Државната награда „Гоце Делчев“ за 2022 година, што се доделува за особено значајни остварувања од интерес за Република Македонија во областа на науката, денеска ќе му биде доделена на проф. д-р Мишо Докмановиќ.

Како што соопшти собраниската прес-служба, Докмановиќ е добитник на наградата за делото „Сами на своето – кратка историја на македонската независност (1990 – 1993)“.

Д-р Мишо Докмановиќ е редовен професор на Правниот факултет „Јустинијан Први“ во Скопје. Ги предава предметите историја на правото и современа македонска историја на додипломските студии и предметите Балканот и американската дипломатија, Дипломатски протокол и Историја и дипломатија на Блискиот Исток на последипломските студии. Во периодот 2007 – 2013 г. го предавал и предметот право и информатичка технологија.

За врвните резултати во научноистражувачката дејност д-р Докмановиќ е добитник на наградата „Научник на годината“  на Универзитетот „Св. Кирил и Методиј“ во Скопје за 2013 година. Тој е најмлад добитник на оваа награда досега.

Докмановиќ е претседател на Македонско – американската алумни асоцијација, претседател на управниот одбор на Институтот за стратешки истражувања и едукација – ИСИЕ. Член е на Одборот за акредитација и евалуација на високото образование. Од  октомври  2017  година  проф.  д-р Докмановиќ е член на Делегацијата на Република Македонија во Меѓународната алијанса за сеќавање на холокаустот (Intenational Holocaust Remebrance Alliance).

Тој е автор и коавтор на преку 70 научни и стручни трудови, објавени во референти списанија во земјата и странство на англиски и француски јазик. Проф. Докмановиќ е автор на првиот универзитетски учебник за  американската  надворешна  политика  објавен  на  македонски  јазик -„Балканот  и американската дипломатија во XX  век“.  Член е на повеќе меѓународни здруженија вклучувајќи го Европското друштво за компаративна правна историја.

Одборот за доделување на државната награда „Гоце Делчев“ ќе ја додели наградата на пладне во Собранието.

The post Проф д-р Мишо Докмановиќ е добитник на државната награда „Гоце Делчев“ за 2022 година appeared first on Република.