Во Брисел денеска почна трилатерална средба на делегациите на Белград, Европската Унија и Приштина. Делегацијата на Белград вклучува бројни експерти и ја предводи директорот на Канцеларијата за Косово и Метохија Петар Петковиќ, делегацијата на ЕУ ја предводи специјалниот пратеник на ЕУ за дијалог Мирослав Лајчак, а делегацијата од Приштина ја предводи Бесник Бислими.

Состанокот започна околу 12:30 часот и повторно главна тема ќе биде одлуката на Централна банка на Косово за забрана на користење на динари во Косово, како и формирањето на ЗСО.
Тоа е шеста рунда од дијалогот - претходната средба на ниво на главни преговарачи се одржа на 18 април во Брисел.

The post Во Брисел почна трилатерален состанок на делегациите од Белград, ЕУ и од Приштина appeared first on Република.

Во Њујорк денеска почна седницата на Советот за безбедност на Обединетите нации на која ќе биде претставен шестмесечниот извештај на генералниот секретар на ОН Антонио Гутереш за работата на УНМИК на Косово.
На седницата на Советот за безбедност на ОН се случил скандал кога претседателката на Косово, Вјоса Османи донела силувани жени за да сведочат за наводните српски злосторства, пренесуваат српските медиуми.

Српскиот претседател Александар Вучиќ во говорот пред Советот за безбедност на ОН, истакна дека Приштина го укина динарот на Косово и Метохија, што е кулминација на продолжената етнички мотивирана кампања против Србите и другите неалбанци.

Потезите на властите во Приштина ги засегаат сите подеднакво, без разлика на возраста и полот, а се во рамките на шовинистичката агенда насочена кон создавање на Голема Албанија – рече Вучиќ.

Тој посочи дека извештаите на УНМИК за состојбата на Косово се „површни“ и изнесе детали.

Наместо да биде санкциониран, режимот на Курти постојано беше наградуван. Во исто време, имаше постојана репресија, имаше 16 напади, пукање, заплашување на сè помалиот број на повратници. Насилно отстранување од страна на полицијата на табли со имиња на српски јазик. Континуираните напади во рамките на кампањата за прогон на Србите се продлабочија, прогонителите на Србите конфискуваа големи количества медицински материјали во Зубин Поток. На УНМИК му недостига прецизност за настаните од овој период. Нивните извештаи се површни и затоа моја должност е да добијам подетален увид во ситуацијата- рече Вучиќ.

The post Скандал на седницата на Советот за безбедност на ОН: Османи донела силувани жени да сведочат за наводните српски злосторства appeared first on Република.

И Србија и Косово на седницата на УНМИК се претставени од своите претседатели – Александар Вучиќ и Вјоса Османи-Садриу.

Седницата се одржува во време на зголемена тензија меѓу Белград и Приштина, за што придонесуваат споровите околу употребата на динарот во Косово и управувањето со мнозинските српски општини на северот на Косово, како и постапката за приемот на Косово во Советот на Европа.

Во извештајот за периодот од 19 септември 2023 година до 15 март 2024 година, кој на седницата ќе го презентира шефицата на УНМИК, Каролин Зиадех, Гутереш изјави дека „најостро го осудува сериозниот безбедносен инцидент на 24 септември во Бањска, што доведе до трагично губење на живот“.

Повикувам да се завршат истрагите и сторителите да бидат изведени пред лицето на правдата без одложување, рече Гутереш во врска со конфликтот меѓу вооружената група Срби и косовската полиција.

Во извештајот, за кој Вучиќ рече дека не ја одразува вистинската слика на теренот, Гутереш исто така изрази загриженост за спроведувањето на новата косовска регулатива која забранува употреба на динари во готовински трансакции, наведувајќи дека тоа влијае на економските и социјалните права на не- мнозинските заедници, особено најранливите луѓе во Косово.

The post Почна редовната седница на Советот за безбедност на ОН посветена на Косово appeared first on Република.

The post Пропадна иницијатива за разрешување на градоначалниците во северно Косово appeared first on Република.

Во Косово е приведен државјанин на Република Македонија, по кого Интерпол, на барање на македонската полиција, распишал меѓународна потерница, затоа што како осуден за тешко убиство не се вратил на издржување на казната откако бил пуштен на викенд.

Основниот суд во Урошевац денеска соопшти дека го одобрил барањето на Основното обвинителство од истиот град за определување мерка притвор против лицето идентификувано со иницијали Н.Е., побарано од властите на Република Македонија, врз основа на меѓународна потерница поради постоење основи на сомнение за сторено кривично дело тешко убиство, кое кривично дело е предвидено и со Кривичниот законик на Република Косово.

Според соопштението, по одржување на распит и анализа на списите на случајот, судијата во претходна постапка на Одделот за тешки кривични дела, оценил дека постои основано сомнение дека е распишана меѓународна потерница по истото лице од Интерпол, со барање од 7 март 2022 година на Република Македонија, поради кривично дело тешко убиство, кое кривично дело е предвидено и со Кривичниот законик на Република Косово.

Во врска со ова, обвинетиот Н.Е., е осуден на затворска казна од страна на Судот во Скопје, каде што ја издржува казната веќе неколку години, така што уште без да ја издржи казната во целост, во моментот кога бил пуштен на слобода за на посета, избегал од Република Македонија. Судијата во претходна постапка го одобри барањето на државниот обвинител за определување мерка притвор против обвинетиот согласно член 22 став 1 од Законот за меѓународна правна соработка во кривична материја (Закон бр.04/Л -213) и на истиот му е одредена мерка притвор во траење од четириесет дена. Во овој случај се известуваат странките дека жалбата против ова решение не го одложува неговото извршување, се наведува во соопштението.

Засега нема информации за тоа кога, каде и во кои околности е уапсен во Косово македонскиот државјанин.

The post Во Косово приведен македонски државјанин по кого е распишана меѓународна потерница за тешко убиство appeared first on Република.

Во четири општини во северно Косово, населени со мнозинско српско население, денеска се одржува гласање за разрешување на градоначалниците, како услов за одржување нови локални избори во тие општини, откако минатогодишните избори косовските Срби ги бојкотираа, јави дописникот на МИА од Приштина.

Портпаролот на Централната изборна комисија на Косово, Валмир Елези, на прес-конференција утрово соопшти дека се отворени сите избирачки центри во општините Лепосавиќ, Северна Митровица, Зубин Поток и Звечан.

„Врз основа на податоците што ги добивме од општинските изборни комисии, ве известуваме дека сите гласачки центри се отворени“, рече Елези.

Бројот на гласачки центри во општина Лепосавиќ е осум, во Зубин Поток пет, во Звечан пет и во Северна Митровица пет. Вкупно, бројот на гласачки центри во овие четири општини е 23, со вкупно 63 гласачки места.

Бројот на граѓани со право на глас за процесот на гласање за или против смена на градоначалници од функциите во четиерите општини е 46.556 гласачи.

Елези ги повика граѓаните на север да го остварат своето избирачко право.

„Во име на ЦИК ги повикувам сите граѓани на општините Лепосавиќ, Зубин Поток, Звечан и Северна Митровица да го искористат ова свое право да учествуваат во гласачкиот процес и да се изјаснат дали се за или против напуштање на функцијата на градоначалникот на нивната општина“.

За да биде успешно гласањето, треба да гласаат најмалку 50 отсто плус еден граѓанин. Доколку се исполни овој услов, тогаш вонредните избори ќе се одржат во законските рокови.

Во случај учеството да биде помало од 50 отсто, тогаш гласањето се смета за неуспешно и не може да се преземе друга иницијатива пред да поминат 12 месеци.

Најголемата партија на косовските Срби, Српска листа, но и други субјекти од оваа заедница, објавија дека нема да учествуваат на ова гласање и истото го побараа од српските граѓани од таа област.

Поранешните српски градоначалници на општините поднесоа оставки во ноември 2022 година по одлуката на Владата за промена на српските со косовски регистарски таблички. По неколку месеци, на 23 април 2023 година, се одржаа нови избори на север, но истите беа бојкотирани од Српска листа и од српските граѓани. Тоа влијаеше на слабиот одѕив на граѓаните во гласањето и резулира со победа на кандидатите на партиите на косовските Албанци. Подоцна, по протестите на тамошните Срби поради влегувањето на новите градоначалници во општинските згради со асистенција на полицијата, на барање на меѓународниците, Министерството за локална самоуправа изготви административно упатство во кое се предвидуваат процедурите како да се оди на избори преку петиција.

The post Започна гласањето за разрешување на градоначалниците во четирите општини во северно Косово appeared first on Република.

Бриселскиот договор склучен меѓу Белград и Приштина е валиден како и сите останати спогодби постигнати во рамки на дијалогот што се води со посредство на ЕУ, изјави денеска портпаролот на Европската комисија за надворешни работи и безбедносна политика Петер Стано.

Сите договори претставуваат валидни документи и обврски што мора да се имплементираат. Тоа е нешто што ние постојано им го повторуваме на партнерите, рече Стано во одговор на новинарско прашање дали Бриселскиот договор е се уште валиден за ЕУ во услови кога денеска се навршуваат 11 години од неговото склучување, а и натаму не е формирана Заедницата на српски општини како што е предвидено со него.

Според Стано, формирањето на Заедницата на општини со мнозинско српско население во Косово е едно од клучните и најитните прашања.

Европската Унија заедно со своите меѓународни партнери јасно и порача на косовската страна дека мора да ја имплементира оваа обврска. Неуспехот да се стори тоа ќе доведе до последици, рече Стано.

Тој додаде и дека во историјата на овој дијалог „се одбележани многу годишници“, како на пример првата годишници од Договорот постигнат меѓу Белград и Приштина во Охрид, кој исто така треба да се имплементира.

Имплементацијата е клучот. Тоа важи за сите претходни договори. Тие мора да бидат спроведени, истакна Стано.

Портпаролот на ЕК посочи и дека имплементацијата на договорените обврски е поврзана со напредокот на Србија и на Косово на нивниот пат кон членство во ЕУ.

Ако не испорачаат во однос на обврските од договорите што ги постигнаа, тогаш ќе има серозни последици, рече Стано, додавајќи дека со неспроведувањето на обврските најголемата казна ќе ја почувствуваат луѓето во Србија и Косово.

The post Стано: Косово мора да ја формира Заедницата на српски општини, во спротивно ќе има последици appeared first on Република.

Претседателката на Косово, Вјоса Османи, изјави дека петмина косовски полицајци се „држат во заложништво“ од Србија, земја која таа ја опиша како „шовинистичка“, јави Радио слободна Европа.

На денешното доделувањето на дипломите на кадетите на косовската полиција, Османи го повика меѓународниот фактор да реагира во врска со ова прашање.

„Ги повикуваме сите наши сојузници да го кренат својот глас и да ги зголемат своите напори за запирање на ваквите шовинистички суровости и дејствија против нашите граѓани и против нашата полиција. Но, убедена сум дека денешната заклетва и сите овие питомци и оваа мултиетничка група е најмоќниот одговор против таквите напори“, рече Османи.

„Се додека постојано се соочуваме со безбедносни предизвици, да не заборавиме дека и во овие моменти петмина полицајци на нашата Република се заложници на една шовинистичка држава, на Србија“, додаде таа.

Косовското Министерство за внатрешни работи доцна во средата соопшти дека еден заменик директор на косовската полиција и уште четворица полициски службеници се приведени од српските власти.

Министерството соопшти дека заменик-директорот на косовската полиција од српска националност, Дејан Јанковиќ, „од утрово е задржан во притвор без никакво објаснување“.

Јанковиќ, кој потекнува од општина Штрпце, бил запрен на граничниот премин со Србија, Јариње, на северот на Косово и испратен на распит во југозападниот српски град Рашка.

Османи рече дека „заканите и опасностите се наше секојдневие, затоа е неопходно Република Косово со своите институции да биде полноправна членка на ИНТЕРПОЛ и ЕВРОПОЛ“

The post Османи тврди дека Србија држи петмина косовски полицајци appeared first on Република.

Централната изборна комисија на Косово објави дека само десет гласачки центри од вкупно 43 се достапни во четирите северни општини, населени со мнозинско српско население, за гласањето на 21 април за смена на градоначалниците од функцијата, јави дописникот на МИА од Приштина.

Косовската ЦИК објави дека 33 гласачки центри, главно училишни објекти, одбиле да се отворат за гласањето в недела, поради што интензивно се работи на изнаоѓање алтернативни локации за гласање во општините Северна Митровица, Звечан, Лепосавиќ и Зубин Поток.

Шефот на секретаријатот на ЦИК, Бурим Ахметај, рече дека директорите на училиштата на северот одбиле да ѝ дадат пристап на ЦИК со тврдење дека имаат училишни и културни активности на денот на изборите.

Сепак, рече тој, се работи на идентификување на локации за отворање на алтернативни центри за гласање на 21 април.

Членот на ЦИК од редовите на владејачката партија во Косово, Движење самоопределување, Сами Куртеши побара кривично гонење за одговорните лица кои одбија да ги дадат на користење училишните објекти за гласањето в недела.

Србите и српските партии ги бојкотираа општинските избори во четирите општини со мнозинско српско население во Косово, одржани на 23 април 2023 година.

По поставувањето на градоначалниците Албанци, избрани со исклучително мал број гласови, во општинските згради, со асистенција на полицијата, Србите предизвикаа немири на северот.

Подоцна се појави барањето за одржување нови избори, за што се изготви административно упатство, врз основа на кое е покрената петиција за разрешување на градоначалниците, по што, доколку се изгласа разрешувањето, ќе се распишат нови градоначалнички избори во четирите општини.

Според упатството на Владата во Приштина, ЦИК за 21 април го закажа гласањето за разрешување на актуелните градоначалници.

На ова гласање му претходеше собирањето потписи за петицијата за смена на градоначалниците Албанци на овие општини.

Петицијата ја поддржа и Српската листа, но пред десет дена, на 7 април, оваа најголема партија на косовските Срби, која ја ужива поддршката на Белград, соопшти дека нема да учествува во процесот на гласање, бидејќи, како што нагласи, „косовскиот премиер, [Албин] Курти направи сé за да спречи процесот да биде успешен“.

The post Училиштата во северно Косово одбиваат да се отворат за гласањето за разрешување на градоначалниците на 21 април appeared first on Република.

Парламентарното собрание на Советот на Европа (ПССЕ) го усвои нацрт-извештајот на Дора Бакојани, во кој се препорачува Приштина да добие одобрение да стане членка на Советот на Европа.

За прием гласаа 131 од присутните 171 член на ПС СП, 29 беа против, а 11 беа воздржани.

На веб-страницата на ПССЕ беше објавено кои претставници гласале на вчерашната седница.

Осум пратеници од Шпанија и четворица пратеници од Унгарија, двајца од Кипар беа против членството на Приштина во Советот на Европа, а само еден глас беше против од пет пратеници од Грција. Против гласаше и еден пратеник од Германија. За гласаше и Дарко Каевски од СДСМ.

Против беа седум члена на српската делегација, како и Маја Вукиќевиќ од Црна Гора, како и Сњежана Новаковиќ и Бранислав Бореновиќ од Босна и Херцеговина.

https://republika.mk/vesti/makedonija/koj-e-darko-kaevski-albanski-zet-dedo-mu-e-albert-musliu-shura-ambasador-na-dui/

Меѓу 11-те воздржани имаше и еден пратеник од Црна Гора, шест Италијанци и тројца Молдавци, како и еден пратеник од Германија.

Парламентарното собрание на Советот на Европа ќе испрати препорака за прием до Комитетот на министри за надворешни работи, кој ја донесува конечната одлука со двотретинско мнозинство од министрите или амбасадорите кои ги претставуваат и кои се присутни во моментот на гласањето.

Состанокот на Комитетот на министри треба да се одржи од 16 до 17 мај во Стразбур.

The post Koj како гласаше за прием на Косово во Советот на Европа: Црна Гора и Босна против, Македонија за appeared first on Република.

Претседателката на Косово, Вјоса Османи го прогласи денешниот ден, 17 април, за ден на жалост во спомен на убиените жени и девојки во Косово како последица на родово засновано насилство, јави дописникот на МИА од Приштина.

Според синоќешното соопштение од кабинетот на Османи, општеството треба да биде во жалост секој ден се додека има убиства на жени.

- Утре ќе биде национален ден на жалост во Косово, но нашето општество ќе биде во жалост секој ден се додека има убиства на наши жени и девојки, се наведува во соопштението.

Една жена е убиена вчера во градот Пеќ, а осомничен за убиството е нејзиниот сопруг, кој, како што е соопштено, ја застрелал со пиштол.

Во петокот (12 април) 21-годишна жена беше убиена во Урошевац во Центарот за социјална работа од страна на поранешниот сопруг. Притоа беше ранет и 15-годишниот брат на жртвата.

The post Косово жали за убиените жени и девојки appeared first on Република.

Косово доби препорака да стане членка на Советот на Европа, што е претпоследниот чекор до целосно членство.Парламентарното собрание на Советот на Европа синоќа со двотретинско мнозинство го усвои извештајот на грчката пратеничка Дора Бакојани со кој се препорачува Косово да биде покането да стане членка на Советот. „За„ гласаа 131 пратеници од 171 присутни, „против“ беа 29, а „воздржани“ 11 пратеници.

Меѓу пратениците кои гласаа „за„ се и Дарко Каевски од СДСМ и Арта БилалиЗендели од ДУИ. Сега Парламентарното собрание на Советот треба да го испрати предлогот за прием на Косово до Комитетот на министри за надворешни работи, кој треба да ја донесе конечната одлука со двотретинско мнозинство. Истиот треба да се одржи на 16 и 17. мај во Стразбур.

The post Дарко Каевски од СДСМ гласаше Косово да стане членка на Советот на Европа appeared first on Република.

По веста дека Парламентарното собрание го усвои предлогот за прием на Косово во Советот на Европа, со реакција се огласи српскиот вицепремиер и министер за надворешни работи Ивица Дачиќ кој изјави дека „денеска е ден на срамот во Парламентарното собрание на СЕ, бидејќи за прв пат во историјата препорачано е членството на нешто што не е држава, кое не ги исполнуваат основните услови во доменот на човековите права и слободи“, јави дописникот на МИА од Белград.

Денеска е ден на срамот во Парламентарното собрание на Советот на Европа. За прв пат во историјата се препорачува членство на нешто што не е држава, кое не ги исполнува основните услови во доменот на човековите права и слободи. Напротив, веќе 11 години одбива да формира Заедница на српски општини, што е нивна меѓународна обврска и спроведува политика на терор врз српскиот народ и етничко чистење, се наведува во изјавата на Дачиќ што ја соопшти неговиот кабинет.

Во неа се додава дека „оваа одлука, наметната од силата на меѓународните моќници, се поткопуваат темелите на Советот на Европа и меѓународниот правен поредок“.

За кој принцип на заштита на територијалниот интегритет ќе продолжат да зборуваат кога го нарушија територијалниот интегритет на Србија? Ќе ја продолжиме нашата борба со сите сили, ќе се бориме оваа одлука да не биде донесена на Комитетот на министри на 16 мај, вели Дачиќ.

Парламентарното собрание на Советот на Европа (ПССЕ) денеска го поддржа приемот на Косово во членството на Советот на Европа и го повика Комитетот на министри да донесе таква одлука. Предлог-мислењето за барањето на Косово за членство со кое се препорачува прием на Косово во Советот на Европа на денешната седница во Стразбур го поддржаа 131 пратеник, а 29 гласаа против.

The post Дачиќ: Ден на срамот во Парламентарното собрание на Советот на Европа appeared first on Република.

Претседателот на Собранието на Косово, Глаук Коњуфца, изрази оптимизам дека денеска на Парламентарното собрание на Советот на Европа, Косово ќе го помине вториот чекор за членство во Советот, за потоа да оди на последниот, на 16 мај годинава, јави дописникот на МИА од Приштина.

Во изјава за медиумите по обраќањето на меѓународниот Форум за жените, мирот и безбедноста, Коњуфца рече дека е неправедно да се наметнуваат дополнителни услови за членство во СЕ.

Денеска сум голем оптимист дека Косово ќе го помине овој втор голем чекор, затоа што тогаш останува уште само третиот. Во однос на тоа што сте го слушнале како нови услови, не мислам дека тоа го има во извештајот на г-ѓа (Дора) Бакојани (известувач за Косово во СЕ), не мислам дека е фер Косово да прими дополнителни услови од тие што можете сами да го прочитате во извештајот составен од експертите на СЕ. Тие еминентни експерти добија мандат да дојдат во Косово и да го оценат нивото на демократијата, човековите права и владеењето на правото, кои се трите најважни столбови на Советот, рече Коњуфца.

Тој додаде дека Бакојани во својот извештај за Косово нагласила дека има само еден критериум, а тоа е доделувањето на имотот на Дечанскиот манастир, кој, како што рече, Косово го решил како прашање.

Коњуфца вели дека би било неприфатливо ако владите на другите земји бараат други услови, бидејќи, како што рече, тоа би било „намерно нанесување штета на Косово“.

По изготвувањето на извештајот, еминентните експерти ја прикажаа ситуацијата во Косово, додека Бакојани го изгради својот извештај врз нивните податоци, во кој се вели дека Косово има само еден критериум, што се однесува до членството, а критериумот е манастирот Дечани, што го решивме како прашање. Нема други дополнителни услови. Ако другите земји сакаат да наметнат дополнителни услови, тогаш мислам дека тоа е неприфатливо. Тоа е намерно нанесување штета на Косово и на неговиот интерес и воопшто не е добредојдено, кога самата госпоѓа Бакојани, која доаѓа од држава која не нé признава, вели дека услов е само манастирот, рече Коњуфца.

Собранискоот спикер вели дека формирањето на Заедницата на општини со српско мнозинство во Косово не е услов за зачленување во таа организација и дека тоа не е ниту споменато во извештајот на Бакојани.

Во моментов велам дека Косово ќе се држи само до она што го гледаме како слово во извештајот на г-ѓа Бакојани. Извештајот не вели ништо за Заедницата пред зачленувањето. По зачленувањето, СЕ рече дека ќе формирам мониторинг комисија за Косово во врска со следните чекори во имплементацијата на таканаречените постоечки договори, од кои еден би можел да биде Заедницата, рече Коњуфца.

The post Поставувањето нови услови би било нечеснo: Претседателот на косовското собрание е оптимист за зачленувањето на Косово во СЕ appeared first on Република.

Србија  испрати нон-пејпер на адресите на сите членки на Советот на Европа, кој  содржи факти и јасно искажани аргументи поради кои причини Косово не треба да стане дел од оваа најстара европска организациja.

Документот ќе ги содржи сите етнички мотивирани напади врз Србите, конфискација на имот, сквернавење на цркви, манастири и гробишта, примери за узурпација на земјиштето на кое Приштина гради воена база, монтирани судски процеси против нашите сонародници пред судови без сведоци, како и зошто повеќе од 4.000 дена  одбиваат да ги исполнат обврските од бриселскиот договор и да формираат заедница на српските општиним укинувањето на динарот....

Денеска Парламентарното собрание на СЕ ќе гласа за членство на  Косово а потребна е двотретинска поддршка од земјите-членки.

The post Советот на Европа денеска расправа за прием на Косово во Советот на Европа, како ќе гласа Македонија? appeared first on Република.

Српската економија поради забраната за трговија со домашни производи на територијата на Косово и Метохија, која беше воведена во јуни 2023 година, има загуба од 150 до 200 милиони евра, пишува „Политика“.

Бојан Станиќ, помошник директор на Секторот за стратегиски анализи и услуги при Стопанската комора на Србија (ПКС), вели дека властите во Приштина сè уште не се откажуваат од својата политика и дека Србија „само треба да акумулира загуби, бидејќи не може да влијае на можностите“.

Поради забраната за трговија со стоки, прекршен е и ЦЕФТА договорот, иако оваа меѓународна организација за се го изнесе своето неформално мислење .

Покрај тоа, европратениците имаат капацитет посериозно да ја предупредат Приштина, но тоа го избегнуваат, па домашната економија може „само да чека сето тоа да помине“, рече Станиќ за „Политика“.

Во првите два месеци од годинава на Косово се испорачани 48,8 тони стока, за разлика од истиот период лани кога биле извезени околу 92 тони. Истовремено, вкупната трговска размена меѓу Србија и Косово изнесуваla околу 45 милиони евра.

The post Од забраната за извоз на Косово, српската економија има загуба од 150 до 200 милиони евра appeared first on Република.

Во Парламентарното собрание на Советот на Европа (ПССЕ) денеска почнува пролетната сесија, што ќе трае до 19 април, на која пратениците во Стразбур ќе го разгледаат барањето на Косово за прием во таа организација.

Од српската делегација наведуваат дека ќе се спротивстават со аргументите што ќе упатуваат на безбедносната состојба во Косово, на тоа што Приштина не ја формирала ЗСО и дека со таквата одлука се крши статутот на организацијата, јавија српските медиуми.

Во нивните извештаи се додава дека претседателот Александар Вучиќ вчера изјавил дека Србија ги презела сите мерки и дека им пишал на сите членки на Советот на Европа во кои ги повикал уште еднаш да размислат за прифаќање на на Косово во СЕ како и за нивната одлука да биде различна на Комитетот на министри.

Изјаснувањето за барањето на Косово на пленарна седница, а врз основа на извештајот што ќе го презентира известувачот на ПССЕ за приемот на Косово до таа организација, Дора Бакојани, е закажан за вторник, 16 април. Мислењето на Бакојани денеска ќе биде изнесено пред Комисијата за правни прашања и еднаквост на ПССЕ, што треба да даде свое мислење

The post Советот на Европа се подготвува за приемот на Косово appeared first on Република.

Претседателот на Србија, Александар Вучиќ изјави дека Србија ги презела сите мерки и испратила писма до сите членки на Советот на Европа за да го спречи приемот на Приштина во таа организација, како и писмо до претседателот на Генералното собрание на ОН за резолуцијата за Сребреница, јави дописникот на МИА од Белград.

- Напишав вкупно 14 различни писма до европските лидери, главно персонализирани писма. На сите им се обратив имајќи ги предвид специфичните околности и односи што ги имаме. На еден начин и до оние кои ја признаваат Приштина, а на друг начин и до оние кои не ја признаваат Приштина. Побарав уште еднаш да ја разгледаат одлуката на Парламентарното собрание на Советот на Европа и одлуката на Комитетот на министри за Косово да биде поинаква, изјави Вучиќ.

Тој додаде дека е јасно дека на Косово нема владеење на правото, дека таму се практикува терор и дека ЗСО не е формирана по 11 години.

- Посебно укажав на трикот што мислат дека ќе го искористат на 10 мај со испраќањето на нацртот на ЗСО предложен од Европејците до таканаречениот уставен суд на уставна оцена, по што секако нема да преземат ништо, да замачкаат очи и да обезбедат глас во Советот на Европа. Ние ќе продолжиме да работиме и да се бориме, за ова секако дека најдолго разговарав со францускиот претседател Емануел Макрон, кој вчера и завчера имаше разговори со Олаф Шолц. Ќе видиме како тоа понатаму ќе се одвива. А, ние ќе се држиме до меѓународните јавно-правни норми и до последен момент ќе се бориме за вистина и правда, рече Вучиќ.

Тој рече дека му напишал писмо и на претседателот на Генералното собрание на ОН и разговарал со него за резолуцијата за Сребреница.

- Писмото ќе го достави специјалниот пратеник Вук Јеремиќ, ќе ги пренесе сите мои вербални пораки, а ќе имаме специјални пратеници и на други адреси, рече Вучиќ.

Тој додаде дека вчера добил официјална потврда од Соединетите Американски Држави дека „исклучително силно ќе лобираат за резолуцијата за Сребреница“.

- Ќе одам во Њујорк да се борам против нивното лобирање и да разговарам со пријателски и слободољубиви земји, рече Вучиќ

The post Западот е решен да го внесе Косово во Советот на Европа – Србија ќе име две членки appeared first on Република.

Претседателот на Србија, Александар Вучиќ денеска испрати писма до сите европски лидери по повод евентуалното членство на Косово во Совет на Европа, изјави српскиот министер за финансии Синиша Мали во интервју за српската телевизија „Хепи“.

- Србија сè ќе направи за да не дојде до членство … Првиот предизвик за нас е Советот на Европа и битката што ни претстои, посочи Мали.

Тој додаде дека врз Србија се врши притисок „поголем од кога било“.

Парламентарното собрание на Советот на Европа (ПССЕ) се очекува на 16 април да гласа за прием на Косово, чија независност не ја признава Србија. Конечната одлука ќе биде донесена на состанокот на Комитетот на министри на 16 мај.

На 5 април, на барање на српскиот претседател, беше формирана Работна група за координација на активностите на државните власти која ќе работи на планот „да се спречи приемот на Косово во Советот на Европа“.

Во мај 2022 година, Косово поднесе барање за членство во Советот на Европа, а на 27 март годинава Комитетот за политички прашања на ПССЕ го одобри извештајот на известувачот за Косово, Дора Бакојани, во кој се наведува дека Косово ги исполнило условите да стане полноправна членка на Советот на Европа.

Србија е членка на Советот на Европа од 2003 година. Белград не ја признава прогласената независност на нејзиниот поранешен регион во 2008 година. Белград и Приштина водат дијалог за нормализирање на односите со посредство на ЕУ. Меѓу земјите кои не ја признаваат независноста на Косово се Кина, Индија и пет земји од ЕУ – Кипар, Грција, Романија, Словачка и Шпанија.

The post Вучиќ испрати писма до европските лидери по повод евентуалниот прием на Косово во Советот на Европа appeared first on Република.

Претседателските кандидати од албанскиот блок наместо за Македонија се расправаат за Косово.Арбен Таравари вели  дека е шокиран од информацијата на портпаролот на Владата на Косово дека Бујар Османи бил изготвувач на планот од 9 точки од ОБСЕ за деескалација и нормализирање на состојбата на северот на Косово, што обезбеди повлекување на косовските специјалци од северот.

„Како може планот што беше целосно отфрлен од Владата на Косово да донесе мир? Оставете ги нападите и бескорисните пофалби господине Османи, објаснете ѝ на јавноста зошто побаравте специјалните полицајци да си заминат на северот на Косово и да останат само обичните полицајци? Знаете ли дека обичните полицајци немаат капацитет да се справат со терористичките сили, како што беше потврдено со падот на паднатиот борец Африм Буњаку? Дали вашиот концепт за мир го отвора патот за терористите и го нарушува суверенитетот на Косово?“, праша Таравари.

Османи потврди дека барањето на ОБСЕ било Србија да ги повлече своите вооружени сили од границата.

„Тогаш во консултации со повеќе центри, раководството на ОБСЕ излезе со предлог за дистанцирање на двете страни. Со други зборови, српската армија да се повлече и да ја намали подготвеноста, специјалните сили на Косово да се повлечат, а северот да биде контролиран од редовните сили на Косово. Лага е дека се барало Косово да не го контролира Северот. Туку, да бидат редовните сили, специјалците да ја напуштат границата со Србија за да не ескалира контакт како што се случи на пример во Бањска“, рече Османи.

The post Taравари и Османи наместо за Македонија се расправаат за Косово appeared first on Република.