Институтот за македонска литература при УКИМ – Скопје ја продолжува традицијата на чествување на великаните на современата македонска книжевност. На 5 јуни, во 12 часот, во амфитеатарот на Институтот за македонска литература, овој пат вниманието се насочува кон Гане Тодоровски (по повод 95-годишнината од раѓањето) и кон Петре М. Андреевски (по повод 90-годишнината од раѓањето).
– Како институција што е од посебен национален интерес се чувствуваме почестени, но и обврзани, да потсетуваме на дејноста и опусот на сите оние имиња од македонската книжевна историја што ги пренесувале традициите и ги граделе културните вредности кај нас. Двајцата писатели не само што се класици на македонската книжевност туку и за двајцата може да се констатира дека пишуваат литература што станува носител на актуелното преку предавање на историското знаење. Затоа, за нас е многу важно да се погрижиме значајните личности од македонската книжевна историја да се актуализираат и кај младите генерации, па во таа насока настојуваме овие собири да ги реализираме во интеракција со учениците од средните училишта – вели проф. д-р Лорета Георгиевска-Јаковлева, претседателка на Организациониот одбор.
Со поздравна реч, соборот ќе го отвори директорката на ИМЛ, проф. д-р Наташа Аврамовска. За научната дејност на Гане Тодоровски ќе говори проф. д-р Валентина Миронска-Христовска, за поезијата проф. д-р Соња Стојменска-Елзесер, книжевната дејност на Петре М. Андреевски ќе ја претстави проф. д-р Наташа Аврамовска, а за романот „Пиреј“ ќе зборува проф. д-р Лорета Георгиевска-Јаковлева.

The post Свечен собир во чест на Гане Тодоровски и Петре М. Андреевски appeared first on Република.

Научниот собир по повод 60 години од смртта на Ѓорѓи Абаџиев во организација на Институтот за македонска литература ќе се одржи на 6.10.2023 година (петок), со почеток во 11:00 часот во амфитеатарот на ИМЈ „Крсте Мисирков" - Скопје.

Поздравна реч на проф. д-р Наташа Аврамовска
За животот и делото к е говорат:
проф. д-р Лорета Георгиевска-Јаковлева
Културната меморија во книжевниот опус на Ѓорѓи Абаџиев
проф. д-р Валентина Миронска-Христовска
Ѓорѓи Абаџиев и Македонскиот литературен кружок
проф. д-р Гоце Смилевски
Индивидуалното и историското во романот „Пустина“ од Ѓорѓи Абаџиев

The post Научен собир по повод 60 години од смртта на Ѓорѓи Абаџиев appeared first on Република.

Институтот за македонска литература при Универзитетот „Св. Кирил и Методиј“, Скопје, денеска, напладне, во просториите на ИМЛ, ќе ги одбележи двата јубилеја на македонскиот писател, поет, раскажувач, енциклопедист и публицист Јован Павловски: 85 години од неговото раѓање и 65 – годишната творечка дејност.

Собирот ќе го отвори претседателката на Организациониот одбор проф. д-р Лорета Георгиевска-Јаковлева од ИМЛ, а за творештвото на Павловски ќе зборуваат академик Катица Ќулавкова (МАНУ), проф. д-р Наташа Аврамовска, проф. д-р Лорета Георгиевска-Јаковлева и проф. д-р Гоце Смилевски.

-Како поет, раскажувач, романсиер, писател за возрасни, писател за деца и млади, хроничар – документарист, енциклопедист и публицист, Јован Павловски создаде богат и разновиден опус, кој има свое значајно место во летописот и тековите на современата македонска литература. Дебитираше со стихозбирката Август во 1961 година, а потоа објави низа поетски книги, меѓу кои: Медеја, Идентитет, Ментален простор, Одработен страв, Строгоста на живеењето и други, наведуваат организаторите на научниот собир.

Павловски е автор на романите Тоа Радиовце во кое паѓам длабоко, Сок од простата, Проверка на слободата, Град, години луѓе и други. Има објавено и повеќе документаристички дела, меѓу кои: Блиско сонце, Гемиџиите, Ѕвездена прашина, Огнено семејство – Спомени на Лика Чопова, Ние на Татковината ѝ должиме сé, а таа нам ништо!, Судењата како последен пораз, Кажувања, како и публицистичките: Бев со нив, Од онаа страна на границата, Од првична идеја до држава (коавтор: Мишел Павловски) и други.

Павловски е добитник на врвни награди, меѓу кои: „Климент Охридски“, Рациново признание, „Стале Попов“, Книжевно жезло за творечки опус, „Мито Хаџивасилев – Јасмин“, „Златна плакета на град Тетово, „19 Ноември“ на град Тетово, „13 Ноември“ на Град Скопје, „Крсте Мисирков“, „Духовен воин“ и „Златно перо“. Неговото творештво е преведено на повеќе од 20 јазици во светот.

The post Научен собир за Јован Павловски по повод 85 години од неговото раѓање и 65-годишната творечка дејност appeared first on Република.