укажа дека ако власта е толку сигурна дека има мнозинство за уставни измени, нека го стават во Собрание на Дневен ред.

Ние сметаме дека договорот е лош, ние мислиме дека директно удира во темелите на македонската држава и затоа не прифаќаме, посочи потпретседателот на ВМРО-ДПМНЕ.

„Не можам да се согласам дека Македонија има само еден избор, а тоа е да прифати дека македонскиот народ е ист како бугарскиот народ, дека корењата ни се бугарски, дека има бугарска историја, дека зборува дијалект на бугарски јазик. Тие работи нема никогаш да ги прифатиме по ниедна цена“, порача Николоски.

Рече дека доколку ЕУ смета дека Македонија заслужува да оди напред тогаш може да се најдат други форми како да се започнат преговорите со ЕУ. Во спротивно барањата на Бугарија само ќе растат.

Во една средба со премиерот Пленковиќ ми рече вие сте нација која што најмногу има истрпено и најмногу има дадено во овие 30 години, рече потпретседателот на ВМРО-ДПМНЕ.

The post Николоски: Македонскиот народ 30 години попушта, веќе нема попуштања appeared first on Република.