Дванаесетгодишната Христина Митревска од Скопје е единствена од Македонија што боледува од ретката животозагрозувачка болест Chronic Atypical Neutrophilic Dermatosis (CANDLE). На секои три месеци со нејзината мајка Катерина мора да оди во здравствена установа и истражувачки центар во Вашингтон (The NIH Clinical Center) каде што е дел од експериментална програма за лекување.

Христина е висока само 98 сантиметри и има 17 килограми. Родителите долго време не знаеле од што боледува. На три години престанала да расте, а температурата никако не се спуштала. Постојано била болна. Никој во Македонија не знаел да им каже од што боледува. Биле и во Германија, но и таму не знаеле да определат дијагноза. Дури во октомври 2018 година дознале од што боледува нивното дете. Им соопштиле лекарите од истражувачкиот центар во Америка. Болеста се вика CANDLE. Ретка е, и животозагрозувачка.

Докторите во Америка ѝ даваат терапија, ја следат како реагира на секои три месеци. Ветуваат дека многу ќе ѝ се подобри квалитетот на живот, вели мајката Катерина.

На проблемите со кои се соочува нејзиното семејство им нема крај. Иако лекувањето е бесплатно, трошоците за пат и за сместување на мајката не се. На секои три месеци таа мора да бара донации, да зема кредит или да позајмува пари за да може да заминат.

Тамам ќе се вратиме, исцрпени финансиски, мора да мислам како ќе го покриеме следното патување. Никому не му посакувам ваква мака. Донациите никогаш не нѐ покриле целосно. Благодарна сум им на сите што донираат, но ова нема крај, вели Катерина.

Целиот текст може да го прочитате на Деца.мк.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.