Иво Санадер, поранешен премиер на Хрватска, стана шеф на затворската библиотека во затворот „Липовица“. Тој не е вработен, туку затвореник, но е задолжен за културното издигнување на затворениците, јавија хрватските медиуми.

Поради примерно однесување, но и нарушено здравје, поранешниот премиер Иво Санадер повеќе не е во „Реметинац“.

Господинот Санадер е во КПУ Липовица неколку месеци. Тоа е полуотворен затворски систем, а сега тој е во многу подобри затворски услови од претходно“, објаснува неговиот адвокат Чедо Продановиќ за Нова ТВ.

Во Липовица 80-тина осуденици казната ја издржуваат во соби со просечна површина од 20 метри квадратни, а поранешниот премиер ја дели својата соба со цимер. Затворениците имаат постојана медицинска нега – лекар и две медицински сестри – и многу други придобивки.

Затворениците сами готват под менторство на професионален учител. Затворот има фискултурна сала, но и библиотека, за која, како што дознава Дневник на Нова ТВ, од неодамна раководел Санадер.

Според здружената пресуда за аферите Фими медиа, Планинска и ИНА-МОЛ, Санадер мора да помине вкупно 18 години зад решетки. Против него се водеа пет постапки, од кои во две е правно ослободен.

The post Иво Санадер e шеф на затворска библиотека appeared first on Република.

Поранешниот премиер на Хрватска, Иво Санадер не е виновен за воено профитерство. Ваква одлука денеска судот во Загреб во судењето за аферата „Хипо“. Станува збор за неправосилна пресуда која инаку е трета за овој случај откако со претходните две Санадер беше прогласен за виновен, но истите „паѓаа“ на Уставниот и Врховниот суд во Хрватска.

Обвинителството го гонеше Санадер дека како заменик-министер за надворешни работи кон крајот на 1994 и почетокот на 1995 година добил провизија од 3,6 милиони куни (речиси пола милион евра) од „Хипо банка“ откако на Хрватска ѝ бил доделен заем за купување згради за амбасади. На овој начин, според обвинителството, во тешката финансиска и економска ситуација во земјата предизвикана од војната, Санадер остварил незаконска финансиска корист што е несразмерна со загрозените темели вредности на државата и државните интереси.

Во објаснувањето на пресудата од загрепскиот суд, пренесува „Индекс.хр“, било посочено дека немало штета за Република Хрватска бидејќи сумата која се споменува не ја загрозила државата. Имало само морално штета. Исто така, судот потенцирал дека станува збор за случај кој е во фаза на застарување

Одбраната на Санадер рече дека пресудата не е спорна и не може да се политизира, додека обвинителството порача дека не се согласува со ставот на судот дека во случајот нема елементи на кривичното дело воено профитерство и најави дека ќе поднесе жалба.

The post Судот пресуди: Санадер не е виновен за воено профитерство appeared first on Република.

Откако Врховниот суд ја укина затворската казна од две и пол години за воено профитерство во аферата Хипо, поранешниот хрватски премиер Иво Санадер доби нова неправна казна на повторното судење во Жупанискиот суд во Загреб.

Тричлениот судски совет го ослободи од вина. Судијата рече дека Санадер не е виновен за воено профитерство.

Бидејќи тоа беше време кога Хрватска беше во непосредна опасност од војна, Санадер беше обвинет и дека е воен профитер. Така, според тврдењата на обвинителството, Санадер во тешка финансиска и економска ситуација предизвикана од војната, остварил незаконска финансиска корист што е несразмерна со загрозените темелни вредности на државата и општествената заедница, како и државните интереси.

Не го сторив кривичното дело наведено во обвинителниот акт. Во претходните две постапки многу опширно ја изнесов мојата одбрана и би сакал да останам таму. Немам што да додадам – рече Санадер на минатото рочиште во своја одбрана.

Санадер во судницата дојде со патерица и во друштво на двајца судски полицајци.

The post Санадер ослободен од вината за воено профитерство во аферата Хипо appeared first on Република.

Врховниот суд во Хрватска ја укина пресудата за поранешниот хрватски премиер, Иво Санадер, за злоупотреба на службената положба и овластување.

Иако во соопштението на Судот не се споменува името на осудениот, се наведува дека тој се товари дека како преговарач од хрватската Влада зел провизија од 3,6 милиони куни (околу 475.000 евра) за склучување договор за заем и за влез на странска банка на хрватскиот пазар.

Хрватските медиуми потсетуваат дека станува збор за случајот „Хипо“.

Откако Врховниот суд ја прифати жалбата на осудениот и ја укина пресудата, предметот е вратен на повторно судење пред Жупанискиот суд во Загреб, каде што беше донесена првостепената пресуда.

Во соопштението на Врховниот суд се потсетува дека осудениот бил обвинет за тоа дека во 1994-1995 година, во својство на заменик-министер за надворешни работи и овластен преговарач во име на Владата на Хрватска, ги договарал условите за заем со една „странска банка“.

Заемот ѝ бил потребен на хрватската Влада за да купи згради за амбасади ширум светот.

Осудениот се товари дека ја искористил воената состојба за да земе провизија при склучувањето на тој договор.

Врховниот суд утврдил дека првостепениот суд не успеал правилно да го утврди начинот на кој дејствијата на обвинетиот имале штетно влијание врз материјалните услови за живот на населението во војната и врз економскиот потенцијал на државата и другите имотни интереси или економскиот потенцијал на државата во војната.

Правилното утврдување на овие факти е пресудно и за да се процени дали значителната материјална добивка е непропорционална, оценува судот.

Во соопштението на судот се наведува и дека во повторената постапка потребно е со поголемо внимание да се процени дали во однесувањето на осудениот се стекнати сите битни карактеристики на кривичното дело злоупотреба на положба и овластување.

The post Врховниот суд на Хрватска му ја укина пресудата на Санадер за случајот „Хипо банка“ appeared first on Република.