Митрополитот на Повардарската епархија Агатангел во своето Велигденско послание порача до верниците дека е потребна одговорност кон себе, кон општеството, да се потпраме на вредностите на православието оти важно е какво општество и каква држава ќе изградиме.

Мораме да бидеме одговорни како за себе, така и за општеството и околината што нè опкружува. Не смееме да потонеме во самодоволност и сув индивидуализам. Човекот не е створен да биде сам и осамен во светот. Не смееме да бидеме небрежни за својот ближен, за страдањето на братот, за животната средина во која ги раснеме нашите деца...Важно е за човекот да живее во мир и благосостојба, важно е какво општество и каква држава ќе изградиме. Тоа не се прашања што не треба да нè засегаат. Добро е да знаеме кои сме, што сме и од каде сме. Од Христа сме откупени, скапо сме платени преку Неговата сечесна крв. Он, преку Своето славно Воскресение, преку Својата неизмерна љубов, ни го подари највисокото достоинство. Не смееме на Неговата татковска грижа да одговориме со незаинтересираност и самодоволно повлекување. На Бога со камен не треба да фрламе, раката што дава не треба да ја сечиме - така нè учеле и воспитувале нашите предци, вели владиката Агатангел во посланието објавено на веб страницата на Повардарската епархија.

Според него, иако човекот денес живее во изобилство, понесреќен е и попотиштен од кога и да е во неговата долга историја

Македонскиот народ илјадници години непрестајно на Бога благодарност и пофални песни Му вознесувал. Знаел нашиот мудар народ дека секоја тиранија е привремена, дека секое зло е краткотрајно. Денес, пак, злото, покрај тоа што си го зачувало својот вообичаен облик, има и некакво друго, поинакво лице. За жал, во тешка состојба сме доведени. Денес, иако човекот живее во изобилство, сепак е понесреќен и попотиштен од кога и да е во неговата долга историја. Денешниот човек е збунет и дезориентиран. Тој како да не ја препознава вредноста, како да не знае што е нормално, а што застрането, потенцира митрополитот Повардарски Агатангел.

Сега, како генерација, додава тој, мораме да застанеме на патот на оваа демонска наезда, оти ако тоа час поскоро не го сториме, духовно ќе се разориме себе си одвнатре и дури тогаш ќе станеме морално плитки и исушени.

-Затоа, македонскиот народ нема друг избор освен да се ослони на Бога, да се потпре на Неговиот спасоносен столб, кој го држи и покрепува секое човечко здание. Само така и на тој начин ќе опстоиме. Македонското име, идентитет, историја и традиција не смеат да бидат претворени во роба за трговија. Тоа е срамно и неправедно, а уште помалку морално. Ова важи како за македонскиот народ и држава, така и за Црквата, порача митрополитот Повардарски Агатангел.

Потенцира дека мнозина подло ќе се обидат да ни го омаловажат и искривоколчат секој наш успех и достигнување. Но, вели, имајте секогаш предвид дека со Христос победуваме, он ги штити и запазува праведните, оти Самиот Тој е правда и вистина. Христос е живата радост која го исполнува секое осамено и повредено срце.

Од изворот на Воскресението Христово постојано и непрестајно да се напиваме. И ние еден ден ќе Воскреснеме во новиот живот исполнет со вечното. Нека ја штити и закрилува Господ нашата татковина Македонија и нашата Света Македонска православна црква - Охридска архиепископија. Македонскиот православен народ нека создава дела за вечно паметење. Блажен е овој народ што го срамат и прогонат, и што говорат против него секакви лоши зборови и лаги - заради Христа! Радувајте се и веселете се, зашто голема е вашата награда на небесата, порача Митрполитот Повардарски Агатангел.

Утрово на прв ден Воскресение Христово – Велигден, се служеше Златоустова литургија во црквата „Успение на Пресвета Богородица“, а со литургијата во храмот „Св. Кирил и Методиј“ чиноначалствува митрополитот Повардарски Агатангел.

Најрадосната вест за Христовото Воскресние синоќа на полноќ беше објавена низ сите православни храмови на Повардарската Епархија. Во Соборниот храм на Повардарската епархија „Св. вмч. Пантелејмон“ во Велес со литургијата чиноначелствуваше митрополитот Повардарски Агатангел, а литургии посветени на воскресението на Хириста се одржаа и во трите градски цркви - „Св. Кирил и Методиј“, „Вознесение Христово“ (Св. Спас) и „Св. Јован Крстител“.

The post Митрополит Агатангел: Македонското име, идентитет, историја и традиција не смеат да бидат предмет на тргување, тоа важи и за Црквата appeared first on Република.

Митрополитот Повардарски Агатангел во пресрет на Христов ото раѓање - Божиќ го упати своето традиционално Божиќно послание обраќајќи им се на православните верници со зборовите „да го возвишиме својот ум и разум, да се очистиме и да ја претвориме нашата внатрешност во удобно уреден дом во кој ќе ја примиме небесната светлина која води во богопознание“.

-Овој празник нека им биде одмор од секоја неволја. Нека ни биде почеток на радоста која никогаш не престанува. Нека ја подигне Господ Својата света десница и нека го благослови македонскиот народ, нека ја крепи и заштитува нашата земја и нашата духовна мајка - Македонската православна црква - Охридска архиепископија,порача Митрополитот Агатангел.

Господ Исус Христос, порачува митрополиот Агатангел, нека им биде верен сопатник на сите оние кои минуваат низ тешкиот лавиринт на животните искушенија.

-На сите оние што страдаат и боледуваат нека им помогне нашата заедничка молитва.

The post Митрополит Агатангел: Овој празник нека им биде одмор од секоја неволја appeared first on Република.

„Министерот за надворешни работи треба целосно да се повлече од оваа расправа, што ни ја наметнуваат Бугарите, бидејќи нивните барања задираат во идентитетските прашања на Македонците. Тој самиот не е Македонец, па неговото однесување личи на човек, што сака да го уредува дневниот престој на својот сосед. Tој не е поставен од народот, па да се плаши од неговиот суд. И тој и сите други околу него се тука, за да ги бранат туѓите интереси.“ – вели Агатангел, митрополитот Повардарски на Македонската православна црква – Охридска архиепископија, во својата анализа, која со наслов „Каков е изгледот на урнатината, таква на безумниот му е мудроста“ ја објави весникот „Нова Македонија“.

Покрај другото, владиката Агатангел пишува: „Протестите на македонскиот народ имаат благочестива цел: спречување на свесното ништење на македонскиот идентитет, односно на македонскиот јазик, историја и култура. Моите молитви се секогаш на ваша страна, бидејќи вашето дело е праведно. Ве поддржувам и ве поткрепувам.“

„Промената на името беше јасна и отворена победа на неофашизмот, кој на европскиот украсен астал, пропагандно, со надеж за посветла иднина, ни беше сервиран во бели ракавици. Преку Бугарите како европски измеќари сега ни се послужува газење на македонскиот јазик, идентитет и историја. Во сегашниов обид за ништење на македонскиот јазик, идентитет и историја гледаме школски пример за лудост, во кој е вградена нечесна намера.“

„Колку порази како народ и држава треба да доживееме, за конечно да сфатиме со кого и со каква нечестивост си имаме работа? Европа, но и Америка, како нејзин непосреден газда и владетел, повеќе не се она што биле некогаш. Францускиот претседател е совршена праслика на британскиот премиер од 1938 година, кој во име на мирот, како повисок интерес, на Хитлер, без да го праша тамошниот народ, му ги предал на тацна цела Австрија и Чехословачка, за овој подоцна да се осоколи и да му донесе на светот бура од несреќи, во која пострадаа меѓу 60 и 80 милиони невини луѓе. Ете со кого денеска си имаме работа. Ваквата ментална состојба денес има намера да ни ја крои судбината.“

„Бугарите во овој момент се само лоши актери и невешти имитатори, кои уште еднаш избраа да застанат на погрешната страна на историјата. Таквите многу сакаат да зборуваат за измислена бројка на обесправени Бугари во Македонија, но, сепак, никако немаат намера да си погледнат во сопствениот двор, па да си видат каква нечовечност им владее во сопствените граници, и во однос на правата, но и во однос на слободата на мислата на оние што одбиваат да се чувствуваат како Бугари. Европа замижува пред оваа неправда, оти тие ги разбираат единствено правилата на насилникот. За Европа не е никаков проблем еден културен центар да носи име на докажан терорист, кој бил личен пријател на Гебелс и на Хитлер.“

„Јас немам намера да молчам пред неправдата, што непосредно го угнетува мојот македонски народ. Оваа неправда сака да му ја зацрни и да му ја одземе секоја светла иднина, претворајќи го во безлична маса, во дрво без корен, во послушен и аутистичен ентитет, кој единствено има право да биде согласен со секој апсурд што ќе му биде прислужен.“

„Уште пострашно е однесувањето на министрите од македонскиот блок. Не разбирам како може да се нема основно чувство за духот на својот народ. Вразумете се! Оставете ја Европа да се бори со својот фашизам, тоа е нивен производ. Македонците отсекогаш биле антифашисти и никогаш немале страв да се спротивстават на фашистичките мрачни сили, дури и тогаш кога пред нивниот налет се поклонила цела Европа. Потребно ли е за некој да не биде навреден, да ги потрупаме илјадниците партизански гробови и споменици што во знак на благодарност ги изградиле нашите татковци?“

„Внимавајте како ќе бидете запаметени во историјата, оти таа е неумолива, никому не му простува и брутално се пресметува со предавниците, а вас особено нема да ве поштеди. Сега ви е последната шанса да бидете храбри и одлучни. Најпрво вратете го името Македонија и признајте си ја грешката.“

The post Агатангел: Колку порази како народ и држава треба да доживееме, за конечно да сфатиме со кого и со каква нечестивост си имаме работа? appeared first on Република.

Владиката Агатангел го возбуди либералното „гражданство“ на Северна. Се помолил да вратиме се што сме дале, откако ВМРО-ДПМНЕ ќе дошло на власт. И ете, тоа ја крена на нозе совеста и душата на нашата држава – го прочитаа Прличев, оној за кој нивниот Заев потпиша дека е заеднички со братјата ни и почнаа да ја рецитираат „…пискотници се слушаат…“, пишува Дарко Јаневски во својата колумна.

Не знам што му требаше оваа на владиката. Оти тој е должен да внимава на чувствата на некогашните атеисти кои во меѓувреме открија дека имало Господ, па станаа верници. Ама открија и дека Господ не е за делење со небањатите, туку е само нивен. Тој постои за нив. Всушност, да не биле тие, нашата комуњарско-лоповска елита, немало да постои ни Господ. Вие мислевте обратно? Дека Господ го создал човекот? Не, напротив, тие, нашата елита го има создадено Господа. Откако претходно го укинаа, оти тој, нели, беше „опиум за народот“. Па, кога сакаат си го укинуваат, кога сакаат го создаваат.

Важно е дека тој постои за нив. За нашата елита. Исто како што црквата постои за нив, како што поголемиот дел од владиците се нивни и ги товат за да им бидат слуги, за да можат заедно да ги воспеваат предавствата со Грција и Бугарија, исто како што државата постои за нив за тие да ја пљачкаат. И тогаш, златните тие на мајка, кога крадат, кога владици ја продаваат Црквата на Бугарија за да им шетаат мантиите во Грција, кога велат дека договорите за бришење на македонскиот народ биле добри, тогаш молчат како златни рипчиња. А, врескаат како некој да ги депилира на суво, кога друг ќе им „брцне“ во бурето со мед… Впрочем, кај сте виделе мафијаш да е среќен ако друг му влезе во територијата.

Згора на тоа, тука се и нивните пудлици. И навистина, владико Агатангел, не е фер, на тие кои штотуку добија од Заев, кој по 200, кој по 300 илјади евра за улогата на загари, а тие се најслабо платените удирачи на тапани за ширење на единствената комуњарска вистина низ светот, па и надвор од него, навистина не е фер да им го загорчуваш кафето од скапите порцеланските шолји. На оние кои го премолчаа писмото со кое МПЦ стана ќерка на Бугарската Православна Црква, на оние кои го премолчаа Пимен кога како манекенка со мрежасти чорапчиња снимаше спотови за гласање на референдумот за Северна, на оние кои…!

Настрана што Агатангел тоа го стори на начин од кој може да се има повеќе зијан отколу ќар. Ама тој е владика, од каде да знае како тоа се прави? А се што требаше да направи е да застане потпрен на некое „порше“ и да сними спот. Па да даде интервју за бугарски и грчки медиум. Да каже дека сме три коси црти. Да ги осуди оние кои имаат бради, кои имаат влакна во носевите и во ушите и се бањаат секоја втора недела за време на ефтината струја што им ја овозможи другарот Заев. И тогаш се ќе беше в ред. И СДС-овци сити и ВМРО-вци на број, оти и тие одамна веќе не се небањати и со бради.

Е, и никако немој да го нервираш Милески. Оти тој е министер. Од нашите. Не нуди Господ светлина на крајот на тунелот, туку тој – великот министер Милески. Погледај, те молам, по тоа псалмите, ќе видиш дека едно чудо од нив го воспеваат токму народниот ни избраник за локална самоуправа. Кого токму неговите го обвинуваат дека си ја вработил ем потесната, ем поширока фамилија на државен грб. Оти така им рекол и Павле на Римјаните и на Коринтјаните и на Филипјаните од Македонија кои ги направивме Грци – прво, на грб од народот да си ја ставите фамилијата.

Додуше, Милески не го кажуваат по име во псалмите, не директно, оти така не би личело, ама се насетува. се надѕира. Па така, го имаме Господ во висините, Милески во низините. И после не се чудете кога некој ќе ви каже дека не случајно рекле дека Македонија е библиска земја. Затоа и тој е тука министер.

Друго ќе беше ако задржевме, макар во учебниците, дека можеби барем едно каменче од мозаикот на првата црква во Европа, онаа што апостол Павле ја основал во Филипи, има врска со нас. Ама, ете потпишавме дека таа е само на Грците и мораше да се најде замена за апостолот и за Лидија. И така од висините, Милески ни го позајмија и во низините. За да ни нуди просветление. Во кое нема место за вакви владици. Место има само за него, за гопожата Морачанин, за Заев и Ковачевски ич муабет да не правиме.

Затоа владико, бери памет! Научи си ја лекцијата. Биди владика на Синодот на ќерката на БПЦ, а не на Синодот на МПЦ и немој тука да ми спомнуваш македонски народ, па да сме врателе тоа што сме зеле, па да сме ги исправеле неправдите. Пиши се дека си Бугарин кој сака да служи со Грците и ќе бидеш добар. И паметен и послушен! И тогаш, кога тоа ќе го правиш тајно, Милески и елитата ќе те наградат јавно.

The post Дарко Јаневски: Владиката Агатангел го возбуди либералното „гражданство“ на Северна appeared first on Република.

Како што црвите и мувите се штетници за лозарите, така владиците како Агатангел се штетни за црквата и за граѓаните. Со вакви погрдни зборови министерот од владата на Ковачевски и лидер на ЛДП, Горан Милески, го коментираше денешниот говор на митрополитот на поварадарската епархија Агатангел на настанот за закројување на лозјата што денеска се организираше во Кавадарци по повод празникот Свети Трифун – Денот на лозарите.

Владиката Агатангел го навреди голем дел од македонското население и ја извалка мантијата под која што е. Да беше свесен што зборува, немаше да го каже. Господинот Агатангел, ако може да се нарече господин, е срам и штетник за црквата и од МПЦ треба да размислат кого испраќаат на вакви настани, рече меѓудругото Милевски од плоштадот во Кавадарци.

Возљубени чеда на Господа, чеда на нашата света македонска црква и на оваа света наша македонска земја, денес во градот Кавадарци, во срцето на Тиквешијата, со вашиот градски татко и нашиот драг градоначалник Митко Јанчев, со претседателот на најголемата и најсвета партија наша партија, ВМРО-ДПМНЕ, господинот Мицкоски, со сите пратеници, членови на Општината и сите советници, сите добронамерни луѓе, да го благословиме овој ден на лозарите, на виното, на љубовта. Се собравме заеднички да ја искажеме и болката и тагата, но еве ние Македонците ја забораваме и болката и тагата кога треба да се радуваме. И навистина денеска се радуваме што нашиот градоначалник, најдобриот градоначалник на оваа наша света македонска земја, господинот Јанчев, нè собра да го прославиме овој голем ден, рече владиката на почетокот од говорот.

Потоа, Агатангел зборуваше и за лидерот на ВМРО-ДПМНЕ, Христијан Мицкоски, нарекувајќи го „нашиот претседател“ за кого рече дека верува оти со помош од Бога и Богородица ќе го врати назад она што е свето македонско и национално. Првин со него (Мицкоски), рече владиката, а потоа и со божја помош. Нема да дозволиме, порача Агатангел, некој што не ја чувствува Македонија да ја одредува судбината на нашата земја.

Сакам, можеби некој ќе ми замери, но еве некој вчера зборуваше да не зборуваме и да не гледаме на состојбите што ни се случуваат со емоции. Но, ние Македонците сме емоционални луѓе, ние Македонците сме патриоти, ние си го сакаме својот македонски јазик и држава, својата македонска нација и сето она што е свето и македонско бидејќи тоа го примивме од нашиот свет апостол Павле кој шеташе и чекореше по оваа света македонска земја. И затоа примајќи ги овие свети молитви од овие наши дедовци и прадедовци јас длабоко од душата и срцето верувам дека нашиот претседател на најголемата и најсвета партија ВМРО-ДПМНЕ, господинот Мицкоски, се ова што го дадовме, верувам дека ќе го вратиме назад. Првин со него, а потоа и со божја помош. Јас верувам дека Бог, спасителот наш Исус Христос, мајката Божја Богородица, која е заштитничка на оваа света македонска земја, ќе му помогне него и на сите негови соработници на се она што е наше свето македонско, национално, ќе го вратиме назад и нема да дозволиме некој кој не ја чувствува Македонија национално да ја одредува судбината на нашата света земја, рече меѓудругото Агатангел.

The post Атак на Владата кон МПЦ и Агатангел: Има владици што се штетници како црвите и мувите appeared first on Република.

Во пресрет на големиот христијански празник Рождеството Христово Божик, митрополитот Повардарски Агатангел традиционално упати до првославните верници Божикно посление со порака овие вонредни животни околности предизвикани од пандемијата со корона вирусот да ни бидат прилика за да се преиспитаме, да се покаеме за старите лоши навики и дела, и да се насочиме кон Бог.

Го дочекавме празникот на Раѓањето Христово, кога го славиме Воплотувањето на Синот Божји, настанот кога Бог влезе во човечката историја. Како што пееме во црковните химни, навистина денес „сѐ се исполни со радост, зашто Христос се роди од Дева“. Раѓањето Христово е најголемата тајна на христијанската вера, но и на историјата на човечкиот род. Согласно со предвечниот Божествен совет Синот и Слово Божјо при Неговото воплотување ја прими целата човечка природа, освен гревот, и како совршен Бог и совршен човек, да го спаси човекот од трагичните последици на прародителскиот грев. Да го спаси од гревот. Да го ослободи од распадливоста и смртта. Да му дарува вистинска радост и да го врати повторно во рајот - вели митропоитот Повардарски.

Тој истакна дека тоа се причините поради кои денес ние христијаните славиме, нашите срца се полнат со радост за спаснието кое ни доаѓа, кое му дава смисла на нашиот живот на земјата.

Повторно Бог нѐ удостои да го прославиме Рождеството Христово, „мајката на празниците“, како што го нарекува светиот Златоуст. Денес го празнуваме присуството на Бога помеѓу нас. Бог е со нас! Бог е на земјата! - Потсети митрополитот Повардарски Агатангел

Обраќајќи им се со Драги браќа и сестри, митрополит Агатангел ги потсети верниците дека Господ се понижи Себеси заради нас и прифати да се роди во бедни јасли, од каде што се хранеа животните.

И тогаш немаше куќа, ниту најмала соба, во која би биле сместени бремената Богомајка и Детето што требаше да се роди, а и денес, после 2000 години од тој настан, човечките срца повторно се затворени за Пресвета Богородица и за новородениот Спасител Христос. „Дојде при своите и своите не го примија“, вели евангелистот Јован. Го отфрливме Христос, ја отфрливме Светата Црква која нѐ роди и нѐ воспита и нѐ направи народ избран, и како „слепи за стап“ се фативме по технолошкиот и економскиот развој, очекувајќи среќа од него. Ниту една унија, ниту еден сојуз, ниту еден фонд нема да ни донесе развој, ни напредок, ни среќа, ако самите Македонци не се освестат, и како и оној Македонец од Новиот завет, кој повика кон апостолот Павле да дојде и да ги спаси Македонците, така да побараме и ние спас и благослов од Бога. Без Неговиот благослов секој напредок, секој успех е празен и завршува како ветер и магла - порача митрополитот Повадарски Агатангел.

Тој потенцира дека поради пандемијата оваа година што изминува е една од најтешките досега, можеби во последниве 70 години.

Стравот и паниката што го зафатија и секојдневно го потресуваат сиот свет, не ни дозволуваат да се радуваме на големите и убави празници. Христос се роди во сиромашна пештера, та „преку Неговата сиромаштија ние да се збогатиме“. Многу семејства ќе доживеат големи трагедии, многумина ќе преживеат ужаси од современата болест, но да не губиме надеж. Да не се препуштаме на страв и паника. Бог е присутен и има некаква смисла сето ова, иако сѐ уште не ја гледаме. Можеби и ние претеравме со искористување и загадување на целата природа, која ни беше од Бога дадена за да се грижиме за неа? Можеби ние станавме премногу отровни во секојдневниот живот, во секојдневната комуникација со блиските? Заборавивме што значи да се биде љубезен, да се биде културен, да се биде пријател и другар. Заборавивме што значи да се биде семејство. Заборавивме што е вредно во животот и за што вреди да се живее животот. Заборавивме што значи да се биде скромен и со скромни потреби - потенцира митрополитот Повардарски Агатангел.

Тој додава дека поради познатите вонредни услови, во кои живее целиот свет, и нашата Света Македонска православна црква, како и Повардарската епархија, дејствуваат со намалена сила.

Но, сепак, и покрај сите слабости и недостатоци, и покрај сите материјални потешкотии, во Повардарската епархија во 2021 година беа изградени, доградени, реновирани и осветени повеќе свештени објекти - вели митрополотот Агатангел.

Тој при тоа ги наброја: параклисот „Свети Гаврил Велички“, кој се наоѓа во состав на административната зграда при храмот „Успение на Пресвета Богородица“ во Велес, храмот „Свети Кирил и Методиј“ во Гевгелија, храмот „Свети великомаченик Димитриј“ во Кавадарци, храмот „Свети Атанасиј Велики“ во Богданци. Во тек е доградбата или фрескоживописањето на храмовите „Св. Петар и Павле“ – Превалец, „Успение на Пресвета Богородица“ – Демир Капија, каде што во тек е фрескоживописот, Согленскиот манастир „Рождество на Пресвета Богородица“ каде што комплетно е реновирана внатрешноста на црквата и сега привршуваат градежните активности на новиот конак.

Во храмот „Св. Јован Крстител“ во Велес, во тек е фрескоживописот, за кој се надева дека наскоро ќе биде осветен и оспособен за нормален парохиски живот.

Возљубени мои чеда, Овие вонредни животни околности да ни бидат прилика за да се преиспитаме, да се покаеме за старите лоши навики и дела, и да се насочиме кон Бог. Среќен е оној кој Го сретнал Бога, среќен е оној кој се навикнал да живее скромно, среќен е оној кој не им робува на страстите и гревовите. Празникот на Рождеството Христово да ни биде потсетник дека Христос се роди на скромно место, и сѐ додека не станеме скромни и смирени по срце, за Христос нема да има место во нас; да бараме средба со Христос, да го бараме со сето срце и посакувам во овој живот да Го најдеме Христос, Кој му дава смисла на нашето постоење. Посакувам Светата Црква да ни стане секојдневие во животот, да си ја сакаме и да се радуваме на тој Божји благослов што Бог го насадил овде уште пред речиси 2000 години. Да се вратиме на живото Предание на Црквата, да му се вратиме на Бога, на Литургијата, на традиционалните вредности, да бидеме во заедница со Бог, без притоа да го запоставиме технолошкиот и економскиот напредок, со кои ние ќе раководиме, а не тие со нас. Христос се роди! Навистина се роди! - порача митрополитот Повардарски Агатангел.

The post Митрополитот Агатангел: Вонредните животни околности да ни бидат прилика да се преиспитаме и да се покаеме appeared first on Република.