Осум од десет верници избрале да останат дома за Велигден и за Рамазан Бајрам, покажува истражувањето на јавното мислење „практикување на религија во услови на пандемија”, реализирано од интернет порталот religija.mk и Институтот за политички истражувања – Скопје со поддршка на фондацијата „Конрад Аденауер”.

Според истражувањето, 80,3 проценти од испитаниците сметаат дека Велигден и Рамазан Бајрам треба да се слават во домашна атмосфера, наспроти 10,4 проценти кои сметаат дека овие празници треба да се слават во црквите и во џамиите.

Околу 75 отсто од анкетираните сметаат дека МПЦ-ОА и ИВЗ исправно постапиле што се приклучиле на вонредните мерки на државата, додека пак 79,6 проценти од испитаници сметаат дека забраната за масовна посета на црквите и џамиите е соодветна и оправдана превенција од ширење на корона вирусот. Половина, пак, одговориле потврдно дека верските заедници соодветно реагираат на предизвиците со корона вирусот.

Според истражувањето, 63,4 проценти од анкетираните рекле дека вонредните мерки за заштита и забраните за присуство на верници во храмовите не значи и ограничување на правото на вероисповед.

На прашањето „Дали сметате дека ако отидете во црква или џамија, постои ризик да се заразите од корона вирус?”, речиси повеќе од половината или 57,1 процент од анкетирани одговориле потврдно, а само 20,9 проценти рекле дека немаат страв од тоа.

Истражувањето покажува дека стравот од коронавирусот кај граѓаните е голем, а од тие причини речиси седум од десет испитаници рекле дека од почетокот на пандемијата немаат отидено во црква или џамија, токму поради страв да заразата. Во тој страв ако им е потребна помош повеќе од половината, или 58,7 отсто од испитаниците, помош би побарале од психолог, наспроти 11,9 проценти, кои за психолошка помош би се обратиле кај својот свештеник.

Истражувањето на ИПИС и religija.mk е направено со поддршка на КАС (Конрад Аденауер) и е дел од серијалот истражувања на јавното мислење за перцепцијата на граѓаните во мултиконфесионални општества. Истражувањето е спроведено во април 2020 година на репрезентативен примерок од 1.127 испитаници со маргинална грешка е помеѓу 2,9 проценти и со 95 проценти интервал на веродостојност.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.