Тоа што не дава резултати, мора да биде променето. Одредени аспекти на Концепцијата за основно образование ќе претрпат измени, затоа што ниту наставниците, ниту учениците и родителите не се задоволни од имплементацијата и постигнатите ефекти. Ова го истакна министерката за образование и наука проф. д-р Весна Јаневска на средба со директорот на Бирото за развој на образованието, Абдулфета Фетаи на која се дискутираше за актуелните состојби во образованието и заложбите за нивно подобрување, во интерес на создавање поквалитетни ученички генерации.

Планираме историја, географија, граѓанско образование и други предмети повторно да се изучуваат како одделни предмети, а не како во моментов да бидат фузирани и да се создава конфузија кај наставниците и учениците кои навистина секојдневно се прашуваат по кој предмет имаат час. Материјата мора јасно да биде разграничена, како што е пракса и во најголем дел од земјите во Европа и пошироко“, рече Јаневска.

На средбата се дискутираше и за состојбата со учебниците, особено во основното образование каде недостигаат по голем дел од предметите. Јаневска рече дека се прават напори истите да се обезбедат за сите одделенија пред почетокот на новата учебна година, додека за средното образование тоа ќе се случува етапно во следните неколку години бидејќи ситуацијата е навистина катастрофална.

Соговорниците зборуваа и за употребата и прoблемите при користењето на постојниот е-дневник, како и за придобивките од новиот кој вчера беше промовиран, а ќе се примени откако сите предуслови ќе бидат исполнети, што се очекува да се случи во текот на следната учебна година. Министерката посочи дека во овој преоден период од дигитализацијата на образованието, преку е-анкета ќе се слушне мислењето на наставниците за тоа дали во оваа фаза е потребно целосно укинување на хартиениот дневник или пак од корист би било пополнувањето на модифицирана верзија во која ќе се внесуваат само оценки и изостаноци.

The post Јаневска: Планираме историја, географија, граѓанско образование повторно да се изучуваат како одделни предмети appeared first on Република.

Средно образование за деца со странско државјанство или деца без државјанство, формирање инклузивни тимови и поддршка за ученици со попреченост, вработување образовни асистенти во училиштата. Ова се само дел од предлозите кои ќе бидат вклучени во новиот Закон за средно образование, чија работна верзија ја претстави министерот Јетон Шаќири во средното угостителско училиште „Лазар Танев“.

Постојниот закон се спроведува повеќе од 27 години, а во меѓувреме средното образование стана задолжително, беа донесени нови наставни планови и програми и истите постојано се ажурираат и дополнуваат.

Имаме многу нови права и можности за сите чинители во образовниот процес во средните училишта и сето тоа мора да биде дел од една правна рамка. Денес сме тука, заедно, за да ја направиме таа рамка. Имаме основа, која можеме добро да ја надградиме. Ова го истакна министерот за образование и наука Јетон Шаќири на отворањето на првата од неколку јавни дискусии кои ќе бидат организирани во следните денови, по повод изработка на нов Закон за средно образование, кој како што рече, треба да биде во духот на европските принципи и инклузија на сите ученици.

Шаќири потсети дека Стратегијата за образование 2018-2025 година во делот на општото образование поставува неколку приоритети – подобрување на содржината на средното образование, зголемување на опфатот на учениците и подобрување на инклузивноста и меѓуетничката интеграција во средното образование, подобрување на капацитетите на човечките ресурси во средните училишта и подобрување на условите за учење и на квалитетот на образованието.

Тој ги повика присутните на дебатата да бидат активни и да дадат свои видувања на предлог верзијата на законот која ја изготви работна група составена од претставници на повеќе засегнати страни и да изнесат сугестии, со цел усвојување на најдобрата верзија на законското решение.

The post Се подготвува нов Закон за средно образование, почна јавната дебата appeared first on Република.